掃呢頁CODE去手機

2017年9月7日 星期四

工聯會區議員冇申請照打齋 [壹週刊 - 1435] __,M1,

當日下晝不停落雨,不過無阻尚德邨舉行盂蘭勝會,仲有道士誦經。八卦陣工聯會區議員冇申請照打齋農曆七月鬼門關大開,周圍都搞盂蘭勝會。之前「帕卡」襲港,《壹 ...






當日下晝不停落雨,不過無阻尚德邨舉行盂蘭勝會,仲有道士誦經。

八卦陣

工聯會區議員冇申請照打齋

農曆七月鬼門關大開,周圍都搞盂蘭勝會。之前「帕卡」襲港,《壹》仔就發現將軍澳尚德邨有人喺八號風球下仲打齋,而且冇事先申請。房署話原則上唔准許呢個活動,但有份搞活動嘅工聯會區議員簡兆祺,竟然話房署多年來默許,仲批評有人搞政治攻擊,真係咁都得?

當日朝早《壹》仔去到現場,發現尚明樓停車場對出已經搭好棚,晏晝八號風球未除下,就開始打鑼打鼓吹「啲打」,又有道士誦經。尚廉樓出入口附近嘅機房同垃圾房都打開咗,有電線由機房拉去壇度。

至於擺放燒豬、香燭等物品嘅枱,就有個帳幕擋雨,帳幕寫住當區工聯會區議員簡兆祺辦事處字眼。樂隊大約五點暫停奏樂,但夜晚近七點再繼續。上星期三,《壹》仔返去現場,所有棚已經被拆走。

尚德邨搞咗五屆盂蘭勝會,據悉因為邨內自殺案多,有人希望打齋超度亡魂。房屋署回覆話,上述位置唔係舉辦活動嘅場地。根據房委會指引,團體搞活動前七個工作天,要遞交申請俾所屬嘅屋邨辦事處,但五年來都冇收到申請。簡兆祺就話係房署默許,反而批評有人利用今次活動搞政治攻擊喎。





當日亦不時有街坊上香。





簡兆祺反而批評,有人利用今次活動搞政治攻擊。

免得失各路人馬 崩牙駒拒助選

澳門立法會本月中進行選舉,濠江嘅選情同香港有唔同,大部分候選人好少會企街站或者洗樓拉票,佢哋習慣拉攏社會上有頭有面嘅人支持,再透過對方人脈網絡得到選票。

上星期,澳門江湖猛人、綽號崩牙駒嘅尹國駒,罕有地喺報章刊登聲明話:「本人支持全社會認同的公平廉潔選舉,但絕不參與或支持各參選組別和參選者的競選活動。」

點解崩牙駒無端端要咁做?《壹》仔收到風,原來一向人面極廣嘅佢,黑白兩道都識唔少人,又識好多澳門立法會議員,只要佢開聲,好多人都會俾面佢。有消息話,唔少候選人都睇中崩牙駒嘅江湖地位同勢力,趁選舉前已經不停約佢去飯局,希望游說同拉攏佢幫手拉票,提高勝算。

不過,有澳門政界消息話,中央表明唔容許選舉同江湖中人扯上關係,崩牙駒唔想因為自己嘅身份影響到人,又唔想得失參選嘅各路人馬,所謂「順得哥情失嫂意」,所以就索性主動登報講清講楚。





消息指,人面極廣嘅崩牙駒因為有勢力有地位,選舉前已經好多人約佢食飯。





崩牙駒上星期喺報章刊登聲明,講清楚自己對於立法會選舉嘅立場。

楊振權恩師為中共黨員

將「雙學三子」黃之鋒、羅冠聰同周永康重判入獄六至八個月嘅上訴庭副庭長楊振權,中文水平令唔少人譁然。到底佢師承何人?不得而知。但佢喺母校循道中學嘅恩師,原來就係曾出任基本法諮詢委員會秘書長,其後被揭係中共「地下黨員」嘅毛鈞年。

根據楊官母校循道中學五十五周年校慶特刊《璀璨瑤琚》,佢四年前接受訪問話中學時期深受一位中國歷史科老師影響,就係毛鈞年。毛鈞年冇教過佢,但佢就從對方身上學到「勤奮」,又話「受老師的影響,我也十分在意自己在庭上的廣東話判詞是否準確。若我發現自己詞不達意,回家後仍會反覆推敲……」

識得反省係好事,等我哋重溫一下判詞先:「香港社會近年瀰漫一鼓(股)歪風……有人,包括一些有識之仕(士),鼓吹『違法達義』的口號、鼓勵他人犯法。」一段錯足兩個字,仲鼓吹一個口號添,楊官返屋企真係有排推敲。

之前佢喺庭上話:「重奪公民廣場個『奪』字已經有暴力。」受老師影響下,唔知佢覺得三反五反入面嘅「反」,同文化大革命嘅「革命」,又有冇暴力意味呢?





毛鈞年(左二)八十年代加入新華社,升任副社長。但後來因為唔同意當局六四事件中屠殺學生,加上健康問題淡出政壇。(《蘋果日報》圖片)





楊振權係循道中學校友,該校一三年校慶特刊,刊登咗五十五位「於社經界享有卓越成就的傑出校友」訪問文章。

何君堯促炒魷戴耀廷就攞獎

上星期二,立法會議員何君堯發起網上聯署,要求港大炒法律系副教授戴耀廷魷魚,聯署內容話:「你想香港動亂嗎?你想學生被誤導犯罪嗎?你同意法律學者帶頭叫人犯法嗎?請支持聯署要求港大革走戴耀廷!」

佢仲寫埋信俾港大校委會主席李國章,不過李國章講明校委會冇權解僱教職員,要由校長處理。至於校長馬斐森就話,睇過呢啲要求炒戴耀廷嘅信,但就唔完全同意信件嘅內容。馬斐森又話,同戴耀廷最近都見過面。

戴耀廷上星期喺《 D100》網台節目解畫,話「同校長見面就係因為我攞咗個獎」。事關自己喺港大法律學院主持嘅「法治教育」計劃,攞到「知識交換計劃獎」,於是喺飯局見到馬斐森。呢個獎正係鼓勵學生同教授走進社區,實踐所學。

不過,戴教授都話感受到壓力,「喺大學裡面我所做同所講嘅嘢,係咪喺學術自由同言論自由保護之下?」認為呢件事正正考驗緊大學制度嘅完善程度。





戴耀廷解釋喺港大職位係長期教席,需要得到校長同意,再經過一輪程序先炒得。





何君堯追擊戴耀廷,話如果校方唔能夠回應訴求,會發起示威遊行。(《蘋果日報》圖片)

撰文:巫不言

news@nextdigital.com.hk


鍾意就快D Share啦!