掃呢頁CODE去手機

2017年8月5日 星期六

着3吋高踭鞋現身祝捷會 爸爸缺席 Celine晉級遭男同學白鴿眼 「唔信我唱到」 __,Celine,

■日前再度揚威《全美一叮》的Celine,昨日出席祝捷會時打扮成熟,腳踏3吋高踭鞋。現年9歲的小巨肺譚芷昀(Celine),今年6月在美國參加《全美一 ...


現年9歲的小巨肺譚芷昀(Celine),今年6月在美國參加《全美一叮》(America's Got Talent)後備受關注,日前的比賽中她更獲評判送出Golden Buzzer,為港爭光。Celine昨出席祝捷會,竟穿上3吋高踭鞋,以熟女造型現身,現場未見爸爸譚順生。Celine透露現積極準備下一輪賽事,她自爆遭男同學白鴿眼:「佢哋唔信我唱到。」

小巨肺譚芷昀的爸爸譚順生是歌唱老師,自幼獲父栽培,3歲學唱歌,5歲便開始參加比賽,Celine今年6月到美國參加《全美一叮》,演唱Celine Dion的《My Heart Will Go On》晉級,日前在比賽中選唱Michael Bolton的《How Am I Supposed to Live Without You》摘下Golden Buzzer直入半準決賽,成為首位華人獲此榮譽,賽事最快將於香港時間16日早上在當地電視台直播。

要人抱落台

經理人蕭定一昨日在銅鑼灣hmv Kafé為Celine舉行祝捷會,現場有逾30名記者採訪,Celine由媽咪陪同現身,父親譚順生卻避席,父憑女貴的他早前爆出疑學歷造假及被薛家燕數臭撬學生等事件,近日行事轉低調。Celine穿着John Galliano紅黑花裙、Moschino金黃色外套配肉色絲襪,腳踏約3吋高踭鞋現身,打扮成熟的她由蕭定一陪上台,司儀問Celine得獎感受,她講到奪Golden Buzzer一刻即說:「覺得好shock,唔expect呢個會happen,一啲都講唔到嘢。我好lucky,我覺得好似一個miracle,啲金粉跌落嚟。」Celine指自己當時零緊張,完騷後與家人到環球片場觀光,更表示獲獎要感謝爸爸教唱歌。

■Celine拉繩後,現場即灑下金粉,重現當日她在台上獲Golden Buzzer一刻。 ■昨日穿上高踭鞋的Celine,行路時腳步不穩,要由工作人員抱她下台。 ■Celine昨日由媽咪陪伴出席祝捷會,爸爸譚順生(小圖)卻缺席。

蕭定一昨讓Celine重溫比賽當日在台上獲Golden Buzzer一刻,兩人拉繩後,頭頂圓球即灑下金粉,他又送Celine背囊和Minions文具。Celine其後獨自站台讓傳媒影相,穿着3吋高踭鞋揮手揮足兩分鐘,最後她小心翼翼行近台邊,由工作人員抱下台。

唔知會開騷

蕭定一傍實Celine做訪問,他指Celine的fb粉絲人數飆升到14萬,Celine自爆其fb是由爸爸經營,但她有時間也會看,又透露有女同學向自己索簽名,但卻沒男同學:「佢哋唔信我唱到。」蕭定一期待Celine再創佳績:「如入到21強好犀利,5強直情奇蹟,規矩我哋同大會一齊提議,要一早錄好7首歌,唱邊首早兩三日先知,點解揀情歌,我哋冇權揀,佢哋提議。」

■蕭定一向Celine送上文具和背囊,以示獎勵。

Celine為備戰勤力練歌,她說:「每日練兩、三個鐘,視乎爸爸忙唔忙,爸爸練會少少嚴,如自己練就個零鐘。」Celine指有留意勁敵Angelica Hale:「我冇見過佢,但有睇佢啲片同fb。」問到譚順生為何缺席?蕭定一即搶答:「要問咗AGT先搞,臨時決定,佢要上堂。」Celine則說:「唔會慶祝,有講恭喜,有讚我叻女,冇送禮物。」

蕭定一日前表示想在年底或明年初為Celine開紅館騷,問到Celine此事,她聞言望一望蕭定一,然後蕭定一才向記者說:「我冇直接同佢講。」然後他再望望Celine問:「開演唱會好唔好?」Celine認真考慮一秒後答:「未咁快啦。」蕭定一聞言後解釋:「要睇吓場地,唔係咁易搵,年底或年頭做到已經好好。」

採訪:盧妹

攝影:陳慧安


來源 source: http://s.nextmedia.com
鍾意就快D Share啦!