探熱針
相隔 28年再合作 52歲劉美君谷胸色誘林保怡
52歲的劉美君，為下月中在紅館舉行一連兩場《 Karma Chameleon千色演唱會》找來相隔 28年無再合作的林保怡任個唱嘉賓，又與他重唱 89年《偷窺》一曲；拍 MV當晚，逆齡生長的劉美君谷盡 4吋事業線。遇到火辣嫲嫲挑逗，早前意外弄傷眼角的林保怡，少一點定力都唔掂。
嫲級挑逗
拍 MV當晚，劉美君穿上閃綠色的低胸晚裝，谷盡四吋事業線，雖然已經五十二歲，但身材外貌都 keep得好，為了配合歌曲《偷窺》，她向坐在琴邊卡位的林保怡扭來扭去，落力挑逗。演技派的林保怡交足戲，眼神鹹濕又受落。拍完一個鏡頭，趁休息時，林保怡問：「頭先拍嘅時候，我對眼嘅視線跌低咗，你有冇留意呀？」在旁的劉美君笑到出唔到聲。
現場拍攝陣容強大，十足拍戲一樣，原來是林保怡的班底，「我同高世章負責音樂，視覺上由 Bowie負責，佢好快就搵咗《瑪嘉烈與大衞》好強嘅一個 team，我好放心，佢有要求又奄尖，係一個保證。」劉美君說。
考慮四日
二十八年後劉美君搵番舊拍檔林保怡重唱《偷窺》，她說：「呢首歌係我心頭愛，一直都想搵人再唱，但係物色唔到第二個男聲可以啱唱呢隻歌，好難有個男歌手有個咁 man嘅低聲。我搵佢嘅時候，佢推咗，話好耐無唱歌，我叫佢考慮多幾日，結果，我等咗佢四日。」自從一一年的《天與地》片尾曲《年少無知》後，林保怡近六年沒有再唱歌，「我都要多謝劉美君，搵我再合作，突然叮醒我，其實都可以唱番歌，有個咁嘅機會， why not？」
爆眼角縫九針
為劉美君開聲的林保怡試 MV戲服時不小心仆倒，弄傷眼角縫了九針，直到拍攝當天才拆線，「我嚟之前先啱啱拆線，仲有少少腫，初初冇諗過要縫針，因為我驚要剃眉，好彩醫生話唔使剃，先冇咁擔心。而家冇嘢喇，係有啲腫同有啲瘀血，不過，化妝遮到就冇事。」
移居美國多年的劉美君，有九年沒在香港開演唱會，下月中在紅館開騷，由高世章任創作總監，將歌與戲融合放在舞台，連換衫都於台上進行，她請埋林保怡做個唱嘉賓，「係 bonus，我今次個演唱會似 musical，搵佢就啱晒。」
30年歌齡
公認是演技派的林保怡，其實當年是以歌手身份入行，先後做過鼓手、消防員和警察， 87年被葉德嫻賞識合唱《離合圓缺》， 91年正式推出第一張個人大碟， 94年簽約無綫拍劇，演出《妙手仁心》系列劇集彈出，其間唱過不少電視劇插曲， 12至 13年，憑《天與地》跟另外兩個男角陳豪、黃德斌合唱的《年少無知》成為當年神曲，橫掃各大小音樂頒獎禮。
撰文、攝影、攝錄：娛樂組
|
鍾意就快D Share啦！
|
|
|