Philip做「跟得老公」，陪住杏兒四圍飛去開工。
探熱針
佗 B四圍飛 老公詐型 杏兒停工安胎
15年胡杏兒嫁俾 Philip做人妻，婚後兩公婆開行 turbo全力造人，終於得米！今年母親節杏兒宣布有喜。佗 B七個月，大肚婆堅持返內地為新劇跑宣傳，搞到老公冇晒符，惟有親自出馬做貼身保鏢陪住飛。
離港一星期，週五（ 1日），李生李太孖住返港，個肚愈黎愈大，但杏兒行動依然好敏捷， keep住摩打腳行得勁快。為免老公再詐型，杏兒都識做，暫時減產專心安胎。
唔錫身
上個月初，杏兒唔理老公反對，同「胡說八道會」班好姊妹飛去澳洲拍特輯，搞到 Philip鬼咁擔心，要拜託班姊妹幫手𥄫實老婆，仲喺 ig留言問：「捨得回家嗎？」返港唔夠一星期，杏兒又要開工喇！今次 Philip親自出馬做「跟得老公」，陪住四圍去。
「今次要去廣州、北京再去上海宣傳， Philip明知老婆唔錫身，大住個肚都仲係冇時停，所以幾忙都要請假去看實佢。不過杏兒都應承佢今次係最後一個 trip，之後留喺香港專心安胎，暫時唔會再有大 probject，最多只會出吓 event囉！」杏兒身邊人透露。
停飛安胎
講得出做得到！回港後，杏兒第一時間在 ig宣布要抖一抖：「 This is my last trip before BB Lee arrives， not allow to fly anymore！」大肚婆終於肯定性養胎， Philip可以放心喇！
雙腳水腫
落機當日，兩公婆前後腳出閘， Philip拉住兩個大喼，杏兒就負責拉細喼，佗 B七個月，杏兒冇乜走樣，著住黑色連身裙，側面睇巨肚現晒形，雙腳仲明顯出現水腫，雖然粗身大細，但杏兒依然好敏捷，出閘後九秒九行去停車場。至於 Philip，護送老婆出閘後，將行李交俾司機，自己又再趕下場，一支箭匆匆離去。
大肚婆唔願停
除咗杏兒，圈中仲有唔少女 artist佗住 B都唔肯抖繼續做，事業心好強！
撰文：娛樂組
攝影、攝錄：陳亦龍、楊紫
|
鍾意就快D Share啦！
|
|
|
