【俠味道．翁靜晶連載系列之1報恩之謎】翁靜晶花了兩年時間，成功令賬目混亂的大埔定慧寺清盤。現年53歲、被稱為「俠女」的翁靜晶日前接受《蘋果》獨家專訪，分享她的成長經歷，以至和年長30歲的一代宗師劉家良相識、拍拖到結婚的30年經過，又指從劉師傅身上學習到謙卑、俠義精神和處世之道，還有面對生死的樂觀豁達。
翁靜晶於19歲時嫁給比她年長30歲、黃飛鴻第四代弟子劉家良，當年沒有人看好這對忘年戀，翁靜晶曾說過自己前世是一隻金絲雀，被劉家良飼養，今世嫁給他報恩。對於這段往事，翁靜晶日前接受本報專訪時笑說：「呢個係劉師傅個阿媽講嘅，可信性未必咁高。佢話都唔知點解你會鍾意佢，除非你就係嗰隻雀仔變嘅。因為劉師傅細個有隻了哥，行出街撞死咗好傷心，佢阿媽講嚟笑我哋，講講吓變咗真咁樣，可能大家都唔理解點解我咁鍾意佢囉。」
面對生死的豁達
說到和劉師傅相識到育有兩名女兒，彼此情繫差不多30年，直至劉師傅於13年病逝。翁靜晶自小在單親家庭長大，缺乏父母的愛，她拭着淚說：「係劉師傅畀咗家嘅感覺我。」她更表示劉師傅給她最大包容，除了俠義精神，還教她面對生老病死的豁達，翁靜晶說：「佢打咗兩、三支針化療，有次佢同我哋講，洗頭時甩好多頭髮，嚇到洗頭嗰個人手騰腳震。我哋喺啲唔應該笑嘅地方度笑咗，但佢抗癌過程嗰種豁達，令我學咗好多，因為好多時呢啲英雄人物面對生死，未必可以咁輕鬆。」
當年與劉師傅走在一起，翁靜晶已知道他有一妻一妾：「我哋兩個喺條街度撞到，嗰陣時我係好細個，大家第一眼見到已經留下印象，後來去邵氏拍戲再相遇。」翁靜晶笑指：「嗰時我覺得佢幾得意，佢又覺得我幾可愛，好平常嘅吸引就變咗去街，開始談戀愛。」
定情信物芒果樹
現在的藝人有婚外情是大新聞，但翁靜晶稱以前社會跟現在大不同，她說：「以前啲男人係可以三妻四妾，尤其係拍電影嘅人，佢識我嘅時候，已經有兩個老婆，有一個大老婆，同一個妾侍。」她續謂：「𠵱家好似好大件事咁，嗰個年代係好平常，我同劉師傅太太其實幾啱傾，今日我同劉師傅個仔仲係facebook朋友，所以你唔可以用𠵱家嘅價值觀去睇番以前啲嘢。」到84年二人註冊結婚。
劉師傅曾經送了一棵芒果樹給翁靜晶，13年劉師傅病逝後，翁靜晶將亡夫部份骨灰撒在芒果樹的泥土裏作紀念。問到可信有下一世？翁靜晶想一想回答：「唔想呀，唔好再返嚟就最好，但如果再返嚟，就唔係見劉師傅，我返嚟係要肅清啲敗類。」
採訪：嵐山、馮國康、倩宜
|
鍾意就快D Share啦！
|
|
|