掃呢頁CODE去手機

2017年10月26日 星期四

大班自爆同當奴食飯獲安慰 [壹週刊 - 1442] __,M1,

八卦陣大班自爆同當奴食飯獲安慰成立咗五年嘅網台D100,星期日喺旺角麥花臣場館,舉行「D100五周年贈慶」活動,多名前任或現任泛民議員,好似劉小麗、姚 ...






八卦陣

大班自爆同當奴食飯獲安慰

成立咗五年嘅網台 D100,星期日喺旺角麥花臣場館,舉行「 D100五周年贈慶」活動,多名前任或現任泛民議員,好似劉小麗、姚松炎、林卓廷同譚文豪等都現身撐場。啱啱退出民主黨嘅區諾軒、退出工黨嘅胡穗珊同佔中三子都有出席。

區、胡二人講笑話係「終極退黨聯盟」,合唱一曲本地樂隊「 Supper Moment」嘅《無盡》,非常熱血,但胡穗珊就唱得麻麻,有啲唔啱 key。譚文豪上年都有唱歌,但自知唱功一般,今年同楊岳橋棟篤笑就算。

佔中三子戴耀廷、陳健民同朱耀明上台時,一度獲得全場觀眾起立鼓掌。佢哋因為佔中被檢控,好可能坐監,三人合唱電影《監獄風雲》主題曲《友誼之光》。

D100創辦人鄭經翰就回顧歷史,話覺得經營網台愈來愈困難。另外又自爆早排同正保釋受審嘅前特首曾蔭權食過飯,對於佢被檢控感到內疚,因為同自己申請數碼廣播牌照有關,曾蔭權聽完反而安慰番佢。大班強調,好相信曾蔭權嘅人格,認為佢唔係貪心嘅人。





佔中三子戴耀廷、陳健民及朱耀明,上台獻唱電影《監獄風雲》主題曲《友誼之光》。





大班(上圓圖)自爆早排同曾蔭權食飯,對於佢被檢控感到內疚,曾蔭權聽完反而安慰番佢。

泛民星光熠熠撐錢志健





錢志健(藍圈)今次代表「 2047香港監察」參選,泛民就晒冷幫佢助選。

「佔中十子」之一嘅資深對沖基金經理錢志健,上星期正式報名參選區議會山頂區補選。離投票日只係剩番一個月,上星期日民主派直情晒冷幫佢助選,例如民主黨何俊仁同許智峯、公民黨譚文豪、香港本土嘅毛姨姨,同埋被 DQ嘅姚松炎都有嚟造勢,人多到要限制每人得四十五秒講嘢幫錢志健拉票,候選區議員有咁大陣容嘅拉票團隊,你話有幾何。

毛姨姨造勢之餘,仲自爆鍾意約錢志健食飯:「我好少主動約人相聚,錢志健係我近年來幾乎係唯一一個。我話:『嚟呀,一齊坐低傾吓,食餐飯。』因為我非常感動於佢對香港嘅嗰份堅持、執着,同埋一份愛。」毛姨姨落足力幫手打氣,大叫「 Ed Chin, sure win!」不過做開基金經理嘅錢志健可能未習慣拋個身出嚟,冇毛姨姨嗌得咁放,仲笑得有啲尷尬咁。

雖然山頂區係自由黨票倉,但係錢志健嘅對手,自由黨嘅楊哲安都落足力拉票,仲話自己每日為咗見選民,喺街上企足五個鐘。

民協九十後小鮮肉視馮檢基為師父

民建聯派「蛇齋餅糉」深得街坊歡心,每逢選舉就大讚自己社區工作做得好,原來民主派都唔輸蝕㗎。好似民協咁,雖然資源唔夠建制多,但都有粉絲。有人就同《壹》仔講:「我細細個就聽過(民協)呢個名。」

民協上年改選中委成員後,平均年齡大跌,主席同兩個副主席都係八十後,秘書長黃虹銘( Ian)更加只有二十七歲,掹車邊算九十後,同《壹》仔講自細認識民協嘅,就係佢喇!「細個住深水埗,姨媽成日講話民協點樣幫佢哋。」 Ian又話,讀中學嗰陣,民協區議員梁有方會去佢學校講 talk。

佢哋黨內經過表決,決定支持馮檢基補選九西,有人質疑馮檢基咁嘅年紀仲出嚟同新一代爭,但 Ian就力撐馮檢基,「唔應該純粹睇年紀,我哋唔覺得阿基阻住個位。」又解釋話民協喺九西有一定支持,亦會同泛民協調。

Ian喺美國讀政治,返香港後喺中大讀法律博士,考咗 PCLL。做見習律師已經夠忙,佢仲話不時要朝早六點落區見街坊,八點半仆去中環返工,夜晚收工後再同民協委員開會。佢話馮檢基提醒佢要「獅子撲兔」,即係對小事都要重視,同埋要出力去完成,以免將來後悔,睇嚟佢真係當正馮檢基係師父。





九十後黃虹銘 Ian(藍圈)係見習律師,工作忙到爆都抽時間同民協委員開會同搞活動。(受訪者提供圖片)





民協黃虹銘(左)

表明,唔覺得馮檢基阻住啲

後生上位。(受訪者提供圖片)

龍蝦破傳統冧庄女童軍會長





梁唐青儀(中)打破百年傳統,冧庄做女童軍總會會長,都算威番次。

成立九十八年嘅女童軍總會,一直都會邀請時任港督或者特首嘅夫人出任會長。不過,由於今屆出現首位女特首,即係未來五年都唔會有特首夫人,咁問題就出現喇,女童軍總會會長呢個位,由邊個做好呢?

根據女童軍總會會章,列明會長應該由特首夫人出任,不過第一先生林兆波唔做公職。該會之前亦已預告,如果特首冇夫人,就會由執委會推薦人選,會長人選要係香港居民,但冇性別限制。

據報導,女童軍總會確認,執委會已經推薦前特首夫人梁唐青儀連任會長,梁太亦都已經接受邀請,決定繼續做會長,下個月嘅內部周年會員大會,就會正式通過任命。總會仲讚佢做咗會長五年,一直積極支持同參與女童軍活動添。

唔講唔知,龍蝦之前身兼大約七十項公職銜頭,包括香港紅十字會會長、香港公益金會長、香港各界婦女聯合協進會名譽贊助等。今次冧庄,仲打破女童軍總會百年來嘅傳統。

撰文:巫不言

news@nextdigital.com.hk


鍾意就快D Share啦!