掃呢頁CODE去手機

2017年9月13日 星期三

患脂肪肝!36歲金剛窮到燶借錢度日 __,金剛,

加油呀金剛!藝人金剛於台灣讀至高中畢業後任職過髮型屋、便利店,之後機緣巧合於客人介紹下,2002年加入台灣娛樂圈,2009年無綫到台灣找演員擔任TVB ...


加油呀金剛!


藝人金剛於台灣讀至高中畢業後任職過髮型屋、便利店,之後機緣巧合於客人介紹下,2002年加入台灣娛樂圈,2009年無綫到台灣找演員擔任TVB8主持,金剛才轉戰香港,雖然他有份做「獎老」的遊戲節目《奬門人》及與阮小儀拍檔的《街坊廚神》做了一段時間,亦吸納不少人氣,但原來金剛於約三年前工作量一落千丈,底薪不多的他,一年接得一個騷,更需向好友借錢度難關!

小儀請食飯

金剛接受專訪時,說到三年前的工作及經濟狀況,頓時收起搞笑、調皮一面,他認真地說:「當時喺無綫底薪唔多,收入始終唔會好豐富,嚴格嚟講大家都知底薪係少,要靠接Show,但之前有一年我只係接到一個Show,成個月冇嘢做,死講真,我唔係好多積累(積蓄),嗰陣係搵辦法自己慳錢,衫又冇去買,嗰排真係着嚟着去都嗰幾件。」當時經濟拮据,問他有否向圈中好友借錢?金剛不諱言:「有!好多圈內朋友都幫過我,初時覺得呢行冇乜情義,但呢啲幫過我嘅人,真係『在心中』。(有邊個?)三哥(苗僑偉),佢照顧咗我好多,實際上係乜唔好講喇!小儀(阮小儀)都有,佢知我嗰陣冇乜錢,知我困難,成日請我食飯,好感動。」

當志偉係恩師

問到困境時家人有否給他壓力,金剛說:「冇!屋企人好好,佢哋知我有困難都話唔緊要,照顧好自己先,我都好感動。」雖然於無綫賺錢不多,但他坦言與無綫關係相當良好:「冇話反面走,只係大家嘅理念唔同,始終大公司好多嘢要配合。」金剛今年6月跟合作十年的無綫約滿,7月加盟王祖藍公司旗下,向來孝順的他,為了照顧父母,已搬返台灣,有工作時便飛返中、港,實行中港台三邊走。說到之前有傳曾志偉與無綫不和,而金剛是因志偉而離開無綫,金剛說:「新聞點寫我冇得控制,志偉係我嘅恩師,香港有金剛,真係要多謝佢,佢幫咗我好多。我依家喺台灣住,一方面我係想多啲時間照顧父母,二來香港消費真係好貴。我喺台灣同一個幕後朋友都搞咗間娛樂公司,啱啱開始啟動。」

目標係祖藍「大屋」

轉新公司後,金剛接了不少大陸綜藝節目,亦拍攝多部電影,說到搵多了錢,他笑說:「唔係好多,大家有情有義嘛!」不少藝人跟祖藍「搵食」都希望市場分一杯羮,金剛說:「邊度都冇所謂,我要求嘅係自由度。」問他目標是甚麼時,他搞笑說:「叫祖藍喺隔籬送個單位畀我,一層就滿足!同佢一模一樣大就夠,呢個係我目標!(仲距離幾多?)要問佢(祖藍)哈哈!」昔日參演的角色都是說半鹹淡廣東話,問金剛有否想演的其他角色時,他開玩笑說:「我真係想做嗰啲有好多女朋友,個個身材不得了嗰啲!」問他與前女友蕊蕊分手後有否拍拖,他說:「一個都沒有,慢慢睇!可能係我唔啱談戀愛,我唔抗拒拍拖,會多識朋友,相處吓先。(揀女友條件唔同咗?)身材好、樣靚個個都想要,但係最緊要係性格,要成熟、獨立。(要求高?)希望啫!」

最巔峰重210幾磅

眾所周知,金剛是「識食」之人,戒煙已一年的他體重暴升了30多磅,現時近200磅的他坦言,最巔峰時體重高達210多磅,更說:「之前我做過身體檢查,醫生話我有少少脂肪肝,脂肪肝嚴重啲係會肝硬化。(你食得太好?)所以我依家食嘢盡量清淡啲。」

場地:隆堡麗景酒店


來源 source: http://hk.on.cc
鍾意就快D Share啦!