《2017年香港小姐競選》喺周日結束，但係話題講咗幾日都講唔完，歸根究底，因為今屆港姐冠軍由5號雷莊𠒇奪得，而呢個賽果，並唔係由觀眾投票選出，亦唔係由評判團宣佈，而係憑「校長」鄭裕玲決定最後一票，投俾雷莊𠒇，結果大家對呢個賽果似乎唔太滿意，有人炮轟兒戲，仲有人話係選「嘟姐小姐」，唔係香港小姐(新聞連結：http://bit.ly/2eJFSnf)。
有傳同余詠珊反目嘅曾志偉，雖然近年已甚少再為港姐擔任司儀，不過志偉話自己都有留意今屆港姐嘅爭議：「我會用四個字形容，慘不忍睹！其實每年佳麗啲質素會好參差，但係覺得節目水準先係最重要，尤其今年係港姐45周年，但係竟然變咗做一個向手機apps致敬嘅廣告節目，失去了向港姐致敬意義，我做咗咁多年港姐，睇到真係好唔舒服！」
志偉仲話港姐嘅製作一向係以富麗堂皇見稱，係好代表香港嘅電視節目：「點知突然喺節目走咗幾隻公仔出嚟，真係強差人意。」
志偉直言賽制係有問題，佢話：「最初係全民投票，o依家又變番做人為嘅狹窄選票方式，還原基本步本來係最好，全世界嘅選美都係搵啲最有品味嘅評判評選，出嚟嘅結果大家都會信服，唔應該評判同導師身份重疊，導師點都會有私心，一定賣花讚花香！」
至於嘟姐成為眾矢之的，志偉話：「我覺得佢有少少無奈，嘟姐可能已知道賽果，因為冇理由知道第三名，但係又唔知道第一、二名，感覺係好怪，所以臨時臨急叫佢點樣講呢？到最後嘟姐惟有講咗句話『都係呢個啦』，如果我係嘟姐，都唔知點做先好！」
來源 source: http://hk.apple.nextmedia.com
|
鍾意就快D Share啦！
|
|
|
