無綫女主播出名靚女多，但願意留低嘅人似乎愈來愈少。周嘉儀、趙海珠、黃婉曼、鄭萃雯、駱文捷等先後離巢，就連喺2014由NowTV過檔無綫，被網民激讚喺全 ...
無綫女主播出名靚女多，但願意留低嘅人似乎愈來愈少。周嘉儀、趙海珠、黃婉曼、鄭萃雯、駱文捷等先後離巢，就連喺2014由NowTV過檔無綫，被網民激讚喺全台最索主播(因為所剩無幾喇)，好Pure好True嘅「嘉倩BB」陳嘉倩，亦將於10月初離開無綫，重返校園。
嘉倩BB向來讀書都幾叻，當年以1A2B入讀香港中文大學嘅英文系，副修德文及西班牙文。9月初，嘉倩BB突然喺社交網上貼出浸大學生證，唔少網民以為佢只係partime返學，但原來已靜悄悄向無綫請辭。嘉倩BB日前接受傳媒電話訪問，佢話：「係，其實未對外公佈，唔知有人知。我會去浸大讀傳理學文學碩士，其實都諗咗一段時間，之前每日好忙咁報道新聞，想增值自己，take一個break，input番一啲嘢，想做全職學生。」
問到無綫有冇挽留？嘉倩BB笑笑口話：「關係都ok嘅，佢哋都support我出嚟讀書增值自己。」其實無綫將嘉倩BB用到幾盡，除咗報新聞，仲要主持《周末主播室》，連天氣報告都做埋，佢承認有時工作都感到吃力，佢話：「都有一定work load啦，會出一啲節目，例如學英文，剛剛又去完美國做一個升學嘅節目，又報道新聞，好似百足咁多爪，但自己覺得唔係每樣都做得好好，想專注做一樣嘢。」
相信，唔少嘉倩BB嘅Fans都會好唔捨得佢，問到讀完兩年書後有冇機會做番主播？佢話：「多謝佢哋支持，我諗呢個世界冇咩冇可能，睇吓之後有咩機會啦，我都open嘅，如果有合適MC job都唔抗拒。」
陳嘉倩剛在facebook肯認消息，並留言:「一路走來，有遇上過不同挑戰、迷惑、感動。間中有迷失，但好人好事實在太多。感恩，您們一直都在。」
