掃呢頁CODE去手機

2017年11月2日 星期四

唔理阿媽反對 林珊珊細女降服崔建邦等嫁 [壹週刊 - 1443] __,珊珊,崔建邦,林珊珊,M1,

林珊珊知道阿女同崔建邦有結婚計劃,即出招阻止。探熱針唔理阿媽反對 林珊珊細女降服崔建邦等嫁現年38歲的崔建邦情史厚過電話簿,一向花心的他上年與「翻版吳 ...






林珊珊知道阿女同崔建邦有結婚計劃,即出招阻止。

探熱針

唔理阿媽反對 林珊珊細女降服崔建邦等嫁

現年 38歲的崔建邦情史厚過電話簿,一向花心的他上年與「翻版吳千語」陳嘉莉拍拖期間,背住女友暗撻林珊珊細女李怡(野人)搞到二人分手收場,野人被指是「小三」,錫到個女燶的林珊珊當然有微言,但眼見阿女拍拖拍得咁開心惟有無奈接受。

由「小三」躍進為正印,野人同崔建邦拍拖短短一年多已經光速發展至同居關係,放晒口風想喺三十歲前嫁人的她原來已經同男友有晒結婚計劃,但珊珊明知男方有前科,怕阿女嫁錯人即出招落閘阻婚,但女大女世界,有啲嘢真係阻都阻唔住!

早前,崔建邦同野人就現身西貢拍拖,崔建邦對女友體貼入微,更暖男上身幫女友夾餸兼做柴可夫,睇嚟野人已經成功降服「花心男」!

疑做小三

出名花心的崔建邦,○五年開始同唐詩詠秘密拍拖,拖拉多年,試過背住詩詠暗交中巴鄺敏慧,○九年涉嫌襲擊中巴鬧上差館,打女人令其形象插水,原本事業如日方中嘅佢因為呢件事俾大台下令停工,搞到要由九千月薪 PA做起。經過幾年努力工作洗底,終於有機會重返幕前,不過江山易改本性難移,上年崔建邦又被爆一腳踏兩船,背住正印陳嘉莉偷嗒林珊珊細女李怡(野人)。事後,野人更被翻舊賬!指當年曾經硬撬黃泆潼男友、組合廿四味成員阿肥,野人似乎係小三慣匪!

「嗰陣野人啱啱同拍咗拖好多年嘅廿四味成員阿肥分手,心靈空虛嘅佢無耐就喺朋友聚會度識咗 Amigo(崔建邦),兩個第一次見已經好啱傾,成晚雞啄唔斷咁, Amigo同我哋講話野人做能量治療師,又係瑜伽教練,覺得呢個女仔同佢好夾,俾到好多正能量佢!可能撞啱 Amigo嗰陣成日同女朋友嗌交,兩顆寂寞的心互相慰藉,好快就撻着咗!」野人身邊好友透露。





上年初, Amigo曾背住有「翻版千語」之稱的陳嘉莉( Kelly)搭上林珊珊細女野人。







%早前 Amigo一支公去行街,見佢凸晒腩,睇來拍拖令佢心廣體胖。





陳嘉莉( Kelly)

西貢拍拖

雖然背負住「小三」之名,但戀愛大過天的野人就完全唔介意其他人點睇,就連媽咪林珊珊都無得管!同崔建邦拍拖無耐已經發展到在男方飛鵝山寓所同居,成功入屋做「正印」,二人仲經常孖咇出巡,鬼死咁 sweet!

早前,崔建邦車住女友去西貢拍拖,在海邊談心漫步吹海風,其間崔建邦發揮佢開籠雀搞笑本色不停講笑氹女友開心,情到濃時野人情不自禁肉緊狂搓男友的手臂,向男友發嗲功,好鬼煙韌!行到攰時,崔建邦帶女友去「睇」海鮮,專家上身咁教女友揀海鮮,之後轉戰附近餐廳醫肚。晚餐期間,崔建邦廿四孝男友上身幫女友夾餸,你一啖我一啖不停向旁人大放閃光彈!撐完枱腳就做「柴可夫」車住女友齊齊返歸!





崔建邦細心教女友揀海鮮。





睇完海鮮,二人轉場去附近餐廳醫肚。





崔建邦做廿四孝男友,主動夾餸俾女友。





主動斟茶服侍女友。





醫飽肚, Amigo做「柴可夫」,車野人齊齊返屋企。

有結婚計劃

林珊珊早年離婚,單親家庭長大的野人並無影響她對婚姻嘅憧憬,前男友阿肥未玩夠唔想結婚,恨嫁的野人即刻絕情斬纜,情願回復單身都唔想被人拖住!而經歷過無數次離離合合嘅崔建邦近年終於浪子回頭,想置番頭家!

「野人一直都好想結婚,生小朋友有自己家庭,而 Amigo就捉到晒路,追佢嗰陣第一樣嘢就係表示自己已經玩夠想定落嚟,令情場浪子泊岸歸家相信係好多女人嘅夢想,野人都唔例外!所以佢好快就應承 Amigo同佢同居試婚, Amigo同我哋講今次真係認真嘅,因為野人俾到佢前所未有嘅安心感覺,覺得野人就係佢嘅 TheOne,所以想喺野人三十歲之前娶佢,俾佢一個家!」野人身邊人說。





性格豪放的野人曾經同廿四味成員阿肥拍拖,可惜男方一直唔肯結婚,最後分手收場。





生於演藝世家的野人沒有打算入行,近年她身兼能量治療師及瑜伽導師。





野人明知媽咪林珊珊對 Amigo有微言,所以家庭聚會都無「攜眷出席」,相反家姐西瓜(紅圈)就成日帶埋男朋友見家長。

林珊珊反對

不過見慣風浪的林珊珊,眼見崔建邦個底咁花,梗係唔 likey!當日一知道阿囡同佢拍拖就即刻好有意見,表明唔想崔建邦做佢女婿!明知阿媽唔鍾意,所以拍拖年幾以來一直都唔敢帶男友見家長,相反其胞姊李澄(西瓜)就成日帶同做 DJ嘅男朋友出席家庭聚會。「林珊珊知道個女咁大個,冇得阻止佢同邊個拍拖,本身覺得個女後生可以等佢自己慢慢揀,相處得耐就知崔建邦唔適合自己唔係佢嗰類人,但當佢知道阿女同 Amigo已經有結婚打算嘅時候簡直唔敢相信!不停咁叫佢身邊啲朋友勸佢諗清楚,唔好一時衝動做錯決定誤咗自己一生!」知情人士透露。





熱愛打拳的崔建邦同女友都係運動愛好者。





因為溝女令事業跌落谷底的 Amigo,近年努力洗底後,終於有機會重返幕前拍劇。





自從唐詩詠同洪永城分手, Amigo隨即活躍喺舊愛詩詠 IG留言搭訕。

撰文:攝影:娛樂組


鍾意就快D Share啦!