現年33歲嘅周永恒（Roy）入行多年，是非新聞停不了，涉毒、打老婆、背妻偷食……鑊鑊新鮮鑊鑊金！靜咗一排嘅Roy，噚日被讀者李小姐爆大鑊，話Roy噚早 ...
現年33歲嘅周永恒（Roy）入行多年，是非新聞停不了，涉毒、打老婆、背妻偷食……鑊鑊新鮮鑊鑊金！靜咗一排嘅Roy，噚日被讀者李小姐爆大鑊，話Roy噚早飛抵澳洲時，被警察登機截查！原來前晚從香港飛悉尼QF118班機，昨早喺悉尼時間9時降落，但機組人員直到10點多才放乘客走。有四、五個澳洲警員登上飛機，留低Roy與同行一男一女，未知所為何事。
李小姐接受電話訪問表示，Roy三人坐喺飛機上較後位置，問到Roy喺機上有冇鬧事？李小姐話：「冇喎！我都好出奇突然有警員上機。」警察未出現之前，機長有冇廣播解釋呢？李小姐詳細描述當時情況：「我哋降落後，飛機一直無泊埋閘口。機長話因閘口有架機走唔到，咁就一直等，跟住機長又話會停埋一邊，然後用巴士接駁。我哋一路等到十點，機門打開，先有機場職員上機，機艙長話要等authorities上嚟做啲嘢，之後就見到有警員上嚟。過咗一陣就放我哋落機，但留低咗佢哋一行三人。」
問到Roy有反抗或抗議嗎？李小姐表示：「冇呀，佢哋坐後面，我聽唔到，亦冇反抗。」咁Roy有乜反應？李小姐話：「佢只係坐喺度咋。」李小姐話喺香港等上機時，因為Roy講嘢好大聲，所以望到佢，知道大家搭同一班機：「佢同個男人講唔知咩試吓先算啦咁。」至於同行嘅一男一女，李小姐話女仔好矮好細粒，應該係Roy嘅強國女友，最後李小姐還關心問記者：「你哋聯絡到佢嗎？唔知有無放佢走呢？」
《蘋果》致電Roy求證，但佢熄咗電話，而佢喺微信嘅資料就標註地區為「悉尼，澳大利亞」記者透過短訊聯絡Roy了解，佢表示：「咁無聊冇嘢回應。」問到被警察截查發生乜事？Roy就咁樣回應：「警察懷疑我係IS（「伊斯蘭國」），帶有核彈頭，好彩我將部iPhone裝咗係（喺）個腦入面，o依家係（喺）守衛森嚴嘅監獄入邊，用精神力同你WeChat。」跟住再補充一段話：「前排我睇火影忍者仲學咗影分身術，現在身處各國IS總部，除咗一拳超人之外，我根本無人能敵。」
