掃呢頁CODE去手機

2017年8月28日 星期一

【汪明荃演唱會】欲赴台發展卻觸礁 阿姐:返大陸做嘢睇背景 __,阿姐,中國,大陸,汪明荃,

阿姐汪明荃開騷喇!!呢個星期香港真係橫風橫雨,4日內掛咗兩個8號風球,破晒紀錄。好彩,阿姐無受風雨影響,今日喺紅館舉行嘅「汪明荃50週年TheTime ...


阿姐汪明荃開騷喇!!呢個星期香港真係橫風橫雨,4日內掛咗兩個8號風球,破晒紀錄。好彩,阿姐無受風雨影響,今日喺紅館舉行嘅「汪明荃50週年The Timeless concert 2017」 演唱會如期舉行。呢次演唱會一連兩場,會慶祝阿姐入行50周年,聽日仲會係佢70歲生日正日,咁重要,演唱會下午拜神時有百多名fans冒雨守侯。

觀眾約於8點左右按序排隊入場,圈中好友都有支持,鄺美雲、莫華倫、胡楓、王君馨、黃偉文、鄧萃雯、王祖藍夫婦、蓋鳴輝、馮素波等都係座上客。舞台中間設有圓筒型螢幕,播放阿姐綵排片段。

23:19 阿姐向四面台謝幕後,首場演唱會完騷。

23:13 阿姐唱完《華麗轉身》之後,喺台底升番上嚟,話唔捨得走。又衷心多謝支持自己嘅人,仲話:「汪明荃咁平凡嘅女子,由上海移民嚟香港,就開始我嘅演藝事業,呢個地方畀咗我好多機會,香港人對我嘅愛啦、對我嘅包容,我知道我啲歌好多人話汪明荃style︳但我係一個好努力嘅人,每個人都有佢少少令人欣賞嘅地方,我希望大家都係一樣,千祈唔好覺得自己太渺小,會盡晒全力去做。」然後唱出最後一首歌《美麗娛樂世界》。

22:45 一連唱出3首快歌後,阿姐話覺得唔吃力,仲越做越起勁,再好有氣勢咁原來華麗轉身!佢話喺一個崗位上做50年唔容易,因為有高低起跌、人事關係,但只要堅持到係好緊要,再多謝現場觀眾支持。

22:36 阿姐唱完《自由女神》後,家英哥再上場話:「係呀,佢係我嘅女神,神神哋呀!好厲害,神龍見首不見尾、神出鬼沒,有時你諗唔到嘅嘢,佢都會將佢擺上頭上面,嗰吓係佢心入面神來之筆嘅嘢。」之後就將阿姐歷年來嘅相放出嚟,佢又話阿姐唔怕醜,仲試過光頭造型,其中一個係阿姐放鷹上頭,家英哥話係最鍾意嘅造型之一。之後,阿姐出場唱《熱咖啡》。

22:24 阿姐話1985年參加央視春晚,當時同黃霑諗有咩歌可以歌頌祖國,最終寫咗一首叫《長城長江萬里長》,聽聞長城好多人去,牆身有啲剝落,長江啲水又唔知有冇以前咁清澈乾淨,佢呼籲大家要珍惜地方,珍貴嘅嘢要好小心去打理,由今日開始大家都環保啲好冇?趙增熹又問阿姐點保養,係咪靠飲茶?阿姐話全靠朋友送,最重要係自強自愛,要有好身體先可以照顧自己愛嘅人,之後就唱出《愛你一生一世》。

22:20 阿姐請咗Kim Robinson上台,叫對方講句廣東話,Kim表示:「我愛你」,阿姐話本來對方話要退休,但為咗自己就做埋今次,之後Kim問阿姐同現場觀眾鍾唔鍾意啲髮型。Kim落台後,輪到趙增熹同大鋼琴登場,阿姐話趙增熹今次對佢好重要,因為過去嗰3、4個月搵佢幫手練歌,趙增熹話自己本來唔係好鍾意阿姐啲唱腔,阿姐唔介意,仲話鍾意老實人,而家想試新嘢,擔任佢嘅歌唱老師,今次享受過程,好似初出道跟老師學唱歌咁,不斷努力求改進。

22:11 有個男化妝師上台幫阿姐補妝,阿姐大讚對方靚仔,又攬晒腰咁晒畀觀眾睇,引嚟全場尖叫,阿姐問對方合作咗幾耐,化妝師答10年,仲話係「由18歲化到28歲」。

22:10 跟住就到握手位,阿姐去到影迷會前,不停收花,超過40紮,後面啲保安不停幫手接收轉走,阿姐話:「估唔到要用5首歌先可以握晒咁多觀眾,本來諗住退休,但原來仲有咁多花收,都係唔退喇!」

22:01 間場時,播出阿姐同家英哥互相對話,問到兩人關係、吸引之處等,家英哥讚阿姐人靚聲甜,阿姐回讚家英砍有才華。但講到兩人知唔知對方愛惡,命中率唔係好高,再問到喺屋企嘅重要性排序,阿姐揀寵物行先,再到傭人、自己,家英哥排第四。家英哥仲講到阿姐外剛內柔心地好,全世界得佢一個做到。

21:58 阿姐話今日係粵劇界好重要人物唐滌生先生嘅百歲冥壽,所以做咗啲新式粵劇表演,仲搵嚟演藝學院畢業嘅高材生嚟做佢個駙馬。

21:41 家英哥再出場講大戲,阿姐喺六、七十年代由廣州來港,包括新馬師曾、紅線女、梁醒波等,令阿姐有機會接觸粵劇,之後學粵劇,再到做八和會館主席,仲為粵劇界及西九出力,之後阿姐換上粵劇戲服同一名男演員唱《帝女花》。

21:30 唱完《京華春夢》後,阿姐講到以前想去台灣發展,但因為冇參與工會,所以冇去得成,仲講到o依家返大陸做嘢都要睇背景,然後慨嘆話藝人好多時都係身不由己,佢哋都邊度有工開就去邊,希望以後永遠都唔好有呢啲政治問題影響,藝人再多啲多啲嘅job,語畢獲全場拍手,阿姐話自己都係受害者之一;之後就唱出《圓月彎刀》。

21:23 阿姐唱完《千王之王》嘅主題曲《用心將心偷》後,憶述番當年用《千》劇嚟打隔籬台嘅《大地恩情》,佢話一套好作品,各個崗位都好重要,好似今晚自己演唱會冇請嘉賓,係想證明自己仲做得到,但排落去都覺得自己好攰,所以話觀眾啲掌聲好重要。80年代另一套電視都好重要,亦係首套可以喺內地播出嘅,就係《京華春夢》,之後就唱出《京》劇主題曲。

21:10 阿姐落台換衫,家英哥再出場繼續佢個分享會,提到小妹一心想喺演藝事業發展,除咗做家頭細務,亦愛唱歌,喺學校係風頭躉,向其演藝夢想進發。到63年加入麗的映聲訓練班,咁啱張證書號碼係001,亦奠定小妹凡事都要攞第一嘅個性。其後到日本進修舞技,67年加入TVB,眨眼已經半個世紀,呢位青春少艾活力無邊,靚到o氹落水都仲要o氹幾聲。

21:02 唱完一連串嘅國語歌後,阿姐同現場觀眾打招呼,話自己今次踏上紅館舞台好感觸,申請紅館唔容易,對上一次做自己騷係10年前。佢又話呢排啲颱風嚇死人,然後笑言:「好彩汪明荃都夠堅,打風都打唔甩。」噚晚綵排時好攰,見到朋友送花藍好感動,不離不棄去支持。

20:48 阿姐喺舞蹈員陪同下坐黃包車出場,着住一套五、六十年代嘅服裝現身,唱一連串國語流行曲,之後仲坐喺木凳度,同男dancer跳踢躂舞。

20:43 阿姐唱完《萬水千山總是情後》,降番落台底,換英裝骨骨嘅家英哥上台,仲自信地讚自己靚仔同身材好,又感謝觀眾支持阿姐。佢喺個talk入面,話要分享人生最珍貴嘅寶物「汪小妹」,更公開阿姐童年照,讚阿姐自小就有明星相。

20:35 演唱會開始。劉德華錄音作旁述。汪阿姐着白色喱士裙,戴住鑽鍊上台唱出《萬水千山總是情》。

(攝影:沈健程)





開場前,舞台中間設有圓筒型螢幕。

張國強、王君馨等一齊坐。 Wyman、王祖藍夫婦。 胡楓同馮素波
阿姐出場













阿姐換衫唱粵曲


阿姐同男dancer喺台上拜堂 阿姐話對方係演藝學院畢業生




然後阿姐落台同觀眾握手




祖藍等人起身跳舞
Kim Robinson上台撐阿姐 趙增熹坦言唔鍾意阿姐唱腔,但阿姐唔介意,仲話鍾意人老實。






鍾意就快D Share啦!