2017年7月29日 星期六

【勁過阿希】《早霸王》幫聽眾告白 答案令森美、小儀呆足三秒 __,森美,小儀,

短短半日竟已經被網民瘋狂討論。(網上截圖)電台節目幫聽眾告白嘅橋段都已經出現咗好多年,不過今朝商台叱咤903嘅節目《早霸王》就出現咗一段連主持森美小儀 ...


短短半日竟已經被網民瘋狂討論。(網上截圖)

電台節目幫聽眾告白嘅橋段都已經出現咗好多年,不過今朝商台叱咤903嘅節目《早霸王》就出現咗一段連主持森美小儀都沉默咗一陣嘅環節,短短半日竟被網民瘋狂討論,仲出現咗唔少猜測。話說今朝《早霸王》有一位女聽眾Lucy就打電話去搵森美、小儀,希望佢哋幫手向一位相識差唔多八年嘅朋友告白,Lucy話佢哋係讀夜校嘅時候認識,認識年幾男方曾向Lucy告白,不過Lucy就話因為自己未拍過拖所以就拒絕咗對方,Lucy拒絕咗男方後都有保持聯絡,仲不時去行下山睇下戲咁樣,Lucy就話據佢所知對方已經六、七年冇拍拖,而Lucy一路對對方都有感覺,所以希望由森美小儀幫佢向對方告白。森美、小儀同Lucy傾咗兩輪之後,就幫佢打電話,一開始森美、小儀仲搞錯咗對方個名,將Bosco搞錯做Peter,傾咗兩句之後Bosco就問:「你哋打嚟做咩?」森美就表示:「有位朋友打上嚟叫我哋打俾你,聽聞你好事近,生日喎!」之後森美就單刀直入:「你平時有冇拍拖呀?」Bosco諗咗陣就答:「拍拖...好耐冇喇,平時喺屋企多。」見Bosco話冇拍拖,森美就開門見山:「咁就有個女仔打電話嚟,就話鍾意你,就話去到一個地步要同你表白,你估唔估到佢係邊個呢?」正路就估中之後大家喺大氣電波傳情好sweet咁啦,點知呢個時候嚟個大轉折,Bosco竟然話:「哦~如果唔係我老婆可以唔使聽㗎喇。」一秒,兩秒,三秒,Bosco:「喂?」森美仲喺震驚之中:「你結咗婚㗎喇咩?」小儀就問到:「你幾時結婚㗎?有冇小朋友呀?」Bosco就話:「好耐lu,有小朋友喇。」森美就唯有話:「咁你努力啲喇吓,得閒再搵你傾下。」收線之後森美、小儀都話唔識點講,森美仲一路感嘆:「勁過阿希!勁過阿希啊!」最後森美就話播Lucy點嘅歌,之後喺熄咪後再慢慢同Lucy傾。


來源 source: http://s.nextmedia.com
鍾意就快D Share啦!
Related Posts Plugin for WordPress, Blogger...