歌手張敬軒出席《英皇電競菁英盃2017：皇者之路》總決賽，接受訪問時，軒仔透露自己係打機愛好者，最鍾意就係打格鬥遊戲，不過電競就係入門級，更大讚洪卓立（Ken）係公司嘅電競能手，又指電競好講求團隊合作，以前自己係獨行俠，依家上網有團隊，更會約Ken一齊組隊打機。問到有冇廢寢忘餐，軒仔笑言：「一日三餐放晒電腦旁邊，我覺得電競對我嚟講，唔單只係追求分數，係追求個成就感，同埋已經慢慢變成咗一個產業。有奬金又有奬品會，今次呢個活動係想得到更多人關注，因為電競已經變成一項運動。」
軒仔表示上個月以6位數入手了第一批電競設備，因為電競都需要啲行頭，而設備質素都好好，除咗用嚟打電競之外，亦可以用嚟做音樂方面嘅工作。他指電競運動帶動了很多產業，所以會考慮成立一間公司去製作電競音樂，因為外國已經好蓬勃，只係香港比較少人做，更笑言自己係香港第一代做電競配音嘅藝人：「以前有一個遊戲，我就配其中一個角色，全部都係嗰啲，哈！嘻！啊！嗰啲聲。」更會做電競主題曲，因為音樂係帶起遊戲氣氛嘅主要因素，笑言今日嚟係別有用心，希望同老闆楊受成能夠投資電競音樂嘅label。
問到今日軒仔點解唔一齊落場打機，他即笑言現場有咁多高手，費事獻醜，還覺得做新一代嘅藝人難度高咗好多，同埋學好多新嘢，加上自己係與時並進嘅人，都會多啲玩社交平台，拍吓片：「其實都覺得幾好玩，唔係再好似以前淨係唱歌咁單一，真係要學好多野，所以要參加吓啲職業在培訓。真係有㗎，間唔時公司啲同事都會brief吓我哋呢牌有啲乜嘢hit，我就主要培訓寫無聊嘅hashtag，除咗做音樂，都想帶開心畀大家。」又搞笑指好友王菀之漸入佳境，而容祖兒嘅發文內容就特別有趣。
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|
