掃呢頁CODE去手機

2017年8月3日 星期四

儲彈藥娶黃翠如 蕭正楠開行 Turbo 落場賣漢堡 [壹週刊 - 1430] __,翠如,蕭正楠,正楠,黃翠如,M1,

當日蕭正楠落鋪巡視業務,之後索性著住圍裙埋機接order。探熱針儲彈藥娶黃翠如 蕭正楠開行Turbo 落場賣漢堡一套《超時空男臣》贏like的蕭正楠, ...


當日蕭正楠落鋪巡視業務,之後索性著住圍裙埋機接 order。

探熱針

儲彈藥娶黃翠如 蕭正楠開行 Turbo 落場賣漢堡

一套《超時空男臣》贏 like的蕭正楠,近日傳出同拍拖三年的黃翠如,八月秘密外遊結婚。娶「聯旺集團」主席個女,要儲彈藥的蕭正楠開行 Turbo,拍劇生意兩瓣兼。

去年開漢堡店,今年六月再開分店,為催谷生意,一招「男臣」駕到,蕭正楠落鋪賣包吸客,促銷!

向未來外父交代

今年四十歲的蕭正楠,同黃翠如拍拖三年,早有成家立室念頭。近日傳出二人於年初向公司攞定假,計劃八月在外地低調註冊結婚,明年補擺婚宴。傳聞仲講到好兄弟曹永廉同甩拖唐詩詠,做伴郎伴娘。

雖然兩個當事人都否認八月結婚,但蕭正楠曾經講過:「我會俾佢一個難忘嘅婚禮!」兼夾要向身家億億聲的未來外父交代,所以上到男一,蕭正楠仍然要諗計發圍。

成個「男臣」戙喺度,仲送埋餐,幾十蚊就享有星級招待,抵難怪班街坊開心到暈。

Burger B位於藍田的匯景商場,面積約六百呎,月租約五萬,應付租金,老闆蕭正楠不時要落場吸客。

男友賣包,翠如 BB梗係負責宣傳。

其漢堡包店以自家製牛肉, 150克足料為旗號,最貴一個包都係賣$59的招牌珍寶漢堡。

黃翠如老豆係「聯旺集團」主席,未來外父身家億億聲,蕭正楠都要發力搵錢。

生意發大搞

去年孖表弟在牛頭角開漢堡包店「 Burger B」,翠如 BB亦「夫唱婦隨」在 ig放漢堡包相宣傳。見第一間店有錢賺,想做漢堡大王的蕭正楠發大搞,今年六月,在藍田開第二間分店。食住在人氣劇《超時空男臣》的號召力谷吓生意,上週他出席完劇集宣傳活動,直踩落藍田鋪做生招牌,貼地吸客。

有街坊客以為蕭正楠賣包係拍緊整蠱節目,唔敢行近。要勞動蕭正楠揮晒手叫佢過嚟幫襯。

見偶像企 counter,兩個女學生反應,好明顯以為自己有幻覺!知道係事實,即刻九秒九撲去買包兼集郵。

食客 O晒嘴

蕭正楠走入鋪頭,同員工傾咗兩句,就掛件圍裙上身做收銀。有食客以為係「幻覺」嚇一跳,亦有部分見「男臣」駕到,始知自己幫襯緊蕭正楠而 O晒嘴。經過的途人更以為大台拍整蠱節目,只敢離遠舉手機偷拍「大將軍」。直至他揮晒手,開到聲拉客:「過嚟買個包食吓!」班粉絲得悉蕭正楠堅賣包唔係玩嘢,即撲向收銀幫襯。蕭正南接 order收錢仲送埋餐,親民加殷勤,獲星級招待嘅藍田街坊俾佢冧到暈。

落場賣包,蕭正楠對盤生意好瞓身。「拍住表弟開,佢管廚房,我就一得閒返嚟幫手做樓面嘢。呢個分店六月先開,之前係試驗性質,見生意好,咪喺商場正式開一間,今年打算再開多間。」蕭正楠說。

鴻圖大展,為要儲老婆本娶有米黃翠如!蕭正楠只一句:「結婚傳聞唔好信呀!」

兩個拍拖三年就閃爆三年,彼此早已認定對方,故就算婚期唔係傳聞所說的八月,拉埋天窗日子亦不遠已。

有指好兄弟曹永廉會為他們擔任伴郎。而失戀不久的唐詩詠,則是伴娘。

愛情穩定,蕭正楠在事業上亦更上一層,他孭飛的《超時空男臣》有口碑,網友 like爆。

兩個攞正牌寓工作於拍拖,去年在《幕後玩家》一幕鴛鴦浴激吻,可謂真的假不了。

去年初,蕭正楠帶埋阿媽同女友黃翠如一齊去日本旅行,識做的翠如不時揸機幫蕭母影靚相,行奶奶政策得米。

捱 17年 做老闆發圍

歌唱比賽奪獎入行

蕭正楠 01年,參加《太陽計劃之優質樂壇接班人》歌唱比賽,奪「冠軍」和「超人氣潛質獎」、參加《全國百事新星大賽》奪得「魅力新星大獎」。在兩個大型歌唱比賽嶄露頭角,因而被唱片公司高層李進賞識, 02年簽約「大國文化」。

寸爆麥浚龍被封殺

同年橫掃各頒獎禮新人獎,不過之前他接受訪問時說︰「邪不能勝正」,被指暗寸同期新人的麥浚龍( Juno);涉僱用職業粉絲及投資千萬造勢。

歌、影、視中港發展

03年開始為無綫拍劇《戀愛自由式》,又進軍影壇, 04年憑《六樓後座》獲提名「金像獎最佳新演員」,其間中、港兩邊歌、影、視三線發展,但發展平平, 07年蕭正楠與公司解約。

返大台配角升一線

08年,他簽約無綫拍劇,頭幾年都是做男配角,直至 13年的《巨輪》,終於擔正男一,從此坐穩一線小生。

事業愛情穩步上揚

12年,發展平平的蕭正楠與何傲芝拍拖,當時一直有指何父嫌他不夠富貴,兩人一直保持地下情。至 14年他因拍《師奶 Madam》,與黃翠如撻着,兩人拍拖以來,蕭正楠事業更上一層樓,去年更從商做老闆。

明星愛搞食肆

圈中不少明星愛搞食肆,更搞到有聲有色,開埋分店。先有林子善開「龍鳳冰室」,林夏薇投資千萬開點心火鍋店,後有唐文龍開居酒屋及楊秀惠搞日式刨冰店。近日就連麥包都開懷舊茶餐廳,看來明星對食,真是情有獨鍾。

麥包懷舊茶餐廳

一向瓣數多多的麥包,今年在牛頭角開懷舊茶餐廳,將於 8月開張,早前他更親自落場睇裝修,他說今次有 12個合夥人,他只投資 6位數,但新店未開張,他已經密謀開分店。

唐文龍居酒屋

近年主力返內地拍劇的唐文龍,去年 12月與沙煲兄弟劉永健合資,在灣仔開設居酒屋「昭和食堂」,開張當日好友周家蔚都有現身撐場。

楊秀惠日式刨冰店

楊秀惠去年與友人合資七位數字,在大坑開了日式刨冰店「越後屋」,四月開張時,更找來藝人好友陳豪、胡杏兒、田蕊妮、翟威廉及胡定欣撐場,實行以明星效應招徠。

林夏薇點心火鍋店

15年,家底甚厚的林夏薇,投資了千萬,在北角及屯門開設「金功夫」火鍋店,由於林夏薇圈內廣結人緣,火鍋店成為不少明星的聚腳點,連韓國人氣組合 BigBang都來幫襯。

林子善港式茶餐廳

12年,林子善與友人合資過百萬,在大坑開「龍鳳冰室」,短短一年已於灣仔開分店,至今已有 4間分店,林更表示目標是擁有十間分店。

撰文、攝影、攝錄:娛樂組


鍾意就快D Share啦!