2017年7月4日 星期二

【票房成績表】《春嬌救志明》港產片奪冠 唔及《美女與野獸》一半 __,《春嬌救志明》,美女與野獸,

【票房成績表】《春嬌救志明》港產片奪冠唔及《美女與野獸》一半即時娛樂2017-07-0317:42:37HKT【新增回應】影協今日公佈咗香港上半年嘅票 ...


【票房成績表】《春嬌救志明》港產片奪冠 唔及《美女與野獸》一半

即時娛樂
2017-07-03 17:42:37 HKT


【新增回應】

影協今日公佈咗香港上半年嘅票房成績表,截至6月30日,香港首輪上映嘅電影總數為157部,港產片佔26部,佔咗總數約一成六,其餘131部皆為非香港電影。而中西票房總收入約為9.76億港元,較上年同期10.18億港元少,跌幅約為4.15%。

喺26部港產片之中,最高票房收入嘅係上個中落畫嘅《春嬌救志明》,票房收入為30,256,619港元,而劉德華主演嘅《拆彈專家》仲係上映中,暫時以$25,360,088港元緊隨其後。第三位係周星馳監制、徐克執導嘅《西遊伏妖篇》,票房收入有$23,634,946港元。

至於非港產片方面,愛瑪屈臣主嘅《美女與野獸》(Beauty and the Beast)以$67,232,357港元排榜首,大幅拋離第2位嘅《狂野時速8》(Fast & Furious 8)2千萬港元。而喺第89屆奧斯卡頒獎失落最佳電影嘅《星聲夢裡人》(La La Land),只係以$34,810,271港元排喺嘅8位。提多點,第10位嘅《生化危機:終極屍殺》(Resident Evil:The Final Chapter)就有$32,231,791票房,比起《春嬌救志明》多。

「春嬌」千嬅回覆《蘋果》話呢個係好大嘅鼓勵,多謝觀眾、彭浩翔同拍檔余文樂:「希望我哋嘅下次有一個更加好嘅作品同大家見面,希望仲有一個合作嘅機會,喺我自己嚟講好開心有緣份有余春嬌呢個角色,希望大家永遠都會記住余春嬌同張志明。」導演彭浩翔就好開心《春嬌救志明》成為華語片票房冠軍:「因為一開始係講緊一個關於香港禁煙嘅故事,記得第一集嘅時候香港嘅票房係未如理想,但得到好多人嘅口碑,但最後終於去到第3集嘅時候先得到票房同口碑嘅肯定。」仲希望更多觀眾支持高質素嘅港產片。

喺《失眠》入面演變態狂魔嘅黃秋生回覆指:「梗係好難得啦,多謝香港觀眾支持同鼓勵,更上一層樓,為香港電影事業努力。」錢小豪就話見到個成績好開心:「《救殭清道夫》除咗兩位新導演新嘅編劇,一齊努力做到咁嘅成績咁都開心,希望港片繼續努力。」《拆彈專家》導演邱禮濤回覆《蘋果》時話:「感謝觀眾支持,會畀心機拍多啲好電影。」

《29+1》導演彭秀慧就多謝觀眾支持電影:「因為我知道呢套戲係需要靠口碑嘅,有好多朋友睇完鍾意係不停咁去推介畀佢哋身邊嘅朋友,甚至會一次又一次咁入場,帶唔同嘅朋友入場。」而主演《29+1》嘅周秀娜,就對《29+1》同《小男人週記3之吾家有喜》同時有份打入呢個票房榜感到好開心,娜姐回應話:「好戥兩位導演開心旦哥(鄭丹瑞)同彭秀慧,我覺得兩部都係一個好好嘅作品,自己參演嘅入選咗呢個最高票房10部嘅其中兩部,當然好開心!我覺得《小男人》係講親情,《29+1》屬於比較少嘅片種,好多謝觀眾鍾意,我覺得票房都係其次,最緊要係出嚟嘅口碑。」

至於《小男人》嘅導演鄭丹瑞就話:「能夠見到咁多好嘅港產片、今年特別多有質素嘅港產片喺上半年出現,自己都覺得好開心,而且自己都有一部喺度就更加係興奮,呢個係一個推動力令自己更加要為港產片再努力,咁我就努力囉!」

總共有4套電影上咗前十嘅BabyJohn就話:「呢一張可以話係我入行以嚟最開心收到嘅一張成績單,我對角色、作品冇任何偏好,每一個電影都俾好多心機去拍。我當佢哋係BB咁,每一個都茁壯成長。」佢話每一部電影都入到圍,係好開心嘅事,絕對係可以貼堂。

最高票房十部香港電影(港元):

春嬌救志明 $30,256,619

拆彈專家(上映中) $25,360,088

西遊伏妖篇 23,634,946

一念無明 16,821,785

小男人週記3之吾家有喜 16,186,955

29+1(上映中) 15,220,406

原諒他77次(上映中) 11,603,642

救殭清道夫 6,949,219

失眠(上映中) 4,194,866

合約男女 3,722,021

最高票房十部非香港電影(港元):

美女與野獸(2017) 67,232,357

狂野時速8 47,686,551

神奇女俠(上映中) 45,184,290

波士BB(上映中) 41,766,789

盧根 38,540,970

盜墓迷城(2017)(上映中) 35,446,020

銀河守護隊2(上映中) 35,092,093

星聲夢裡人 34,810,271

加勒比海盜:死靈啟航(上映中) 33,268,208

生化危機:終極屍殺 32,231,791


鍾意就快D Share啦!
Related Posts Plugin for WordPress, Blogger...