掃呢頁CODE去手機

2017年12月11日 星期一

34年來「冇諗過有人等我開騷」吳浩康情歌最煞 淚淹九展 __,浩康,吳浩康,

■吳浩康前晚終於在九展開處男騷,事業曾跌谷底的他全晚喊足五次。現年34歲的吳浩康(Deep)出道15年,他於04年藏毒被捕,事業跌落谷底,前年因背當時 ...




現年34歲的吳浩康(Deep)出道15年,他於04年藏毒被捕,事業跌落谷底,前年因背當時女友鍾舒漫偷食,搞到分手兼形象破產,Deep經過兩年努力前晚終舉行處男騷,獲家人、現任女友Michelle及老闆楊受成撐場,Deep激動爆喊五次淚淹九展:「冇諗過有人等我開騷!」

吳浩康於02年參加無綫「全球華人新秀歌唱大賽總選」獲季軍,跟英皇唱片簽約踏上歌手之路。然而兩年後Deep於街上被警員截查,結果在他的身上搜出0.42克可卡因,被判藏有危險藥物罪名成立,罰款5,000元;前年他與當時女友鍾舒漫到談婚論嫁階段,怎知卻被爆背女友偷食巨胸女,被網民鬧爆是賤男的Deep,再一次親手自毀事業!近年他重新振作,走上街頭busking,終於重獲歌迷欣賞,前晚假九展Star Hall舉行兩場處男騷。



■為了首次個唱,吳浩康特地排舞演出。 ■除了唱歌和彈結他,吳浩康亦表演打鼓晒才藝。 ■吳浩康落台與老闆楊受成(小圖)擁抱時灑淚人前。

憶起亡母

前晚首場「LISTEN TO DEEP Live2017」開鑼,黃依汶跟老公陳國坤、劉浩龍、梁烈唯和洪卓立等捧場,之前Deep在facebook自爆遇「飛機友」被走數,幸獲網友和朋友散飛,前晚入座率接近爆滿。着西裝打煲呔出場的Deep,在高台表演打鼓、彈結他唱《火》,之後在蔡思貝舊愛排舞師麥秋成帶領舞蹈員伴舞下,又唱又跳演繹快歌《感覺蘇豪》,但狀態普通,幸唱飲歌《孩子王》及《棋王》就回復水準。

聽到觀眾的掌聲,Deep卻嫌未夠勁:「我今年34歲,等咗34年就係得咁多掌聲?點解我叫Deep,從小到大得一個願望,想做歌星,唔係歌手,歌手去邊度唱都一樣,歌星要企喺台上,所以我花幾多時間心機,都要企番喺度。好多人話我生性嘅話,十年前已經喺度,我唔知乜嘢timing,𠵱家就係好值得,冇乜嘢好抱怨。多謝大家陪住我走,從來冇諗過有人等我開騷。」

曾經行差踏錯的Deep,爆喊感激家人不離不棄支持,憶及已逝的媽媽時,Deep哽咽說:「幾愛你嘅人都冇理所當然留低陪你、容忍你,重視大家嘅話,就要珍惜眼前人。」他更感激台下的爸爸:「我自己都諗,生咗個仔好似我咁都唔知點,多謝爸爸34年來每晚都同我一齊,冇嫌棄我,自己遇到一啲唔光彩事發生,屋企人都係同一個態度,同一份愛對我。」



■吳浩康曾組樂隊Closer,前晚他與隊友同台夾band。 ■吳浩康女友陪吳父撐場。 ■吳浩康與女友情深抱抱。

攬住女友

最後,握手環節時Deep走落台攬住老闆楊受成喊住致謝,再到女友Michelle面前大唱情歌,他說:「想正式多謝我女友Michelle,呢一年佢好辛苦,好多時佢陪着我東奔西跑,我同佢講我唔知可以做乜嘢,好多謝你陪住我一步一步走落去。」兩人情深抱抱,觀眾拍掌支持。

採訪:卓寶花

攝影:陳俊強




鍾意就快D Share啦!