前DJ洪朝豐日前證實患舌癌，他今日接受東網電話訪問時表示剛收到報告，醫生說屬於第一期或第二期舌癌，醫生建議立即做手術，估計要切除3成至5成的舌頭，如果做手術的話會是11月初，問到做手術的話到時豈不是會講唔到嘢？他說：「唔止，仲有個可能性係我會破相，需要破開我嘅下巴骨做手術，再用螺絲鑲埋佢，所以下巴係會有疤痕，講嘢能力都會大受影響，語言治療師會幫助我講嘢，但其實另外我有同醫生講需要慎重考慮，有同佢講我依家接受緊內地中醫嘅治療，佢哋會開藥方畀我，然後我執藥。」
北上撲水
他亦謂其實過去一星期在佛山拍一套網絡電影，昨日拍到凌晨三點，但今早搭專車七點半來香港醫院覆診睇報告，睇完報告之後再專車送他返佛山，仍要拍多幾日戲，故會在佛山煲藥，已經食了五日藥，今日是第六日，早上及黃昏各食一次，問食藥之後情況可有好轉？他說：「就係食完之後覺得條脷情況輕鬆咗啲，呢5日條脷嘅痛逐漸變少，食嘢輕鬆咗，有進步，所以我好坦承同醫生講，呢個殺傷性咁強嘅治療方案（指手術）我需要觀望一陣，因為有一組中醫師睇緊我，安排咗月底去內地三個星期做治療，除咗中醫開方外，亦有推拿、按摩、針灸配合，令身體血液循環好，令藥嘅吸收好。」
接受事實
問到當他聽到醫生說要切脷的時候，可有感到很震撼、接受不到？他說：「冇，當個幾星期前確診知道有癌病時，知道治療都係三樣嘢，分別係手術、化療、電療，所以當佢同我講要切去條脷三至五成嘅時候，我已經有心理準備，所以好平靜。（假設真係要切脷嘅時候，仲使唔洗使電療或化療？）醫生冇咁嘅建議。」
冇咗把聲
講到他最大的寶藏就是聲音，如果做手術的話他就沒了聲音，但他表示前妻一再叮嚀他：「叫我考慮任何治療方案時，一定要知道生命有好多可能性同美好，如果我冇咗把聲，我都仲有好多才能，而我嘅細佬都話條命最重要。」他亦說姪女有中醫治療經驗，覺得有中醫團體幫他就好像有曙光。他亦謂現階段會先接受21日的中醫治療，之後再觀察病情，問到之後可還會考慮接受做手術？他說：「呢樣嘢我唔講住，依家當下唔可以諗太多嘢，只可以見步行步，要當下考慮嗰啲嘢。」據知，醫療費用龐大，所以他病住都要北上開工撲水。
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|
