掃呢頁CODE去手機

2017年11月2日 星期四

力撐林鄭前競選辦公關被窒 [壹週刊 - 1443] __,M1,

林鄭請年輕人加入改組後嘅中央政策組,月薪介乎三萬至九萬五千蚊,唔知會吸引幾多人應徵?八卦陣力撐林鄭前競選辦公關被窒上星期政府登廣告,請年輕人加入改組後 ...






林鄭請年輕人加入改組後嘅中央政策組,月薪介乎三萬至九萬五千蚊,唔知會吸引幾多人應徵?

八卦陣

力撐林鄭前競選辦公關被窒

上星期政府登廣告,請年輕人加入改組後嘅中央政策組做政策研究,本土研究所成員陳劍青一早話明唔會應徵,仲喺 fb話好多青年想上位都會仆去報,尤其係「玩『策掂』之類嘅政治吸納組織」,然後話要將青年訴求帶入政府,其實係俾政府借青年人把口宣傳林鄭政策。

相信佢所指嘅,係舉辦過「策掂──傑出政策人大賽」政策倡議比賽嘅組織「為正策士」。呢個組織嘅召集人陸瀚民,做過林鄭競選辦公關。《壹》仔報導過,林鄭鼓勵青年參政嘅政綱,疑似係抄「策掂」比賽嘅作品。

陸瀚民似乎對號入座,喺陳劍青 fb留言話○三年嗰陣,青年人仍然被歸類為「政治冷感」,當時已經有前輩爭取將青年聲音帶入政府,又話十幾年後,政府請年輕人由非政務官系統進入政府做政策統籌,「未嘗唔係走出一小步」喎。之後佢不忘 sell吓自己組織,同邀請陳劍青傾吓偈。

陳劍青就反擊,話青年人一直都有表達意見,每任政府都話會聽佢哋意見,但政府聽唔聽、青年有冇得話事先係關鍵,以一句「交流冇問題,交完同冇交冇分別,咁交嚟做乜?」結束呢回合。

陳劍青心水清,事關陸瀚民之後冇再留言,交流完真係好似冇交過。到時加入新中策組嘅年輕人,會唔會都係咁?







陸瀚民留言指政府今次走出一小步,被陳劍青留言反擊,指政府係咪會聽青年人意見,以及青年有冇話事權先係關鍵。





「為正策士」召集人陸瀚民(左)曾經係林鄭競選辦嘅公關團隊成員。(陸瀚民 Facebook圖片)





陳劍青表明唔會加入新中策組,話唔少提倡走入體制嘅同輩成為其一部分,冇推動絲毫改變。

羅冠聰保釋踢波被隊友感動

香港眾志羅冠聰同黃之鋒,因為三年前發起重奪公民廣場而入獄,最近獲准保釋等候上訴。佢哋重獲自由之後,除咗第二日上電台分享獄中點滴,仲各有各精彩。其中羅冠聰就同班波友去踢波,隊友仲送咗隻最新嘅遊戲《 FIFA18》賀一賀佢,令佢「好滾動」。

羅冠聰喺 fb分享話,保釋後唔想頻撲應酬,因為佢欠最多嘅係親友,所以呢段時間會以佢哋為先,仲話:「誰都不是鐵人,監獄外的生活都需要時間適應。」輕咗三公斤嘅佢仲同「黑浪明星足球隊」班波友去踢波,有波入之餘,仲有禮物收添,網友們都叫佢好好享受吓。

至於之鋒離開監獄第一晚,就同父母、女友食團圓飯,佢講明希望未來兩星期可以不斷「食食食」,仲即刻玩入獄前新買嘅 PS4。抗爭以外,男生們似乎都離不開打機同踢波。不過輕鬆完,佢兩個就要重新出發,面對之後嘅審訊。





羅冠聰入獄一排出番嚟,體能似乎相當唔錯。(黑浪明星足球隊 facebook圖片)





暫時獲釋嘅羅冠聰,梗係出去鬆一鬆,當晚佢有波踢又有波入,隊友仲送咗隻 FIFA18賀一賀佢,令佢「好滾動」。(黑浪明星足球隊 facebook圖片)





羅冠聰(右)同黃之鋒(左)暫時重獲自由,可以輕鬆一下。不過十一月七日又要上庭,到終審法院申請上訴許可。

葉劉遲到黑面田二少滿場飛

新民黨主席葉劉淑儀最近宣布,唔會參加山頂區議會補選,因為黨內領導層認為佢依家嘅立法會同行會工作繁重,唔夠時間準備選舉,所以唔適合參選。葉劉即使公務繁忙,但上星期四都抽空出席海關一個典禮,不過就似乎不愉快收場。

話說當晚大會請咗好多嘉賓,包括立法會前主席曾鈺成、立法會議員田北辰同葉劉等等,海關關長鄧以海( Hermes)都有上台發言,嘉賓獲安排到台上排排坐,但葉劉一直未見影。當其他嘉賓就座晒之後,葉劉先至現身,最終被安排坐最側邊嘅位置。

葉劉於是問咗句:「吓,我要坐側邊呀?」但都冇計調唔到位,佢只好無奈咁坐低,之後全程臉帶不滿又嘴藐藐咁款。至於早過葉劉到場嘅田二少同曾鈺成,就獲安排坐較中間嘅位置。田二少喺台上活動完咗之後,仲滿場飛同人吹水飲嘢。

至於接替鄧忍光出任海關關長嘅 Hermes,係十八年來首位內部晉升嘅關長,扭轉以往由政務官空降做關長嘅做法。《壹》仔聽聞海關上下都好歡迎佢,覺得佢夠親民。有參加典禮人士仲話,上屆同一個典禮,身為關長嘅鄧忍光,都冇獲邀出席。





葉劉因為遲到,被迫要坐喺最旁邊嘅位置,佢似乎唔太滿意呢個安排。





準時到場嘅田二少,當日心情唔錯,仲滿場飛同人吹水飲嘢。

謠傳梁耀忠旺角掟磚





梁耀忠被指「佔中、掟磚、反政府」,謠言呢啲嘢,真係乜都有可能。

從政者遇上流言中傷都幾平常,不過有時啲流言真係奇怪到冇朋友。早前有街工幹事喺天水圍聽到流言,聲稱梁耀忠「佔中、掟磚、反政府」,其中「掟磚」相信係講緊參與旺角騷亂。

《壹》仔問過聽到呢個謠言嘅街工幹事何惠彬,佢話上星期三喺街工一個活動上,從街坊口中聽到有人話阿忠「佔中、掟磚、反政府」,唔好去搵街工咁話。佢反駁指阿忠性格穩陣沉着,冇可能走去掟磚,亦唔係完全同政府冇偈傾,又話自從街工喺天水圍開展地區工作後,開始聽到呢類流言。

其實阿忠同雨傘革命、旺角騷亂嘅關係的確唔深,同屬街工嘅區議員黃潤達都喺 fb話,阿忠有參與佔中,不過多數喺後方支援,亦冇掟磚。阿忠都曾經被影到喺佔旺清場期間,現身西洋菜街,被警員要求離開。

撰文:巫不言


鍾意就快D Share啦!