網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2018年1月30日 星期二

娛刺撈飯:張達明「愛妻鉑金俠」 抽兩滴血夠埋單! __,達明,張達明,

張達明真係「愛妻鉑金俠」!Nuts哥已經記唔起係喺邊度聽人講過:「當我訴說着一宗悲劇的時候,世人卻把它當笑話。」直至喜劇演員張達明日前喺一套新戲嘅開鏡 ...


張達明真係「愛妻鉑金俠」!


Nuts哥已經記唔起係喺邊度聽人講過:「當我訴說着一宗悲劇的時候,世人卻把它當笑話。」直至喜劇演員張達明日前喺一套新戲嘅開鏡儀式上講:「呢個角色啱我,方法演技!我手腳麻痹,遲早都坐輪椅,咁咪試吓先,我係似呢個角色,我頸上面啲皺紋唔係加上去,係真㗎,第二個演員冇!既然個戲咁啱我,咪做囉!」呢番說話出自一個出名擅長模仿速龍高速移動嘅達明把口,當中嗰種誓要搞笑搞到底嘅精神,就好似電影《阿虎》入面,阿虎用埋最後一啖力氣擊出嗰幾拳咁,縱使力度輕如撳𨋢,但精神可嘉,理應贏得全場掌聲與尊敬!

得獎舞台劇悟人生

不過達明當日講完,現場聽嘅人好似冇乜反應, 或者大家都認為現今醫學昌明,又或者對上一次體會頑疾,已經係幾年前嘅冰桶挑戰漸凍人症,事實上好人好姐,冇病冇痛,一般都唔會對社會上嘅老弱病殘有所謂嘅同理心,但達明係例外!早喺佢未同黃子華演出《棟篤笑雙打》,仍然喺舞台劇界打滾嗰陣,佢已經喺自己編嘅得獎舞台劇本《亞Dum一家看海的日子》度咁寫:「遲啲我又盲又聾,話唔定香埋添」、「每個人都會有艱難嘅日子,有人長啲,有人短啲, 有人突然間遇到」,嗰陣達明30歲都未到,就已經諗得咁長遠,多少證明咗「幽默的人只會悲觀」!

唔知係咪人無遠慮,必有近憂,達明既然諗得咁長遠,上天都冇待薄佢,佢同子華做完《棟》之後, 成功跑出,做埋無綫劇男一,唔單止子華妒忌佢,連周星馳開戲都預埋佢,佢嗰陣只係31歲,前途可謂一片光明,後來娶埋心理學家何念慈做老婆,生咗一對寶貝仔女,兼夾出埋部Dream Car保時捷,準備全力喺人生旅途馳騁!

離婚絕冇半句壞話

但好景不常,達明嘅中年運似乎差咗啲,48歲患上鼻咽癌,唔單止工作量跌至患病前嘅十分之一,為醫病更花盡積蓄,要出售西貢獨立屋,搬往何文田,佢仲自爆喺化療期間金屬中毒,難得佢仲識搞Gag自封係厲害過Iron Man嘅鉑金俠,話出街食飯唔記得帶銀包都冇問題,抽兩滴血就夠埋單!病後身形暴瘦嘅佢,有鼻塞同手腳麻痹等後遺症,除咗要着特製嘅鞋,仲「瞓咗都唔知第二日起唔起到身」,喺咁需要人照顧嘅時間,達明喺2016年宣布同老婆離婚,對於離婚原因,達明隻字不提,但分開後仍有同前妻食生日飯嘅佢,只有讚前妻靚,絕無半句壞話。

多病痛唔想連累仔女

一不抱怨,二不解釋,就係張達明抗癌同愛護妻兒嘅方式,要生活得漂亮,需要付出極大的忍耐,講過「仔女同我住就麻煩,我多病痛」嘅佢,如果講到明「分開係為咗等太太可以搵到另一個可以照顧佢嘅人」,就太長夾譖,同樣係只喜意會,不喜講到明嘅編劇,達明毫無疑問比「將第二好的床留給妻子」嘅莎士比亞,更加愛妻!


來源 source: http://hk.on.cc
鍾意就快D Share啦!