即上英超刨績王：http://win.on.cc/epl
【全場完】哈特斯菲爾德 2:1 曼聯
曼聯面對升班球隊哈特斯菲爾德，對手近況曳到爆，點睇都應該曼聯秤先，但今仗紅魔發揮一般兼唔夠集中，上半場先失1球後仲唔知死，跟手有代替受傷菲爾鍾斯上陣嘅連迪路夫，漏頂犯小學雞錯誤，5分鐘內輸2球落後到0:2，令球隊非常難踢。下半場領隊莫連奴，換入拉舒福特同米希達利恩，一路壓住主隊嚟打，終於77分鐘憑福仔入番粒。其後曼聯雖然繼續轟炸哈軍，但始終未能再度入波，哈軍爆大冷以2:1擊敗曼聯，呢場亦係曼聯本季首次輸波。
【23:36】
77分鐘，福仔接應盧卡古傳送近門頂入，紅魔追番一粒喇！
【23:35】
76分鐘，曼聯靴里拉近門一頂睇怕入硬，點知畀主隊門將神救，曼聯仲係輸緊2粒
【23:04】
下半場開波，曼聯領隊莫連奴，換入拉舒福特同米希達利恩，換走桑馬達同安東尼馬迪爾
【22:50】【上半場完】哈特斯菲爾德 2:0 曼聯
紅魔鬼今仗作客升班球隊，領隊莫連奴半輪換唔係唔合理，但班波踢落冇乜火氣，爭勝決心比唔上對手，最大鑊係失守之後，火速因為連迪路夫犯錯而輸多球，對士氣堅有影響。完半場前馬迪近射又唔中龍，半場落後2球，希望換邊後會有失改善。
【22:48】
曼聯圍攻對手，上半場補時階段尼曼查馬迪左腳一抽，僅僅柱邊出界
【22:33】哈特斯菲爾德 2:0 曼聯
曼聯火速輸多粒，哈特斯菲爾德門將大腳開出，連迪路夫頂漏，哈軍湯馬士恩斯射爆曼聯大門，紅魔大劑！
【22:28】哈特斯菲爾德 1:0 曼聯
阿倫穆爾引球出擊，交畀湯馬士恩斯施射，迪基亞救出不遠，阿倫穆爾快腳補中，哈特斯菲爾德領先1:0。
【22:10】
開波僅10分鐘，曼聯嘅安東尼馬迪爾、哈特斯菲爾德嘅基斯杜化舒捷拿及湯史密夫已食咗黃牌。
【21:38】曼聯作客哈特斯菲爾德，桑馬達、安東尼馬迪爾、連格正選，支援鋒霸盧卡古攻堅
哈特斯菲爾德正選陣容
門將：1祖拿斯盧素
後衞：2湯史密夫、25真卡佐真遜、26基斯杜化舒捷拿、15基斯路維
防中：19丹尼爾威廉斯、6莊拿芬賀治
中場：22湯馬士恩斯、10阿倫穆爾、22湯馬士恩斯
前鋒：20迪普特列
曼聯正選陣容
門將：1迪基亞
後衞：25路爾斯華倫西亞、4菲爾鍾斯、12基斯史摩寧、18艾舒利楊格
防中：21安達靴里拉、31尼曼查馬迪
中場：14連格、8桑馬達、11安東尼馬迪爾
前鋒：9盧卡古
【21:25】車路士 4:2 屈福特
屈仔後防玩高章波，巴舒亞伊補時禁區內入多粒，梅開二度射成4:2！
【21:17】車路士 3:2 屈福特
87分鐘車仔熱血反先！韋利安右路傳中，艾斯派古達近門頂入，反先3:2！
【20:12】
82分鐘，車仔罰球勁有心思，細細力質入禁區，巴舒亞伊轉身勁射近柱，僅僅高出！
【21:01】車路士 2:2 屈福特
71分鐘車仔扳平呀，巴舒亞伊接應右路傳中，楔前頭槌靚頂破網，2:2呀！
【20:44】
54分鐘，屈仔李察利臣於六碼點空晒，一頂睇怕入硬，點知龍都唔中，車仔有運呀！
【20:39】車路士 1:2 屈福特
車仔大鑊輸多粒！49分鐘車仔禁區亂過亂世佳人，羅拔圖佩雷拉右路空晒一抽入網，領先2:1！
【20:20】【半場完】車路士 1:1 屈福特
車仔於聯賽2連敗後，今仗主場出擊好有信心，班波步頭好爽，勁有侵略性，其中柏度仲有神來之筆，嚟個右腳彎射中遠柱彈入，堅係世界級金球。雖然早早落後，但屈福特於領隊馬高施華調教下進步神速，班波搓波、攻守控制都極佳，最終去到補時扳平，非常合理。
【20:18】車路士 1:1 屈福特
補時階段車仔失守，右路界外球掟入禁區造成混亂，杜哥利右腳腳趾尾拉西近柱入網，屈仔1:1呀！
【20:12】
40分鐘，法比加斯禁區外整個冷箭，但畀客軍門將撲出
【20:02】
屈仔班波勁韌，湯卡華利左路罰球射近柱有功架，但過唔到高圖爾斯
【20:01】
30分鐘車仔爭啲入靚波，大衞雷斯禁區外右腳第一時間撞射，可惜角度太正被救出
【19:47】
車路士差啲入多粒，法比加斯右路空晒，單對單面對門將竟然玩嘢，細細力「唧」高皮球，點知畀靴里奴高美斯撲走。
【19:42】 車路士1:0屈福特
車路士右路開出短角球，夏薩特近底線轉波出禁區外，柏度洛迪古斯第一時間趟射出碧咸「七旋斬」式射波，皮球直飛左邊撞柱入網。
【19:34】
車屈戰開波喇，屈仔雖然作客，但搓得勁爽，角球斬入禁區都好有威脅！
【18:35】頭場車路士對屈福特有陣！車仔領隊干地，今仗派出強陣喪攻對手搶3分，夏薩特、莫拉達同柏度洛迪古斯全部正選，而屈仔近期紅人李察利臣亦都首發落場。
車路士正選陣容
門將：13泰拔高圖爾斯
後衞：2魯迪格、30大衞雷斯、24加利卡希爾
中場：28艾斯派古達、4法比加斯、14泰莫爾巴卡約高、3馬高斯阿朗素
前鋒：11柏度洛迪古斯、9艾華路莫拉達、10夏薩特
屈福特正選陣容
門將：1靴里奴高美斯
後衞：6馬里亞柏、27基斯甸卡巴些利、3比圖斯
中場：21基高費文尼亞、8湯卡華利、16杜哥利、25賀利巴斯
攻中：37羅拔圖佩雷拉、11李察利臣
前鋒：9迪尼
星期六晚，梗係又有英超睇啦，今次「英超Live」，將會同大家緊貼車路士主場對屈福特，以及曼聯作客哈特斯菲爾德兩場賽事。車仔呢期陷入小低潮，英超連敗2場，剛啱歐聯主場對羅馬，贏住2球都爭啲畀對手反勝，睇到尼高路簡迪受傷缺陣，對車仔堅造成唔細打擊，今次對住硬淨嘅屈福特，唔知可唔可以止跌回升呢？
另外一場紅魔作客哈軍，曼聯近2戰分別摸和利物浦，以及歐聯1:0小勝賓菲加，2場先入到1球，個入球仲係對手門將送禮添，球迷梗係希望盧卡古着番對射門鞋，入多2粒嚟睇
東網體育同你追實體壇每個精彩時刻！
http://bit.ly/2ecTF2A
|
鍾意就快D Share啦！
|
|
|