余德丞同港姐 Tiffany銅鑼灣街頭撞到正，老友鬼鬼的二人即時企街吹足半粒鐘。
探熱針
港姐收割器 巨胸余德丞原來係有錢仔
憑 42吋巨胸在台慶劇《誇世代》跑出的余德丞（ Dickson），陽光外形加上一副健碩 body，殺死唔少少女，而且他更成為「搶手貨」，不少監製爭住用人，貪佢睇得又 talk得！
有樣有胸肌，余德丞自然多女埋身，除了之前同拍檔麥明詩行得好埋之外，日前仲喺銅鑼灣撞到又係港姐出身的劉穎鏇（ Tiffany），余德丞即刻吹神上身，吹足半個鐘，其間更逗得 Tiffany笑到見牙唔見眼，新一代港姐殺手當之無愧！
港姐殺手
余德丞在台慶劇《誇世代》中半裸晒四十二吋胸肌而成為網民熱話，更封他為「巨胸小鮮肉」，早前跟劇中「女友」麥明詩疑似假戲真做傳出緋聞，雖然二人話冇發展空間，但早前女方生日， Dickson約埋成班劇組人員一齊同佢慶祝生日，大合照更企正喺麥明詩隔籬，無私顯見私！
作為港姐殺手，日前下午余德丞一身頹 look現身銅鑼灣鬧市，其間撞到素顏兼頭戴 cap帽的港姐劉穎鏇（ Tiffany），兩人因為早前一齊去台灣主持過《世界大學生運動會》，因此熟絡，更有消息指余德丞想追女方，所以二人有緣分撞到，即時傾到雞啄唔斷，余德丞更加口水佬上身講到指手畫腳，連冷氣機滴水都能成為二人話題，劉穎鏇亦都俾足反應表現興奮雀躍，兩人企喺街邊吹足半粒鐘才各自離開。
多女埋身
有錢又靚仔自然多女埋身，余德丞當然唔愁無女陪，本刊另一日又發現他現身旺角，身邊有一名少女陪伴，二人在附近搵平民餐廳醫肚，晚飯時間餐廳滿座，為了食心頭好，唔介意眾目睽睽之下排隊等入座，在等食期間，余德丞拎起餐牌左度右度又再度指手畫腳，不停問對方意見。晚飯時，余德丞口水多過浪花同對方喪傾一餐！食足個半鐘才埋單走人，向來紳士的他更主動請客。
同城城係鄰居
迅速曝光，原來余德丞屋企坐擁半億豪宅物業，同天王郭富城是鄰居，不過儘管有先天優厚條件，但據知他非常知慳識儉。早前余德丞跟四名女友人到銅鑼灣購物，行到攰他先陪朋友到便利店買零食，口渴想買飲品，他寧願行多幾步選擇到藥房購買樽裝水，似乎知道藥房樽裝水價錢比便利店便宜，十分精打細算。
「雖然佢屋企有錢，但 Dickson一向都好低調，而且平時見佢都好慳，佢仲成日同我哋講話自己而家收入未算穩定，唔敢做大花筒先使未來錢！」余德丞身邊好友透露。
筍盤小鮮肉
年僅 28歲的余德丞，憑住 42吋胸肌，被封「巨胸小鮮肉」，余德丞出身富貴家庭，父親從事物流，家住二千萬跑馬地豪宅，與天王郭富城做鄰居，早年已與其母共同持有海怡半島市值八百萬物業，全家坐擁近半億資產。
熱愛運動的余德丞曾為香港泳隊代表，出席過澳洲青年奧運會；畢業後，曾於新城電台任 DJ， 14年加入無綫，主持體育及兒童節目，直至去年，被監製陳維冠睇中，有機會演出無綫劇《殭》、《幕後玩家》及《誇世代》，目前開始人氣急增，有樣有身材又有家底，絕對係小鮮肉中的大筍盤。
撰文、攝影：娛樂組
|
鍾意就快D Share啦！
|
|
|
