掃呢頁CODE去手機

2017年9月21日 星期四

鄭家孫新抱晒名牌學府 [壹週刊 - 1437 - 財經] __,M1,

鄭志剛妻子余雅穎嫁入鄭家時十分低調,只透露曾在高盛任職,現時投身教育事業,其學歷顯示她畢業於名牌學府,而鄭志剛也是美國哈佛畢業生。中環人語鄭家孫新抱晒 ...






鄭志剛妻子余雅穎嫁入鄭家時十分低調,只透露曾在高盛任職,現時投身教育事業,其學歷顯示她畢業於名牌學府,而鄭志剛也是美國哈佛畢業生。

中環人語

鄭家孫新抱晒名牌學府

香港名校一位難求,無論屬天王級家長劉華抑或富豪新貴馬化騰,為子女撲學校都要紆尊降貴,陪仔女去面試;正所謂揸住間名校好過揸住間上市公司,富二三代索性發展教育事業,早前鄭家純家族私人錢包周大福,全面收購由丁毓珠創辦的八間維多利亞幼兒園及幼稚園;其實新世界接班人鄭志剛除致力把藝術融入商業之外,其太座余雅穎( Jennifer)亦睇準教育這個大市場,創辦 Arch Education,機構專門開班協助學生考入 Ivy League及 Oxbridge。

呢位鄭太履歷都好夠照,喺美國 German Swiss國際學校及 Choate Rosemary Hall讀書,呢兩間中學冇番咁上下銀兩都別叩門,特別是 Choate Rosemary Hall寄宿學校,甘迺迪總統及著名金融狙擊手 Carl Icahn也是校友。鄭太後來在哥倫比亞大學畢業, JP Morgan及高盛做過分析員及執行董事,雖然已有三個小孩,但有張咁靚履歷,贏晒彤叔其他孫新抱幾條街,所以如果珍妮花做「少奶奶」真係嘥晒!





維多利亞幼稚園由四太閨中密友丁毓珠創辦,廿年前周大福已是大股東。





位於中環雲咸街的 Arch Education,專門開辦課程協助學生報考外國名牌大學。

棺材別亂玩

海洋公園「哈囉喂」發生棺材撞死人奪命意外,農曆七月鬼門關大開,邪乎?此又令人憶起金至尊創辦人——林世榮十多年前突然猝死之離奇事件,林世榮為吸引自由行旅客,以金廁所作招徠,拍照收廿蚊一次,後來升呢,設計了一副金棺材,可以電動唧高,並非大吉利是瞓棺材,意謂「升官發財」,每次拍照收一百蚊,不過旅客唔多受落,後再改瞓「金浴缸」,玩到出神入化,○八年突然在家中心臟病發猝死,享年只五十三歲!





金至尊創辦人林世榮生前最識搞噱頭,有足金廁所及足金浴缸。





上週海洋公園發生奪命意外,一名廿一歲中大學生被棺材撞死。

中環寸嘴





楊國佳:都忘記是什麼慈善晚會,我同細妹(中)與林鄭原來都曾有過合照。

工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。

林鄭邀請班年輕人去佢禮賓府交流,座上代表咩級數嘅年輕人呢?嗌埋大陸口號——「三業三政」(意謂:學業、事業、置業;議政、論政、參政),重點係年輕人有冇提出有建設性提問?還是宣傳大陸口號。家陣政協北上開會,當場嘔唔到料出嚟,返港一個禮拜內都要秘書 feedback進貢意見啦。

「港獨」其實係班年輕人冇地方做愛做的事,想搬出嚟住獨立就真;劉天王當年做𡃁時台慶都要食死貓,要硬食「杏加橙」;兩年前先爆係無綫編劇所編,劉華只係照稿讀,正所謂:「強權就是真理,並無討論嘅空間。」好似家父有份捐二十分之一嘅東華三院甲寅年總理中學在「港獨」流第一滴血,幸好家父沒命名,否則成日見報影響我愛祖國之形象;不過家父捐過四川佛光楊耀松小學,家陣地震我都驚佢冧,到時又要「籌旗」,但潮流唔興捐錢返大陸了,只有祖國派錢給我們。仲要靠祖國開放多啲城市來港自由行,否則 PK有誰可憐?

講番甲寅年總理中學隨後與北京中關村中學結為姊妹學校,呢啲叫做香港仔精神,識時務者為俊傑,唔使夠 quali,最緊要識「舐」,肉麻當有趣,鬥瓜鬥臭,香港變咗做臭港!好似之前有個政協常委話:「唔擁護林鄭,等於背叛中央。」下場就好似以上張圖咁!一個杏加一個橙。

肥胡露車呔

有名你叫嘅「肥胡」胡定旭並非浪得虛名,上週五晚同朋友殺去灣仔「廚魔」「 Bo Innovation」歎分子料理,驟眼睇「肥胡」條「車呔」超過四十吋,喺呢度晚飯,志在過癮, Blue Menu一個頭要$2,500,配埋 Grand Cru wine pairing每位再加$1,880,肥胡一枱人起碼兩皮嘢落樓,見肥胡同個魔廚 Alvin好熟落,莫非學林鄭話齋去「偷師」?喺銅鑼灣有間日式及法式 fusion菜餐廳,名字叫「紫」,肥胡都係老闆之一,肥胡篤信風水命理,曾跟紫微楊學紫微斗數,成間餐廳以紫色為主調,食客去過已感受到布滿風水陣!





驟眼一看,肥胡條車呔可能超過四十吋,美食當前,見他十分享受。





位於銅鑼灣的餐廳「紫」,肥胡是股東之一。




鍾意就快D Share啦!