謝安琪推Job失百萬 秋後復工追數
中秋佳節，人月兩團圓。身在內地拍戲的張繼聰昨日專程返港，與太太謝安琪及一對寶貝子女共度中秋。首次參加「中秋P」的幼女張靖玩「快閃」，出巡十分鐘便急急回宮！全職湊女的謝安琪積極收身準備復工，自言為湊女推掉不少廣告及商演，損失逾百萬厚酬！
自今年3月誕下女兒張靖（Karina）後，歌手謝安琪（Kay）一直深居簡出，專心照顧子女，搵奶粉錢重任全交由丈夫張繼聰，而工作多到冇停手的阿聰亦不負所託，8月時更以千萬酬勞加盟蕭定一旗下。前晚迎月夜，老公不在身邊的Kay帶同一對仔女參加由屋苑所舉行的中秋派對，焦點所在當然是小女王Karina，但首次去「中秋P」的Karina出巡只有10分鐘，便要急急回宮！
「價錢比生BB前仲高！」
Kay在社交網分享一家三口參加派對的照片，並留言「爆料」指Karina本來「腳仔撐撐有啲威勢」，但因很多鄰居上前打招呼及合照，Karina見群情洶湧便開始喊，最後惟有留下兒子跟鄰居繼續玩樂，兩母女急急腳先返家！相中的Karina受驚後一臉楚楚可憐，眼濕濕兼嘴扁扁，獲不少網民讚她可愛！
Kay昨日接受本報電話訪問時笑言不想難為女兒，見她喊便離開：「鄰居見到佢都哄埋去話：『喂！你成個張繼聰咁嘅？』佢係怕醜，因為開始認人，有人話咁反而係聰明，證明佢開始諗嘢識認人。」她又指雖愛吃月餅，但為減肥而盡量忍口：「當係試食咁用牙籤拮住、食一個手指尾咁細！因為坐月時補得太勁，搞到自己變肥寶寶，依家同標準體重爭10幾磅！我肥極都面尖尖呃到人，但個肚皮仔要加油，朝朝跑步！（趕住復工？）生完想重整吓，嚟個乾坤大挪移，借呢個機會認真做運動，人生Fit一次！」
現做全職媽媽的Kay表示由懷孕至今，一直獲不少商演及廣告商以甘詞厚幣力邀，為湊女至今已推掉至少七位數字收入，認真肉痛，又透露最快兩個月後正式復工，她說：「日日都有好多（邀請），唔係講笑！佢哋透過Facebook、Email等渠道，無孔不入咁搵我，價錢比生BB前仲高，可能大家少見咗我，願意付出好多，有時諗係咁推都肉赤！有啲我推咗三、四次，但佢哋係咁Keep住問我幾時可以。（推咗七位數？）嘩！真係有！之前有人搵我影嘢，但唔啱時候，因為餵人奶、補身補到脹卜卜。拍廣告嘅話，最快都要一、兩個月之後。（價高者得？）睇誠意同質素多啲。」
阿聰撲返港 護「前世情人」
至於張繼聰昨日凌晨5時許趕返香港開工，晚上便與家人歡度中秋節，並在寓所內影全家福，牆上貼滿子女成長照片，非常溫馨！對於Karina現身「中秋P」玩得僅10分鐘，他說：「一定會有怕生保嘅過程，女仔有啲矜持係好！唔好邊個埋嚟都無任歡迎，男仔可以開朗啲。下次唔使驚，爸爸保護佢！囡囡好黐我，終於明白『前世情人』呢句說話。今晚除咗同老婆浪漫食飯，都要同囡囡慶祝中秋，嚟緊呢兩個月都係兩部電影疊住，中港兩地走。」
採：音樂組
文：專案組
|
鍾意就快D Share啦！
|
|
|
