霆鋒打造天價巡迴騷香港響頭炮
謝霆鋒及陳奕迅前晚以神秘嘉賓身份，先後在《叱咤》頒獎禮上表演，搶晒眾星風頭，成為全晚兩大焦點！其中身為「型男廚神」的霆鋒終於走出廚房，放低鑊剷，拎起結他Rock爆唱歌，為2018年回歸樂壇熱身！據知，霆鋒今次回歸樂壇有五部曲，而萬眾期待的演唱會將會成真，將於年底或明年初舉行巡唱，首站更會是香港！
《2017年度叱咤樂壇流行榜頒獎典禮》前晚圓滿結束，一眾得獎歌手固然是重點，但亦不及兩位重量級神秘嘉賓有驚喜！打頭陣出場的「Chok王」謝霆鋒及壓軸表演的「吹神」陳奕迅（Eason）甫現身即搶晒鏡，掀起兩個高潮！首先現身的霆鋒相隔17年再踏叱咤舞台，與樂隊Supper Moment及觸執毛表演，Rock爆演出令台下歌手及觀眾都High到企晒起身！
霆鋒做嘉賓掀起全城熱話，網民不停洗版，更跪求霆鋒在港開騷！據知此願望真的會在一、兩年內達成，英皇已有周詳計劃，準備投資天價為霆鋒打造巡迴演唱會，而首站更會在香港舉行！惟解決不到的仍是場地問題，因為霆鋒一向鍾情露天場地，公司希望霆鋒可以在大球場或中環海濱開騷，只要其中一個場地許可，霆鋒便隨時準備踏上舞台！
預咗有過億落袋
今次霆鋒做嘉賓其實是為回歸樂壇熱身，明日他在北京舉行2018年音樂計劃發布會，屆時新歌廣東版《有火》及國語版《異想天開》亦會首播MV，而第三炮霆鋒會於本月20日到高雄出席《KKBOX風雲榜》。據知第四步霆鋒正積極構思一個把煮食和唱歌融合在一起的節目，實行順從民意，屆時他遊世界找靈感做音樂。至於開騷就是第五步，他將於今年底或明年初舉行過百場巡迴演唱會，相信屆時他會有過億落袋！
至於霆鋒以叱咤表演為回歸樂壇頭炮，是因為21年前、當時16歲的他首個工作就是做叱咤表演嘉賓，當年更表演到爆呔！而今次短短十分鐘的表演，霆鋒都認真綵排了兩、三日，可惜當晚台上音響有少許問題，據知霆鋒落台後都有點忟憎，但亦開心可以跟DJ朋友見面及合照。對於歌迷跪求霆鋒開騷，經理人霍汶希說：「收到歌迷訴求，開演唱會一事正積極進行中。」她又笑言會求霆鋒開騷。
Eason後台嗌緊張
另一邊廂，同樣擔任神秘嘉賓的Eason亦引起很大回響，當晚在林海峰（Jan）獨白下，Eason唱出《我的快樂時代》、《天下無雙》、《陀飛輪》及《K歌之王》幾首經典金曲，雖然林海峰取笑當年Eason一臉青澀稚氣其實是戇居，但Eason唱出一句「K歌之王係我」，認真霸氣！當晚Eason在台上表現淡定，但原來他亦感到緊張，頒獎禮後微博有一段在後台訪問Eason的片段，問到表演完有何感受？他笑說：「有啲緊張嘅，上去呢個叱咤（舞台）幾好吖，有啲腎上腺素嘅郁動，都算完整完成個演出咁囉！阿炳（琴師何秉舜）好嘢，阿Jan都好好嘢，佢嗰啲（稿）好難背，因為要夾Timing講嘢，都幾有壓力，我就最易囉，因為我企喺度唱歌咋嘛！」另外，有網民上載霆鋒女友王菲與好友的聚會照，當中見王菲腹部扁平，粉碎懷孕傳聞。
文：音樂組
|
鍾意就快D Share啦！
|
|
|
