羅霖(Candy)、筱靖同魏秋樺等，噚晚喺尖沙嘴出席「國際太太選舉」晚宴，Candy已經第五年擔任評審，佢話太太們都好幸福，有老公支持，新一代女性有夢想同目標，好有內涵：「時代唔同咗，依家安全感唔係嚟自丈夫，而係自己經濟獨立同有學識。我唔驚老，因為唔同年齡都有美態，我唯一嘅壓力係單親媽咪，要照顧3個小朋友。」
羅霖透露下個月會拍網絡電影，係王祖藍幫佢接嘅。羅霖去年11月先至宣佈簽祖藍間經理人公司，一年未夠，公司已出現好多人都離開，包括徐簽約五年、一心諗住拍電影嘅徐子珊，另外仲有鄧萃雯、黎瑞恩等。
羅霖亦話：「係呀，好明白公司嘅情況，做藝人同時要兼顧咁多藝人，係有一定難度，我簽嘅時候係想多啲內地發展，係雙向嘅，好彩其他工作我都係自己接，我簽咗一年生一年死，最近都有傾我嘅去向，呢年會更有自由度，會繼續合作。」佢話好友黎瑞恩同鄧萃雯嘅離開，都覺得好可惜，不過都希望佢哋有更好發展。
問到祖藍有冇唔開心？羅霖就話冇事，話對方識得放輕鬆，佢話：「佢身經百戰，希望公司越嚟越好，大家都多啲嘢做。」
至於筱靖就為大會做司儀，提到佢嘅餐廳生意，佢就話：「OK㗎，我媽咪成日話我精神緊張，我成日要睇住電話，會睇住閉路電視，有一次發現有員工睇電話，嬲到喺群組度講。」咁不如拍拖分散注意啦，但筱靖就話：「我嘅快樂唔係建築喺男人身上，係喺生意度。」
相關文章：
【廿個紅星走剩幾多？】徐子珊鄧萃雯同舅父輪住走 王祖藍「經理人之父」夢斷
http://bit.ly/2yi4AD6
| 右圖攝影：羅慧敏 | | |
| | | |
來源 source: http://hk.apple.nextmedia.com
|
鍾意就快D Share啦！
|
|
|