蔣家旻主攻投資書籍，其中買入的《買樓上車!!!防中伏》一度賣斷市，是近年暢銷財經書籍之一。
探熱針
SM有出頭 蔣家旻同男友 為買樓做準備
大台的《踩過界》難得每個單元都充滿話題性，其中蔣家旻被有錢仔禁室 SM的場口，重口味至極， Angel（蔣之洋名）更加是渾身是戲，成功搣甩馬子妮的乖乖女形象。事業有得發圍，同拍拖四個月的結婚統籌公司老闆麥存興的感情亦漸趨穩定，早前二人於銅鑼灣拍拖打書釘，目標明確睇投資、買上車盤的攻略，唔通有意入市，為結婚鋪路！
誠品打書釘
當日下午四時，蔣家旻孖住新歡 Nic（麥存興）現身銅鑼灣誠品書店， Angel一身超熱褲，露出一雙白滑玉腿，加上啡紅色的頭髮，即使將賊仔帽笠過眼眉，依然惹人望多兩眼。兩人在投資書的角落，女的埋頭苦幹搵心頭好，男的明顯陪企，不時擔天望地，身邊只要有人拎起手機，便煞有介事𥄫到實，慎防有人偷拍。
企足半個鐘都無意離去， Nic索性在兒童圖書搵定位，等女友可以坐低慢慢睇，蔣家旻對有財經聖經之稱的《用 10%薪水變有錢：全世界有錢人都奉行的巴比倫致富聖經》極有興趣，睇到有趣的章節便即席同 Nic開心「些牙」。明顯陪太子讀書的 Nic頻頻篤電話打發時間，又不時撩女友吹水，其間蔣家旻同男友撒嬌：「我有啲口渴喇！」 Nic馬上動身往上層的「天仁茗茶」買珍珠奶茶，照顧周到！「磨」足三小時，晚上七時多兩人捧着幾本書埋單走人，當中一本是近年曾賣斷市，由 Anthony Chung同 Ann Wong聯合著作的《買樓上車!!!防中伏》，然後二人轉往 Sogo，分道揚鑣 shopping，蔣家旻在 Stella McCartney試五千多元的星星鞋，左望右望睇落勁 like依然忍手無入貨！
風騷唔認男友
《愛•回家》的確令蔣家旻成功入屋，不過由於馬子妮乖乖女，同時亦局限她的演出，來來去去都是乖乖女角色。直至《踩過界》單元扮啤酒妹，遇上有錢仔許家傑，俾對方捆綁、鞭打、灌水， SM的場面完全超越晒大台極限，網友大讚她演技有突破，搣甩馬子妮的乖女框框。
事隔幾天，蔣家旻單拖於尖沙咀出沒，問她新劇好評有何感想，當事人話：「都開心 feedback OK嘅，都多謝監製嘅，因為一路都等緊一個可以超越馬子妮嘅角色，觀眾嘅反應 OK我就開心！」再問她同男朋友是否好事近，準備買樓結婚，蔣家旻反應極大話：「了解中嘅朋友……太遠，工作為先……而家每一個人都好想買樓，都有同朋友傾吓投資啲嘢，但係呢方面自己唔係好叻，咁咪叫做喺工作以外，睇吓書，學習吓！」
撰文：娛樂組
攝影、攝錄：陳亦龍、李溢敏、蕭敬漁
|
鍾意就快D Share啦！
|
|
|