掃呢頁CODE去手機

2017年8月24日 星期四

幫五歲半囡囡轉過三次校 楊思琦:「國際學校先適合佢!」 [壹週刊 - 1433] __,思琦,楊思琦,M1,

名人求學幫五歲半囡囡轉過三次校 楊思琦:「國際學校先適合佢!」香港買樓難,讀書更難,家長為求心宜學校,甚至誇張到射精前已經要作出準備。到正式返學,另一 ...


名人求學

幫五歲半囡囡轉過三次校 楊思琦:「國際學校先適合佢!」

香港買樓難,讀書更難,家長為求心宜學校,甚至誇張到射精前已經要作出準備。到正式返學,另一個戰線開始:海量的功課、密麻麻的課外活動、無止境的補習、為 TSA不停操卷,童年何來會快樂?所以千辛萬苦為囡囡 Krystal(楊卓穎)撲到傳統名校的楊思琦,眼見囡囡跳跳扎坐唔定,唔適合死讀書,竟毅然放棄。

前新聞主播趙海珠有感自己由細到大,讀傳統學校,同細細個移民外國的老公,於學習上的性格有強烈的差別,索性安排囝囝 Hayden(陳彥熹)幼稚園已經由國際學校開始。

單親媽咪

單親媽咪唔易做,現年三十九歲的楊思琦自從生下女兒楊卓穎( Krystal)後,母兼父職憑住一己之力密做搵銀,將最好生活給女兒,昔日的「思琦妹」已變成獨當一面嘅「思琦媽」,如今事事都以阿女行先,為了幫囡囡將來鋪路,於是不惜工本幫佢報讀國際學校。

趁住暑假就快完,思琦帶囡囡同昔日德望同學美心妹妹 Keicy及 Kassy去石澳沙灘一日遊,工作之餘,爭取時間享受親子時光!五歲半的 Krystal全程扎扎跳無時停,一見新事物就向媽咪問「十萬個為什麼」,起初對泥沙抗拒的穎穎,喺媽咪身教之下,樂於接受新事物,大人細路齊齊玩到癲!

帶囡囡 Krystal去沙灘一日遊,楊思琦享受母女相處時光。

約埋囡囡昔日的德望同學 Keicy同 Kassy去石澳玩水,楊思琦玩到𠌥低身好投入。

思琦同 Krystal在沙灘上你追我逐。

Krystal起初抗拒踢沙,但在媽咪親自示範下,囡囡樂於接受新事物。

拒當怪獸家長

陪住媽咪做訪問, Krystal在鏡頭下表現精靈活潑。

思琦原本安排女兒入讀傳統名校德望,希望可以一條龍直升上去,點知讀了半個學期,思琦就幫囡囡轉校,轉了去英基國際學校,放棄一條龍升學計劃,就算學費貴幾倍都在所不計。

「我應該唔係虎媽,其實真係希望佢童年嘅時間,多啲開心嘅回憶,因為讀書係一個好漫長嘅時間,如果咁快就催谷佢,可能條橡筋就會拉得太行,好容易斷,我寧願佢係開心啲咁樣去學習,從中喺玩嘅過程入邊話俾你聽學到啲嘢!

「你哋都睇到啦佢嘅性格好活躍,好好動,其實都好開心型嘅,佢依家呢個性格同我細個真係截然不同,我細個係坐得好定,好似一嚿飯咁,啲反應有冇佢咁快,佢仲會諗好多計仔,好多新嘅 idea,有好多嘢講,好 talkative嘅!」思琦說。

不停轉校搵方向

英基國際學校已經係思琦幫穎穎揀的第三間學校,學費貴過以前兩間學校,目的就係讓囡囡贏在起跑線,給予她一個開心愉快嘅學習環境,「一直喺度摸索緊個女嘅性格,有時我又覺得佢可以好定咁喺度睇書,就會諗佢係唔係可以接受番傳統嗰啲教育,跟住慢慢再觀察就覺得佢係一個探索型嘅學習者,所以我就同佢轉咗學習嘅模式,而家學校嗰度,有啲 field trip,有啲旅行有得玩又有做實驗,係活動當中係更加學到嘢!其實佢轉咗三間學校,有試過傳統同國際學校,但後尾我先發覺傳統學校可能未必真係適合佢!」

成功考入德望幼稚園的 Krystal,讀咗半個學期就轉校到國際學校。

書當玩具習慣成自然

穎穎跟媽咪性格完全相反,教育學院出身嘅思琦文靜優雅,反而囡囡活潑好動,當初都有點無所適從。

「我覺得佢好鍾意玩遊戲,我喺屋企同佢玩一啲遊戲去學字,玩一啲卡佢會學得好快,雖然佢好活躍周圍跑,但係都有靜嘅一面,細個嘅時候已經俾好多唔同嘅古仔書佢睇,我記得其中有一次,大約係一歲十個月左右,佢公公好似發現新大陸咁,點解穎穎可以讀到一段字俾我聽嘅,係英文書嚟㗎喎,嗰時開始我就發覺佢係好鍾意閱讀,所以我都有培養佢!」

至於如何培養,思琦就話:「佢細個時候我已經擺好多書喺佢活動範圍側邊,咩類型都有,有啲公仔有啲有字,不過就英文書比較多啲,佢慢慢每一日都係做緊同一樣嘢,慢慢變成咗一個習慣,每日就睇過先安樂。開頭嘅時候我媽媽其實係極力反對,佢話做咩買咁多書又阻住晒啲地方!」

玩到滿頭大汗,思琦細心為囡囡抹汗。

在媽咪陪同下, Krystal擒高擒低都無有怕。

穎穎男仔頭性格

思琦發現穎穎平日古靈精怪愛搞鬼,偏愛男生玩意,更會因應佢喜好而報讀興趣班。訪問當日,穎穎在訪問場地等候期間,不斷喺沙發上跳跳扎,猶如蜘蛛俠上身,身手敏捷。

「我最鍾意 climbing嗰啲跳落來,因為好似 spider man咁,我唔會驚跌親,因為學校有個墊,我跳落去都覺得好舒服!」穎穎雀躍地跟大家分享。

早前思琦三十九歲生日,囡囡同好友 Keicy齊齊俾驚喜。

繼《辣警霸王花》後,錢國偉再邀請思琦合作網絡電影《王牌霸王花》。

貴族學府

香港有不少出名的國際學校,師資高口碑好,同時國際學校主要取錄外籍生,學額一直供不應求,令不少名人明星都爭崩頭去搶學位。

英基國際學校

英基學校協會係全港最大的國際教育團體,共有四間幼稚園及九間小學,遍布全港。由於英基有政府資助,所以學費相對較平,小學全年學費約$89,200。近期爆紅的九歲 Celine正就讀山頂英基。楊千嬅兒子 Torres今年初在羅便臣道英基升讀小一。

漢基國際學校

位於北角寶馬山的漢基母校,採用中英雙語教學,設幼稚園及中、小學部,小學全年學費 18萬元,中學為 21萬元。去年李嘉誠長孫李長禧讀 P3, 12年彭羚大女由女拔轉過來,林青霞女兒邢嘉倩及周美鳳長女 Florence亦在此就讀小學。

加拿大國際學校

由加拿大回流港人創辦的加拿大國際學校,位於香港仔黃竹坑,盛產 IB狀元,當中有 890個學生排名全球頂尖的百分一之列,全年學費約由 11萬至 19萬元不等,近年學校大推中國文化,希望提高學生接觸中文的機會,邱淑貞囡囡沈月、李克勤兒子 Ryan,以及梁家輝孖女 Nikkie和 Chloe亦分別在此讀中、小學。

哈羅國際學校

有首相搖籃之稱的哈羅國際學校,位於屯門,為英國貴族學府,擁有佔地 3.8萬平方米的校舍, 12年創校,設幼稚園及中、小學部,全年學費約由 13萬至 18萬元,成為香港首間寄宿的國際學校,學校跟英國課程及修讀國際普通中學教育文憑( IGCSE)。英國哈羅學校更是歷史悠久,曾出產七名英國首相。張學友大女張瑤華原於英國讀書,其後不適應當地生活,回港後亦入讀哈羅。

撰文:娛樂組

攝影、攝錄:蕭敬漁、方文初


鍾意就快D Share啦!