網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2018年2月14日 星期三

【閃耀人生女人心(4)】坦認女追男 靚靚呻俾老公食住:張智霖係唔會錯㗎! __,靚靚,張智霖,袁詠儀,

袁詠儀(靚靚)與張智霖(Chilam)結婚17年,一直有傳當年係女追男,到底呢個係咪事實?靚靚話:「只可以講,第一次約會係我提出嘅,但係咁算唔算追呢就 ...




袁詠儀(靚靚)與張智霖(Chilam)結婚17年,一直有傳當年係女追男,到底呢個係咪事實?靚靚話:「只可以講,第一次約會係我提出嘅,但係咁算唔算追呢就好難定義,都要有第二次佢約返我㗎嘛!」

靚靚話當年同Chilam喺北京拍電影《邊城浪子》而認識,當時因為喺拍攝場地玩得幾開心,所以靚靚就提議返香港之後就再約出嚟食飯:「之後約會多咗,傾得多講得多,就自然一撻即着!」靚靚坦言因為Chilam個靚仔樣,所以約會前已經對佢有feel,不過後尾同對方認識後,就覺得Chilam唔只得個樣:「你同嗰個人傾偈你會好開心,你會覺得佢唔只得個外表,天南地北咩都識,其實呢個圈有好多靚仔,我真係試過有啲傾咗大半個鐘都唔知佢哋講咩,所以佢(指Chilam)咩都識,你會覺得佢好正。」

外人眼中,靚靚個性格比較強,Chilam比較弱,對此靚靚就話完全唔同意:「表面嚟㗎啫!其實我只不過講嘢大聲啲啫,咁唔代表我真係強嘅。我老公係好識得點樣對付我,我只可以講,佢唔係好似我咁惡死睖瞪、大大聲聲、好衝動嘅人,我比較衝動,我嘅EQ低好,我嘅IQ係高好多,但係佢就兩Q都高,我唔夠佢嚟。」性格南轅北轍,磨擦自然會多,不過靚靚話無論有咩事,佢同Chilam都會當日處理好,唔會嬲對方嬲過夜,問到每次拗叫過後,都係Chilam第一個道歉?靚靚就話:「我成日都話我老公係一個聖人嚟㗎,聖人係唔會有錯㗎!錯嘅係你哋!張智霖係唔會錯㗎!佢無錯過㗎!佢係永遠都搵到我弱點嚟插返我!佢永遠都會轉個彎,都係講返我唔啱。」

講到對老公嘅不滿,靚靚即話最頂唔順老公衣著,嗱!千奇咪唔會靚靚話佢老公著衫冇Taste,只不過Chilam唔係工作嘅時間衣著太過唔講究,有時可能約咗啲重要嘅貴客去啲高貴場所食晚飯,佢衣著都係好隨意,搞到靚靚紥紥跳。關於老公衣著嘅問題,靚靚話完全係咗降:「我老公真係唔係一個好貪靚嘅人,佢好整齊都係個假象嚟㗎咋!

「好激死你㗎佢,例如你讚佢件外套幾好睇,咁佢就一個禮拜都係着嗰件外套㗎喇!你叫佢換下衫,佢就會話已經換咗入面件底!呢樣嘢唔只得我一個發現,佢啲朋友大家都發現嘅。張智霖係一個唔係好打扮嘅人嚟,我同佢講,有時你點都執正少少吖!同我出去食飯,你咪落街又係嗰套,同我出去食飯又係嗰套吖大佬,但係佢會覺得無問題㗎!呢樣嘢係我最最最頂佢唔順!」幾多感歎號!

雖然咁頂老公唔順,但一講Chilam對自己做過最浪漫嘅事,靚靚個樣即時變得勁冧,佢話:「我試過叫結婚,但佢當時唔睬我,因為佢話想等自己事業有成先同我結婚,所以事隔九個月之後,佢同我求婚嗰陣,對我嚟講真係覺得好感動嘅,到依家為止,我覺得無一件事係浪漫得過呢樣嘢。」

記者:陳月媚、倩宜

攝錄:馮峰、卓振輝、吉吉

攝影:林德雄

化妝:Kerry wong

髮型:Sam Pan @Muse Hair

場地提供:好酒好蔡

相關新聞:

【閃耀人生女人心(3)】狂造人望追多個女 靚靚人工受孕:我卵子已老

http://bit.ly/2CfW45g

【閃耀人生女人心(2)】懷疑魔童自閉過度活躍 靚靚陪睇心理醫生原來係...

http://bit.ly/2EinZDx

【閃耀人生女人心(1)】靚靚管教太嚴愛操控 魔童:我想換個新媽咪

http://bit.ly/2EkPJY1

最港電影大獎投票網址

http://bit.ly/thekongestfilmawards

精選娛聞,喺晒《娛果》

http://fb.com/appledailyent



袁詠儀在訪問內大談與張智霖的相處時的小趣事。 靚靚直言跟張智霖的首次約會是她提出的。
靚靚大讚老公唔只得個樣,仲好有內涵。 雖然佢兩個性格好唔同,其中會有拗叫,但靚靚話佢同Chilam有咩問題,都會即日解決,唔會留過夜。 講到對張智霖最不滿嘅地方,佢話就係對方完全唔打扮。

鍾意就快D Share啦!