2018年1月13日 星期六

【曾戀張衞健】47歲宣萱依然單身:唔啱我寧願自己一個人 __,張衞健,宣萱,

歸宿意指最終嘅着落,好多人會認為,女人最終嘅歸宿就係結婚生仔。但對於47歲、仍然單身嘅宣萱來講,佢話佢享受單身,全因佢深信搵一個唔啱自己嘅,佢寧願自己 ...




歸宿意指最終嘅着落,好多人會認為,女人最終嘅歸宿就係結婚生仔。但對於47歲、仍然單身嘅宣萱來講,佢話佢享受單身,全因佢深信搵一個唔啱自己嘅,佢寧願自己一個人,好好享受生活,活得自在。

入行25年嘅宣萱,佢嘅感情生活同佢嘅事業一樣,都係多姿多采。93年,宣萱就同合作拍《龍兄鼠弟》嘅拍檔張衞健擦出愛火花,但礙於二人當時喺事業上的女尊男卑,分手收場。輾轉宣萱都有拍拖,對象層面好廣,包括有中信泰富主席榮智健堂姪榮文瀚、牙醫陳建緯、獸醫Ruan,與及意大利型男Fran等等,但全都未能開花結果。

咁究竟宣萱情歸何處呢?日前佢接受《蘋果》專訪,講到感情,佢話:「希望私人生活同工作都可以並排去,樣樣都有啲,o依家好隨意,有啱嘅咪拍(拖),冇啱嘅咪專心做嘢,我唔會為咗做嘢唔拍拖,同樣亦唔會為咗拍拖而唔做嘢。」

宣萱亦講到,身邊有好多朋友已經擁有自己家庭,但係就以唔開心居多,佢話:「身邊有好多朋友,可以話10對得1對係開心,唔開心係佔咗9對,睇到佢哋,我會更加清晰,真係要搵個啱,佢哋去到呢個地步,反而係羨慕我仲未結婚。」宣萱笑言聽完都覺得自己好好彩,「傾完偈明白,更加清楚兩個人一齊啱傾係重要,而唔係專登搵一個伴去行,我寧願搵一個啱,唔啱我寧願自己一個人,我返到屋企好清靜,可以做自己。」

雖然感情未有着落,宣萱嘅事業就顯得好順暢,好似去年佢同林文龍拍攝嘅大台劇集《不懂撒嬌的女人》,劇中飾演Mall姐嘅佢,角色深入民心:「OK㗎,到o依家仲有人叫我MALL姐,真係幾滿足,好滿意,自己覺得有5年冇喺電視出現,但係都可以有咁嘅迴響,真係好好彩。」

Mall姐雖成功,但宣萱反而鍾意《使徒行者2》入面嘅Scarlett,佢話:「Scarlett呢個角色未試過,所以如果你問我,我特別鍾意Scarlett,我想呢個人物拎最喜愛角色,但係我明白Scarlett唔係主角,Mall姐先係主角,只不過喺演員角度,可以試一啲唔同嘅嘢,好enjoy。」

曾經放棄簽經理人嘅宣萱,去年就成為好友古天樂經理人公司旗下藝人,佢話:「嗰陣係入行20幾年嘅第一次,好多嘢叫做自己摸索,自己學習、嘗試,好多嘢都要自己去傾,自己去搞,到咗o依家可以放手,亦都希望做到啲對觀眾同自己都有新鮮感嘅嘢。」佢仲講笑話:「成功女人背後都要有一班男人,我o依家仲要有三個!」細問下,原來宣萱所講背後嘅三個男人,只係佢兩個經理人同埋佢助手。

活到老學到老,日前宣萱出席Lily姐(梁舜燕)86歲大壽兼入行60周年,亦有所啟發:「我覺得自己嘅心態都似Lily姐,佢到今日仍然繼續做,唔係為生活而奔波,只係為興趣,我自己心態都係,興趣係好緊要,就算我o依家去教育啲小朋友,如果可以要搵一份自己鍾意嘅工,開心生活真係好緊要。」



服裝:IRO from I.T

場地:Fridge

精選娛聞,喺晒《娛果》

http://fb.com/appledailyent





攝影:林賓尼 宣萱唔想為咗拍拖而拍拖。


宣萱覺得開心生活緊要。 宣萱同張衞健拍《龍兄鼠弟》曾擦出愛火花(資料圖片)
(資料圖片) 2009年宣萱同細佢4年嘅南非籍獸醫Ruan交往(資料圖片) (資料圖片)
2014年遇到意大利型男Fran(資料圖片)

鍾意就快D Share啦!
Related Posts Plugin for WordPress, Blogger...