掃呢頁CODE去手機

2017年12月28日 星期四

半百女星平凡格調 [壹週刊 - 1451] __,M1,

今日嘅王小鳳,望落只係一個平凡師奶。相信八、九十後都想像唔到佢曾經係有豪放女之稱嘅烈女影后。同你吟一吟半百女星平凡格調年過半百嘅女星,雖然未必可以芳華 ...






今日嘅王小鳳,望落只係一個平凡師奶。相信八、九十後都想像唔到佢曾經係有豪放女之稱嘅烈女影后。

同你吟一吟

半百女星平凡格調

年過半百嘅女星,雖然未必可以芳華絕代,但風韻猶存。 55歲嘅上世紀豪放影后王小鳳,與同齡嘅關之琳,加埋六十四歲嘅顧美華,盡管一副平凡師奶仔打扮行街,但骨子裡仍有一份星味,身形更加保持住星級材料。

上世紀豪放女王小鳳童心擺 pose

86年憑電影《錯點鴛鴦》成為金像獎影后,又出過露點寫真,有豪放女之稱嘅王小鳳,廿幾年前結婚生仔長居美國,從此告別性感。

佢嘅豪放成為過去,依家嘅佢變成平凡師奶!最近返港探親,呢日同兩個男親友行街,見到聖誕裝飾就好雀躍咁走埋去影相,又單腳企擺甫士, 55歲仲保持一份童心。

睇佢依家開開心心,但曾經有過一段黑暗歲月。當年婚前婚後有吸毒同酗酒惡習嘅佢, 03年更患上嚴重抑鬱症,有多次自殺傾向。商人老公許立信兩度送佢入美國精神療養院戒毒戒酒,但起初唔領情兼覺得似坐監嘅王小鳳,諗過潛逃返家殺死老公,直至入院十日後先肯面對自己個病,乖乖接受療程,花咗兩年時間逐漸康復。佢感激嗰段日子老公對佢不離不棄,重生嘅王小鳳,亦從此樂做平凡師奶。





見到聖誕裝飾,即雀躍要人揸機幫佢影相,仲單腳擺甫士,好有童心。





八十年代出過露點寫真,是圈中豪放先驅。





王小鳳拍過林正英生前嘅《殭屍先生》系列,飾演女鬼「小玉」而成名。

絕世好 Boss

王小鳳老公許立信,唔只係好老公,亦係絕世好 boss。當年佢公司 eMachines,以 2億 9千萬美元(當時約 22億 5千萬港元)售予著名電腦公司 Gateway,佢撥出純利嘅五成半,分俾 140名員工,平均每人分到 400萬元,呢個闊綽舉動轟動傳媒,成為國際新聞,不過當時未被揭露佢就係王小鳳老公。多年後有人問番王小鳳,佢話:「錢唔係最重要,夠使就得,最緊要做人開心。」

唔行 Elegant關之琳超市散發住家味

做咗幾個世紀「女神」,打扮永遠 elegant(優雅),可能都要搵個位鬆懈一下。見親關之琳,都係艷光四射,手挽名牌袋現身,難得呢日見佢挽住嘅係超市購物籃,效果出奇 refresh!一身 casual wear同阿媽專注入貨。 55歲女神皮膚緊緻、冇驚現雙下巴、身形瘦削,所以呢鋪住家味一樣嗒得杯落。





女神偶爾放下戰鬥格,頭髮蹺起都懶理。





55歲





手挽名牌袋,充滿貴氣嘅之之,睇足幾十年。反而女神回歸凡間行超市,挽嘅係購物籃,夠 refresh!





對住媽咪,半百嘅之之都變番細路女一樣,買乾糧不停問阿媽意見。

64歲顧美華教人遵守交通規則

見到顧美華,八珍實在忍唔住哼幾句《似水流年》歌詞:「外貌早改變,處境都變,情懷未變""」當年行氣質嘅佢,今日六十幾歲,眼力依然好!佢一眼睄到對面馬路有鏡頭,即刻拉住身邊男親友,唔俾佢違規過馬路。雖然顧美華個樣望落有啲憔悴,但高䠷苗條,六十歲人仲係有型有格,氣質原來可以跟一世。





當年佢三十幾歲先出道,拍嚴皓執導嘅《似水流年》,憑住氣質同演技,可以攞到金像獎最佳新演員。





一把年紀依然好眼力,到有鏡頭,佢即刻喝止同行男親友唔好紅燈過馬路。





六十幾歲顧美華,吸引八珍目光嘅唔係個樣,而係佢對修長嘅腳。

撰文:八珍

攝影:李玄


鍾意就快D Share啦!