好彩個人冇事咋！
藝人張繼聰嘅搞笑形象深入民心，但佢竟然發生交通事故亦從容不迫，仲識拍片自嘲一番。佢喺社交網上載咗條段片，佢話：「你知唔知一個太正直，唔識轉彎嘅後果係點呀？係會聽到『嘭』一聲。」然後張繼聰將鏡頭影住自己嘅座駕，見到右邊車呔位置刮花咗，仲甩咗一半「輪拱」出嚟。
手執殘骸拍片
之後，張繼聰就手執住件「輪拱」繼續講嘢，佢話：「喺我執番呢個『殘骸』嘅時候，有一個婆婆望住我，佢好崇拜我，因為佢應該未見過一個人咁樣入一個彎。喺呢個時候，有一對情侶好禮貌咁問我可唔可以影合照，我話可以，不過我發現我塞咗成個停車場，所以跟住我就走咗。」
求網民畀Dislike
一臉認真嘅張繼聰又話：「如果呢單嘢可以引起你嘅共鳴，同埋令到你嘲笑我，我都好開心，請你留個言畀我吖！」然後做咗一個手指公向地嘅手勢。網民都表示好擔心佢，但又見到咁幽默嘅片，話唔知畀咩留言佢。
座駕轉彎不慎撞牆
之後，東網聯絡到阿聰，佢回覆謂：「唔係撞車，轉彎時候揩花啫！試吓邊樣硬啲啫，我依家試到牆硬啲，OK冇乜嘢，好小事。係諗住呢啲事搞吓笑氹吓大家開心啫，揩花咗架車就好似唔知嗰啲咩座咩座流星雨咁，幾年先會出現一次。」
來源 source: http://hk.on.cc
|
鍾意就快D Share啦！
|
|
|
