掃呢頁CODE去手機

2018年1月25日 星期四

Moka做跟得老婆陪城城飛上海過二人世界 [壹週刊 - 1455] __,Moka,方媛,郭富城,城城,M1,

尾隨的男助手抽住一大個粉紅色紙盒,相信是城城送俾老婆的禮物。探熱針Moka做跟得老婆陪城城飛上海過二人世界52歲的郭富城上年四月脫離王老五行列,娶咗嫩 ...






尾隨的男助手抽住一大個粉紅色紙盒,相信是城城送俾老婆的禮物。

探熱針

Moka做跟得老婆陪城城飛上海過二人世界

52歲的郭富城上年四月脫離王老五行列,娶咗嫩妻方媛( Moka),奉女成婚。 B女 Chant九月出世,為方便湊女,城城月花八萬租屋,安排岳父岳母住喺樓下,等兩公婆可以繼續二人世界。

早排城城飛上海開工, Moka暫時放低 B女,做「跟得老婆」,工作之餘順便過二人世界,返港時為避耳目,城城行先, Moka繼續做背後女人跟住尾。







食到一嘴麵包碎, Moka提醒老公抹嘴。





坐完四個鐘飛機,城城急不及待買麵包醫肚。





見老婆無乜表情,城城輕輕搭一搭老婆膊頭。





出閘後,城城行先, Moka一直跟尾。





兩公婆在店鋪揀嘢食,繼續各有各揀。

等阿女接手生意

女細老婆嫩,城城婚後冇停過手,同發哥拍完電影《無雙》,又同梁朝偉合拍警匪片《風再起時》,加埋一連串廣告同商演,完全無放假,甚至連度蜜月都未有期。最近城城仲研發個人品牌護髮用品,話希望第日阿女可以接手生意,諗得咁長遠,做咗老豆係唔同啲!

由於有岳母飛埋來香港幫手湊孫,兩公婆有自由時間,早前城城要去上海開工, Moka人肉速遞跟住去,當日 Moka仲約埋老友齊齊去捧老公場,難得撇甩 B女,兩公婆爭取機會二人世界,更有網友撞到佢哋喺上海拍拖行街,去完精品店買禮物,之後再去撐枱腳。

「城城結婚之後一直忙到而家,加上嗰陣 Moka有咗 BB,兩公婆連度蜜月都未有時間去,同埋佢都唔想下下過時過節都去開工,同老婆分開過,好在而家 BB有岳母同工人睇住,佢哋都好放心,可以有時間去拍吓拖。」 Moka身邊人透露。





早前城城飛上海做騷,方媛帶埋好姊妹去捧老公場。

人前依然避忌

兩公婆從上海返港,出閘時城城行先, Moka跟尾,雖然連女都生埋,不過他們每逢人多地方都刻意保持距離,唔想俾人評頭品足。之後兩個好有默契,一前一後走入咖啡店,入到鋪頭,兩公婆各有各揀嘢飲,買完嘢飲,再去 order嘢食,其間唔少途人發現天王蹤影,都望多兩眼,不過城城就好 cool,低頭掛住篤電話,同老婆冇乜兩句, Moka俾老公冷落,開始面燶燶,沿途男助手一直捧住一個粉紅色大紙盒,相信是城城送俾老婆的禮物。

買完嘢食,城城見老婆無晒表情,輕輕拍一拍老婆手臂示意走得,之後又一支箭行先,但時不時都有擰轉面望一望老婆,關心住老婆有冇跟上。坐完四個鐘飛機,城城好肚餓,沿路急不及待食麵包,短短一段路程已經食完。行到停車場,城城等埋老婆先上車, Moka見城城食到一嘴麵包碎,提醒老公抹嘴,之後兩公婆同其他工作人員 say bye後就上車走人。





為了方便湊孫, Moka媽從上海搬到香港長住,城城更月花八萬租屋,安排岳父岳母住樓下。





早前有網民目擊城城同方媛在中環 shopping,其間二人更公然在街頭嘴嘴。

人生變得圓滿

自從成為爸爸後,城城覺得人生變得更圓滿,現在一工作完就會想盡快返屋企,拒絕晒同朋友應酬食飯,家庭觀念重了,望住囡囡已經好 sweet,他更表示囡囡一半似自己一半似 Moka,好得意!早前城城就為 Chant舉行了小型百日宴,邀請了家人及幾位圈中好朋友,不過就特意炮製曲奇派街坊,慶祝 B女一百日,曲奇上的公仔,由城城同方媛的英文名「 AM」,加上「 BB」組成,再印上「 BB kwok」,十分有心思。





B女 Chant四個月大,城城早前搵古巨基所開的餅店炮製曲奇派街坊。

跟得夫人

圈中有不少另一半,為咗全面箍實老公,婚後不惜做跟得夫人,到片場突擊檢查,甚至黐住老公周圍飛。





朱麗倩

劇接劇的劉德華,經常同妻女分隔兩地,為咗囡囡 Hanna有得見老豆,朱麗倩不時人肉速遞周圍飛去搵劉華; 15年劉德華長駐北京拍荷李活電影《長城》,朱麗倩不惜中港兩邊撲,帶埋囡囡飛北京探班,更於北京慶祝父親節。





袁詠儀

每逢 Chilam一返大陸拍戲,袁詠儀戒備必定十級提高,除咗打電話 check住及視像老公外,更不時突擊檢查,帶埋囝囝魔童買晒外賣上去探班,實行跟到實。





李亞男

婚後的李亞男曾坦言不可能與老公不見面一星期;早年,王祖藍在北京拍《奔跑吧!兄弟》,李亞男更飛赴當地探班,做足五日跟得夫人,更笑道:「一日不見,如隔三秋。」

撰文:娛樂組 

攝影:楊紫、余一駱


鍾意就快D Share啦!