掃呢頁CODE去手機

2017年10月19日 星期四

娛刺撈飯:金剛大花筒 天跌錢落嚟都變窮 __,金剛,

金剛亂花錢嘅惡習真係要戒喇!改得個名叫金剛,就係想自我感覺良好夠架勢,就好似1933年經典電影《金剛》(KingKong)隻黑猩猩攀上帝國大廈一樣,可 ...


金剛亂花錢嘅惡習真係要戒喇!


改得個名叫金剛,就係想自我感覺良好夠架勢,就好似1933年經典電影《金剛》(King Kong)隻黑猩猩攀上帝國大廈一樣,可以君臨天下,未見人已先聲奪人,咪就係霸氣囉!原名李信樵嘅金剛一早就虛擬自己做King Kong,憑一口搵翻譯都聽唔明嘅廣東話殺出條血路,但一朝得志,買衫買鞋無的放矢,養成敗家惡習。

諷刺係真正嘅金剛(猩猩嗰隻)唔使着衫都已傲視曼哈頓,點解李信樵呢隻金剛賺一蚊就使十蚊去裝潢金身? 問題在於佢太狹視喺自我虛擬世界,學金剛用唔鹹唔淡嘅廣東話話齋:「禾(我)最鍾意作(着)靚生(衫)!」佢揮霍程度,連緋聞女友小儀都不禁搖頭嘆息:「佢真係好大使,唔貴唔買,好似佢買條運動褲,話唔貴着唔慣,佢話貪條褲頭帶夠柔軟、夠幼,仲畀我睇咁話『係Made In Italee(Italy)!』」

風光時月賺200萬

金剛當年真係搵到食㗎,憑佢搞笑功力,加上爛做嘅個性,每次節目只要有佢,就連Nuts哥都會坐喺電視機前聽佢「是但噏」當秘笈。隻身從台灣嚟香港嘅佢曾講過,當年月初銀行有80萬,月中又多60萬,月底又多80萬,月入200幾萬, 月月如是,啲錢好似天跌落嚟咁易,喺呢個時候做單純嘅購物狂已經滿足唔到佢,所以成日走去萬歲,有次好友賀軍翔嚟香港,一行四條友走去打邊爐之嘛,埋單盛惠離地價過萬,當時等於食咗一両金落肚,仲要連佢自己都唔知食咗乜。

正所謂節儉係美德、揮霍就敗北,金剛好景時可以有風駛盡,但兜踎時就真係冇風搵鬼理,當佢事業唔多順,一年只接得一個騷咁大把時,本身無綫底薪已唔多,貧賤夫妻百事哀就咁發生,要同女友蕊蕊一人一半租屋住咁冇面,結果咪要同蕊蕊好心分手,點知傷完個心,個身都傷埋,36歲佬乜都冇, 淨係有脂肪肝,男人未老先衰,係女都唔敢埋身啦,所以到依家仲係一支公。

小儀三哥有情有義

Nuts哥都話種咩因得咩果,當年佢食客三千,豪氣干雲, 對朋友水裏水裏去,火裏火裏去,你有難,就睇到邊啲係真朋友。呢三年金剛幾乎食穀種,好彩有三哥苗僑偉伸出援手,借錢畀佢渡過難關;小儀把口就鬧佢洗腳唔抹腳,但見金剛肚餓仲請佢食好多餐好西,講真,好多人大難臨頭真係會各自飛,金剛遇到呢啲真朋友,仲唔滴水之恩湧泉相報咩?

依家金剛離開無綫簽咗新公司向外闖,係時間改變一下自己再殺出條血路。橫豎膠劇膠電影一籮,電影公司倒不如諗吓搵佢拍套《金剛King Kong》,金剛吊吊揈化身大猩猩爬上ifc勇救恩人三哥同小儀,夠晒溫情又有意義;又或者再Cult啲,拍套《金剛大戰金正恩》勇救地球,但最緊要係唔好搵人幫佢配音,因為大家都想聽到金剛講:「禾( 我) 係跟( 金) 奸(剛),禾(我)胡(唔) 依(一)定要作(着)靚生(衫)!」

----------------------------

東網巨星開咗ig喇,大家快啲follow

https://goo.gl/KGuo2N


來源 source: http://hk.on.cc
鍾意就快D Share啦!