掃呢頁CODE去手機

2017年12月20日 星期三

岩巉農夫奇葩異數 死剩把口食盡「女人香」 __,農夫,陸永權,鄭詩君,

農夫把口冇得輸!農夫可列入娛樂圈中「奇葩異數」,傳統受歡迎指標係「高顏值」嘅男神女神,老實講以農夫嘅獨特尊容,高瘦肥矮一凹一凸簡直係絕配,跌到負點都唔 ...


農夫把口冇得輸!


農夫可列入娛樂圈中「奇葩異數」,傳統受歡迎指標係「高顏值」嘅男神女神,老實講以農夫嘅獨特尊容,高瘦肥矮一凹一凸簡直係絕配,跌到負點都唔係誇,農夫就話唔怕個樣岩巉,佢哋憑把口就已經可以扭轉乾坤仲入埋屋!咪以為只係死剩把口,都要有「逢女收服」嘅能力,Do姐鄭裕玲出名夠辣難搞,佢哋偏偏就治到呢朵霸王花,淨係無綫台慶陸永易服扮Do姐,學足佢嘴臉同口頭禪,短短分零鐘Show Time就成功搶Fo登上全晚收視點之最,點會唔得Do姐歡心。所以話農夫「有女萬事通」,有數據、有往績,唔係吹水,當年無端端搵咗風水師麥玲玲唱首《風生水起》,竟然人歌爆Hit仲攞埋獎,簡直異數典範!

老婆小產 陸永化悲憤為力量

尤其陸永條命水係「紅顏利水」財色雙收,婚前爛玩爛蒲,娶咗個靚老婆Reina後,齊齊180度逆轉,修心養性捱起頭家,話咁快仲做埋老竇三年抱兩,大女Hannah同細女Sim Sim呢兩個星二代,Hannah遺傳媽咪嘅靚樣,細女SimSim就有老竇啲搞笑細胞,兩個小靈精,點擊率勁過唔少真明星,活喺女人堆嘅陸永,愈多女愈催旺事業,由百呎房仔幾年間就搬到上獨立屋,十足十另一個人辦阿Bob(林盛斌)一樣「一屋女人香,茄喱啡撈到變富豪」。睇落一家好幸福,早排仲追到個囝囝,點知人算不如天算意外流產,但兩公婆好豁達去面對,仲話多經歷先令感情堅固,化悲憤為力量, 做人最緊要有正能量!

相比之下C君雖然未有陸永咁好艷福畀女圍,女一樣貨如輪轉,好似林珊珊個索爆大女西瓜都係「C女郎」名單之一!就算有先天地中海貧血症要個個月去輸血,都冇一棍打沉佢,仲好搞笑咁話:「唔輸血會死㗎喎!我梗係輸」憑幽默風趣,仲氹到拍拖四年嘅DJ女友享受同居生活,唔怪得之前有人話佢用百萬名車箍女友,佢口響響仲套用埋《哈利波特》嘅金句咁話:「箍女友唔係用錢!係用愛呀!哈利!」

鄭裕玲翠如識笑唔識嬲

所以,佢哋以「農夫」命名,因為睇通自己唔係乜嘢靠樣搵飯食嘅男團,亦唔係萬人迷小鮮肉,要辛苦耕耘播種先有收穫。當年個個以為農夫係嘍囉二打六,睇死Rapper仔冇發圍點會跑出,其實曾經網上流傳佢哋係尖子,陸永會考26分,C君29分差一分就做狀元,孰真孰假無從稽考,但觀乎佢哋寸人唔留口嘅功力,用詞貼地啜核得嚟唔低俗,雖然都有畀人話佢哋硬Tag,好似Do姐講句去富良野食蜜瓜,陸永隨口爆Seed「我唔食『涼嘢』!」搞到呢個霸王花當堂笑到講唔到對白,連翠如BB畀佢哋寸完都要話「靚抽」,證明天生樣衰都有用,口水都可以改命!


來源 source: http://hk.on.cc
鍾意就快D Share啦!