2017年9月10日 星期日

【獨家】失婚陳貝兒單拖旺角巡鋪 試菜執貨親力親為 __,陳貝兒,貝兒,

陳貝兒近日驚爆同圈外老公黃國棟離婚,佢主持嘅大台節目《嫁到這世界邊端》,訪問多位異國人妻,貝兒睇到人哋有幸福家庭,外籍老公錫到燶,貝兒觸景touchi ...


陳貝兒近日驚爆同圈外老公黃國棟離婚,佢主持嘅大台節目《嫁到這世界邊端》,訪問多位異國人妻,貝兒睇到人哋有幸福家庭,外籍老公錫到燶,貝兒觸景touching,晚晚爆喊,網民肉赤留言祝佢將來得到幸福。

失婚貝兒話o依家先專心工作,調節自己,好好享受一個人生活,靜待下一段緣份。女人當自強,貝兒言出必行,除咗演藝工作,佢兩年前同幾個友人合股搞Green Common素食店,推廣Green Monday,信佛嘅貝兒當年讀大學時開始茹素,佢覺得素食對身體好,又環保減碳。

貝兒回復單身,唔使照顧家庭,多咗時間,就瞓身事業,佢間素食店近日仲喺旺角開新店,日內會正式開幕,o依家試業中。現實生活,貝兒未有子女,但佢素食店就係咁開枝散業,兩年開咗五間,分別係灣仔、中環、上環,尖沙嘴同旺角,據知股東們有意年底再開。愛情失意,事業得意令貝兒有番精神寄托。

貝兒呢排為谷節目《嫁到這世界邊端》,夜闌人靜就開facebook live同網友民盡訴心中情,晚晚傾到口水乾,貝兒日前自嘲:「夜晚一個人,唔會有人陪我傾偈,多謝網友陪我度過寂寞夜晚。」貝兒夜晚玩網聊,中午就去巡舖。《蘋果》日前下午2點幾就發現佢單拖去咗旺角新店打點,一身casual wear嘅貝兒,着住大咕窿牛仔褲,好有型格,單身貝兒重出江湖,相信仲好有巿場。

老闆娘貝兒甫入店,先找店長傾咗一輪,貝兒對貨架安排好有意見,見到店員忙於執貨,貝兒都有落手落腳,擒高擒低幫手,佢仲關心店員搬重貨,提醒佢哋注意唔好親條腰,貝兒對員工好細心。佢哋勞動咗一輪,廚師就整咗一啲新菜畀佢哋試食,貝兒同店員邊食邊討論。貝兒接受傳媒訪問時話:「Single時間多咗,我都想多啲去新店幫吓手,好多嘢要親力親為。」素食店密密開分店,開勻港九,貝兒笑言:「Green Common係幾好生養。」咁貝兒本人呢?佢話:「隨緣啦,我本身好鍾意小朋友,生到一定生,但依家對象都冇,日夜都咁忙又唔夠瞓,『痱滋』就有得我生。」

採訪、攝影:梁繼光、黄曉程 貝兒夜欄人靜就開facebook live同網友民盡訴心中情



貝兒甫入店,先找店長傾咗一輪

貝兒話Single時間多咗


鍾意就快D Share啦!
Related Posts Plugin for WordPress, Blogger...