尋晚係無綫台慶嘅大日子，一班小生花旦盛裝打扮，當中唔少女星仲「胸」群而出，風騷晒事業線，令一班雄性動物目不暇給、流晒鼻血。之不過你有你晒胸，我有我「天然呆」，馬國明孖林盛斌（Bob）喺台慶表演趣劇，期間馬國明重現招牌動作「天然呆」，仲被迫咀嘴Bob，難怪成功搶FO！
估唔到馬國明嘅「天然呆」仲延伸至舞技上，尋晚佢連同一眾小生跳舞慶賀，仲齊齊以西裝Look上陣型到爆，點知就有姿勢冇實際。皆因馬國明頻頻甩舞步，相當突出！事後馬國明都有解畫指唔夠時間綵排，自認冇跳舞天分嘅佢仲話畀人笑冇所謂，當娛樂吓大家。呢個高EQ嘅言論獲網民一致好評，大家仲為咗維護馬國明嘅男神形象，紛紛勸佢唔好再表演跳舞，笑言：「馬國明都係啱做戲多啲！」
唔好以為馬國明謙虛先認唔識跳舞，其實佢好老實就真！有眼利嘅網民仲發現佢早於2004年亦試過表演跳舞，當年佢同林峯、黃宗澤及吳卓羲等組成「奧運六星」，喺台上邊跳舞邊唱歌曲《遇強愈勇》。雖然舞步嘅難度唔高，只係左郁右郁，但馬國明都跳到左右唔協調，仲頻頻偷望其他人點跳，明顯唔熟舞步，可以跳成咁都幾高難度。呢次表演同樣為觀眾帶來無限歡樂，有網民留言話依家睇番都覺得搞笑，仲笑言馬國明份人好專一，所以啲舞技咁多年嚟都冇進步。
不過唔緊要啦，有心穎BB呵番，仲有邊度跌低就邊度起番身，下年再挑戰跳舞，等你呀馬國明！
網民有話兒：
MySnoXXX：馬明幾專一，由始至終都唔叻跳舞。
X敬亭：依家睇番仲係覺得個舞步好搞笑！
XXuyThXX：馬明都係啱做戲多啲！
ConXXXLeung：其實首歌唔錯，舞步就算啦......
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|
