掃呢頁CODE去手機

2017年10月12日 星期四

分手年多由朋友行番前一步 陳瀅猷亨合體過節甜不甩 __,陳瀅,猷亨,

分手年多由朋友行番前一步陳瀅猷亨合體過節甜不甩娛樂要聞【爆相爆片】賭王何鴻燊與梁安琪的大仔何猷亨,跟無綫小花陳瀅分手一年多,依然維持再見亦是朋友的好關 ...




分手年多由朋友行番前一步

陳瀅猷亨合體過節甜不甩

娛樂要聞








【爆相爆片】

賭王何鴻燊與梁安琪的大仔何猷亨,跟無綫小花陳瀅分手一年多,依然維持再見亦是朋友的好關係,之前猷亨公司樓盤開賣及澳門選立法會,陳瀅都落力支持。日前有讀者「爆相爆片」,目擊二人趁國慶日合體,在中環ifc天橋與市民齊齊逼住睇煙花,二人更甜笑對望。



分手一年多的何猷亨與陳瀅,日前相約在國慶日肩並肩睇煙花,互望勁sweet。讀者提供圖片

賭王何鴻燊與梁安琪所生、現年24歲的大仔何猷亨,去年7月與無綫小花陳瀅分手,戀情僅維持半年,當時曾有指女方想嫁入何家做豪門新抱而逼婚,不過當事人就否認有此事,雖然分手不再做情侶,但二人有共識地退一步做回朋友。





猷亨與陳瀅在中環ifc的公眾行人天橋與其他市民齊齊逼湊熱鬧。讀者提供圖片



今年7月,陳瀅曾現身灣仔支持猷亨主理的家族樓盤開售項目。資料圖片



猷亨上月選澳門立法會,陳瀅身體力行,穿選舉黃tee在facebook幫手拉票。資料圖片

笑容一致

猷亨與陳瀅分手已一年,其間各自傳出過緋聞,不過二人都依然單身,尚未有另一半。日前,本報讀者目擊二人「合體」,在10月1日的國慶日齊齊度過,讀者張小姐透過《蘋果》「爆相爆片」分享陳瀅與猷亨在中環ifc對出天橋睇國慶煙花滙演的照片。從相片所見,二人與其他市民一齊逼住睇煙花湊熱鬧,而另一張相,猷亨就除下LV外套,手插袋望住陳瀅,而身穿紅格恤衫及黑短裙的陳瀅當時亦望住猷亨,笑容一致,表現甜蜜,張小姐表示:「當時大概9點10分,見到佢哋兩個企喺天橋睇緊煙花,初頭以為得佢哋兩個,原來仲有兩個男性友人,其中一個係外籍人士,佢哋四個人睇咗10分鐘就行番入ifc商場方向。」

記者問到有否見到二人舉止親密?張小姐表示:「佢哋冇親暱動作,唔似情侶,但就有不斷傾偈,同另外兩個朋友都有傾偈。」記者昨日聯絡過猷亨,至截稿時未有回應。



陳瀅(右)與猷亨拍拖期間,獲四太寵愛,搭着膊頭去睇演唱會。資料圖片

幫手拉票

猷亨上月尾在facebook透露去了英國返母校兼公幹,回港後趁國慶假期就相約陳瀅及朋友睇煙花,可見感情相當好。而陳瀅上月尾在一個電影首映時,被問到會否約靚仔睇煙花,當時她表示會與一班靚仔睇,是否暗示猷亨是靚仔不得而知,她亦自爆曾經有一次與男仔去迪士尼睇煙花的浪漫經驗:「因為怕俾人影到,偷偷哋去,有輕微刺激感。」

今次,陳瀅和猷亨明目張膽到中環公眾場所睇煙花,究竟做回朋友定復合確惹人懷疑,不過其實二人分手後一直有保持聯絡。今年7月,四太梁安琪旗下的尚嘉控股在灣仔的壹嘉樓盤開售時,曾有讀者爆料見到陳瀅到示範單位睇樓撐場,當時猷亨都有在場。直至上月,猷亨在澳門選立法會時,陳瀅着住競選團隊的黃tee在facebook貼相高調幫手拉票,二人的感情確實是撲朔迷離。

採訪:唐如




鍾意就快D Share啦!