現年89歲的香港首富李嘉誠，咸豐年前做過馬主，在港養過「信心」、「金榜題名」、「三甲」等駒。
自「三甲」於1983年最後一次出賽後以來，誠哥已經30幾年冇再養馬，近十幾廿年更幾乎絕跡馬場。今日（29日）這位千億稀客，突然現身快活谷日賽，仲帶埋孫女到場，即時成為各方焦點。
誠哥全日都冇在場內高姿態露面，只在廂房食飯睇跑馬，可謂行事低調。
原來呢位香港首富係俾面朋友，須知這天快活谷第五場上演香港鄉村俱樂部挑戰盃，名人何世柱、商舖業老手兼馬會遴選會員任永賢，邀請誠哥呢位老朋友到場吹水兼睇跑馬，而誠哥不但俾面出席，而且帶埋孫女（其長子李澤鉅的女兒）到場，同一眾世叔伯見面，一干人等仲合照留念。
李澤鉅和太太王儷橋育有三女一子，子女們向來甚少曝光。資料顯示其次女及三女均不足18歲，而快活谷馬場在賽日不准18歲以下人士進入，故圖中少女極有可能係年約21歲的李澤鉅長女李燕寧，後者已亭亭玉立，且與媽媽王儷橋有八、九分相似，深得誠哥痛錫。
來源 source: http://hk.apple.nextmedia.com
|
鍾意就快D Share啦！
|
|
|