點解香港嘅的士唔可以用八達通？
又正如，點解紅館個唱嘅飛唔可以用實名制？
楊千嬅紅館個唱再加開四場，噚日開售，話咁快就賣晒，但電話打唔通，server上唔到——但係呢個都唔係重點，重點係嗰個三面台絕望座位表。表面上hold飛係少咗，但依然係黑麻麻一片，所以話咁快又賣晒。(新聞連結: http://bit.ly/2xpK1ES )
噚日係星期五，中秋節補假翌日已經冇乜mood開工，但一樣冒死喺公司一大早上網撲飛，可惜……買唔到。電話打足200次冇次打通，server一早就死咗，人肉去到場，sorry，南亞黨早過你。仲要係本身主辦商已經hold咗七成飛，fans可以點？
千嬅知唔知？
千嬅噚晚臨12點喺fb出post本想安慰及答謝fans，一班愛錫千嬅十幾廿年嘅忠實歌迷，都係忍唔住，紛紛留言：「再加又如何？加多十場內部咪認購多十場，有分別咩？試問有邊個夠膽得罪贊助商？我最嬲係究竟千嬅明唔明白？咁多留言投訴，佢都只仲係以為只係排唔到隊或線路繁忙咁簡單？以佢地位，可唔可以出吓聲為支持佢嘅歌迷爭取吓？不過我已經預備買黃牛，想睇冇辦法。」
今午近五時，千嬅所屬嘅寰亞發聲明，宣佈再加場，加開12月27至28日兩場。
聲明稱，千嬅已即時向公司爭取，將內部認購的門票扣減，以增加公開發售的門票數量，希望fans能買到今次演唱會的門票。
點解可以咁快決定到加場？係咪一早預咗？
其實12月27、28號呢兩日，原本打算係俾千嬅稍作休息，依家千嬅取消休假，直踩到尾。
千嬅與公司商量後決定加開12月27-28日2場，答謝追隨佢咁多年嘅fans。而今次加開之門票，聲明稱「主辦單位亦盡最大努力提供更多門票讓Fans購買」。據知，呢兩場放番出嚟嘅飛，每場有近7成。
講真，千嬅開三面台，每場少四千個位，又要還飛債又要俾贊助商，惟有八場狂hold飛。飛債還完，依家加開兩場，照理係可以「鬆動番啲」，放番多啲飛公開發售。至於今次咁突然宣佈再加場係surprise定係一早預咗嘅宣傳招數，要問千嬅。
千嬅嘅《三二一Go！》演唱會，由12月23日至26日，日前記者會宣佈加開29日至2018年1月1日，期間有兩日即27至28日供千嬅休息，如今取消休假，換言之將連續十日演出。
|
鍾意就快D Share啦！
|
|
|
