掃呢頁CODE去手機

2017年7月9日 星期日

【獨家】歐陽佩珊不敵病魔 郭鋒親證死訊 __,郭鋒,

郭鋒親證太太歐陽佩珊的死訊。藝人郭鋒的太太歐陽佩珊今日突然傳出死訊,東網記者於下午致電郭鋒時,他亦笑笑口否認,不過約晚上七時,他卻再度致電記者,主動承 ...


郭鋒親證太太歐陽佩珊的死訊。

藝人郭鋒的太太歐陽佩珊今日突然傳出死訊,東網記者於下午致電郭鋒時,他亦笑笑口否認,不過約晚上七時,他卻再度致電記者,主動承認太太今日下午二時在養和醫院離世,他解釋指當時情況不方便講太太的情況,故以笑否認,並透露63歲的太太是因肺腺癌離世。

開過三次腦

郭鋒透露更多太太的病情:「四月嗰陣我哋去咗吉隆坡旅行,佢似係中風咁,入到當地醫院之後,一共做咗三次開腦手術,頭嗰兩次,開完腦都發現唔到係咩病,去到第三次,醫生話要開深入啲,抽埋組織,發現到有壞組織!」知道太太身體出問題後,郭鋒即時帶太太返香港就醫,證實太太患上肺腺癌,他更慨嘆指太太從發現癌症至離世只有短短三個月:「呢種Cancer太惡,呢三個月一直有做治療!(太太一直有練氣功?)氣功都唔係大晒,呢種Cancer太惡,由發現到依家都係三個月!」

教氣功最滿足

郭鋒又指太太1991年息影離開娛樂圈,及後就接觸氣功更成為氣功師傅,練氣功已有二十年,教出不少徒弟。太太可有遺願?他說:「一早完成,就係教氣功教出咁多徒弟,令佢好有滿足感,呢樣嘢好感恩!」二人結婚多年並沒有兒女,而太太的後事,他表示喪禮會以基督教儀式進行,遺體則會火化,但日子仍在安排中。

歐陽佩珊當年是無綫花旦,先後演出過《楚留香》、《執到寶》、《網中人》、《英雄出少年》、《上海灘龍虎鬥》等多套膾炙人口劇集,當中在《神鵰俠侶》中飾演「黃蓉」最為人熟識。


來源 source: http://hk.on.cc
鍾意就快D Share啦!