《星球大戰：最後絕地武士》（Star Wars：The Last Jedi）首映今晚喺觀塘APM舉行，身為《星戰》迷嘅古天樂就以嘉賓身份現身，佢仲同戲中反派「Kylo Ren」嘅阿當載華（Adam Driver）一齊登場，仲齊齊以激光劍對招，古仔最後仲用原力打走對方。
台上司儀問到古仔早前同BB-8拍嘅短片喺網人被熱捧，古仔就話：「見到佢（BB-8）嗰陣心情係好想將佢拆開，因為想睇佢入面點整，點解可以咁靈活。」古仔仲話《星戰》入面佢最鐘意就係Kylo Ren，佢又話o依家嘅白兵加入黑色元素，帶俾人新嘅感覺。最後古仔同其他嘉賓一齊進行首映揭幕儀式。
其後古仔接受訪問，問到佢期唔期待新一輯電影，佢就話：「好期待呢個古仔，亦都好期待今日呢個《星戰》展覽場地，好多朋友send相俾我，問我睇咗未。知道首映喺呢度舉行，所以等到今日一次過欣賞。」展覽台上放住1:1《星戰》figure，問到古仔會唔會拎返去珍藏，佢就話：「會諗辦法喺其實地方搵到呢啲figure將佢哋帶走。有好多朋友都係《星戰》迷，大家都會交流心得同珍藏。」
問到今集電影入面鍾意邊個角色，古仔就話比較鍾意奸角。之後問到古仔嘅玩具倉爆滿未，佢就話：「未爆，《星戰》仲可能有十幾集，所以都預留咗空位放珍藏。」問到會唔會再舉辦玩具展？古仔話：「應該唔會，因為之前喺運輸過程中整爛咗一半，有啲要用好多時間先整得番，有啲就整唔番。其實運輸過程啲工作人員都好小心，不過啲玩具都有啲歷史，所以真係好易爛。」講到最鐘意，古仔就話係第一隻收藏1:1嘅黑武士figure，佢仲話：「可能有原力保護，好彩佢冇事冇整爛。喺戲中真係鍾意反派多啲，好少戲啲反派做得咁成功。」古仔亦話如果有興趣可以去佢個倉度睇，盡量唔好再搬運珍藏：「好多朋友都邀請我去大陸、東南亞做展覽，不過我驚去完個倉會冇晒嘢。入面仲有個1:1 figure有成兩層樓高，當時都要成7、8個人嚟整，係Marvel入面嘅Hulkbuster。」
更多娛聞，喺晒《娛果》
http://fb.com/appledailyent
| 攝影：葉君海 | | |
| | | |
| | | |
| |
|
鍾意就快D Share啦！
|
|
|
