藝人袁詠儀（靚靚）接受鄭紹康主持的有線奇妙電視節目《天下第一Friend》訪問，快人快語的她笑言當年參選港姐是因為覺得自己靚：「不過入行後見到朱玲玲同李美鳯，嘩！佢哋真係靚到不得了，我即刻同自己講：『袁詠儀你改戲路仲諗住做靚女，你死梗』」
胡亂投訴闖禍
靚靚自認成為1990年香港小姐冠軍及最上鏡小姐後年少輕狂，遇上不合理的劇本，竟然直接向監製投訴，不得要領後，又改向傳媒投訴：「我最錯就係同記者投訴，咁大間公司點容得下我胡言亂語！（被照肺？）冇照肺，係直接入肉！」
演技是天生的
事後被投閒置散主持音樂節目，靚靚說：「我又唔識唱、又唔識歌，連歌手名都唔係好清楚，更加唔鍾意主持節目，所以咪意興闌珊囉！」幸好柯受良當時找她拍第一部電影，不久更摘下新人獎，她得戚地表示演技這方面是天生的。
第時一定多人追
靚靚又斬釘截鐵指仔仔張開慕童（魔童）沒有無遺傳她和張智霖的演藝才華：「佢啲戲好屎！基本上我都唔想佢做呢行，因為佢有我同張智霖呢對父母，入行嘅話肯定會比其他人辛苦百倍！」在靚靚眼中，「魔童」不但有梁朝偉的外表，還有周星馳的性格：「佢外表斯文靚仔，性格風趣幽默，第時肯定好多女仔鍾意！」
要畀時間兒子玩
她與張智霖對「魔童」教導有方，不過靚靚承認自己也有過做「怪獸家長」的時候，幫魔童的時間表排得密密麻麻，直到有次見家長，被當頭捧喝。靚靚說指有次見家長，老師問魔童平時做甚麼：「我好勁咁數晒佢星期一至五有咩堂要上，跟住老師問：『咁佢玩嘅時間呢？』我聽到呢句說話就好似畀大盆冰水照頭淋，張智霖仲要在旁細細聲話：『係啦，我都話咗佢㗎啦，佢係要咁！』嗰吓我真係想中埋去，不過之後我真係放棄咗做怪獸家長！」
魔童望行紅地氈
原來靚靚和張智霖直到近年才告訴魔童父母的職業是演員。靚靚大笑說：「因為有次校長打畀張智霖要求見面，話我哋呢個家庭好有問題。原來魔童話畀校長聽爸爸之前做警察，最近就賣壽司。哈哈！所以我哋先同學校講清楚我哋嘅職業係演員，而魔童知道我哋係演員後，只係問點解唔帶埋佢去行紅地氈！」
|
鍾意就快D Share啦！
|
|
|