天后楊千嬅於踏入「22對」生日前，終於完成人生夢想，舉行入行21年的首個跨年騷，主辦機構豪擲千萬製作，前晚首場騷正式開鑼，千嬅打側手翻唱爆紅館，又首唱《親》送給兒子和父母，感觸到眼紅紅，尾聲時更嫌唔夠喉叫加歌。
楊千嬅一連11場的「三二一GO！」演唱會前晚在紅館開鑼，現年43歲的千嬅入行21年，終於有屬於自己的首個跨年騷，原本這個檔期是劉德華的，但因年初華仔在泰國墮馬受傷取消個唱，結果檔期落在千嬅手上，令她可以完成夢想。前晚首場騷老公丁子高帶兒子Torres撐場，千嬅興奮說：「好開心！好多謝大家嚟成就我嘅夢想，呢個夢想已經好耐喇，跨年對我嚟講有好特別嘅意思。」
| | | |
對囝囝唱心聲
全晚千嬅換了多套戰衣，唱出連串金曲兼勁歌熱舞，演繹《Wonder Woman》着deep V扮女殺手登場，大方騷iPad胸，踢腿又打側手翻，挑戰43歲的中女極限，觀眾大讚跳舞好勁，千嬅聞言笑說：「咁我出年係咪要轉工？我想做三面台好耐，有一份安全感，今日係緣份令到大家可以合作，喺我『22對』生日之前做到係好開心！」
千嬅自爆年齡秘密，台下觀眾大笑，她說：「呢啲冇需要呃人，一查就知啦，我一直都好想做跨年騷，有好大嘅感觸，一個人成長已經係倒數，所以做一個跨年騷係一個好有意義嘅事。可能早幾年做我都未有透徹嘅想法，我係想自己嘅嘢分享，鼓勵之餘，將個『勇』再share畀大家。」
千嬅又首度公開唱《親》送給兒子，當年她懷孕37周時錄這首歌，千嬅憶說：「錄嘅時候好多感覺，林夕亦寫出我對下一代嘅期望。雖然今日佢（Torres）坐喺度，但佢未必知道媽咪做啲乜嘢，但係佢到時應該睇到媽咪想講嘅嘢。」之後千嬅眼紅紅哽咽說：「呢首歌我都想送畀我爸爸媽媽，做任何嘢應該要及時，要孝順父母，要好好對你嘅下一代。」
影到觀眾偷拍
踏入安哥部份時，千嬅換上黑色晚裝deep V露腿唱出《缺陷美》，之後唱到《閃靈》時行去台邊跟觀眾握手，唱到投入的千嬅更不慎跌bra帶。之後當千嬅表示預備唱出最後一首歌《少女的祈禱》時，觀眾搞笑大嗌：「𠵱家仲係9點。」嫌未夠喉的千嬅笑言要加歌唱，最後唱出《一二三三二一》作完場。此外，前晚千嬅在台上唱歌時，大螢幕剛影到有觀眾用手機偷錄，昨千嬅所屬唱片公司發言人回覆：「大會安排好多保安喺場館巡查，捉到好多觀眾偷拍，我哋會勸對方唔可盜錄。」
採訪：馬建華
攝影：仇志德
【唱林夕作品為主】
有傳05年楊千嬅和黃偉文（Wyman）因林夕反面，千嬅醉爆鬧Wyman：「你作畀我啲歌唔X掂！」直至12年破冰，兩人在割席7年間幾乎零合作，難怪前晚以林夕作品為主。
|
鍾意就快D Share啦！
|
|
|