【今日ENT】現年30歲的鄭欣宜，因父母是鄭少秋、沈澱霞，從小到大都活在鎂光燈下，直至她入行，批評聲音亦未停過，欣宜前日無懼接受挑戰，現身《蘋果》娛樂直播節目《今日ENT》回答網民的問題，被批唱腔造作，又被踩似「好假的肥仔」。欣宜直認自小發明星夢，對於負評，她豁達回應：「好過冇人留意我！」
採訪：皓騫、蘇美怡
從小在鎂光燈下長大的鄭欣宜，從加拿大學成歸港後正式踏入娛樂圈，一直以來都有不少批評，除了身形，唱腔亦有抨擊，欣宜前日現身《蘋果》娛樂直播節目《今日ENT》直接面對評論。
網友：細細個已經成日上電視，發明星夢發到癲！
欣宜：我真係㗎！哈哈，我有問題㗎，因為我係獨女，婆婆湊大我，佢好保護我，婆婆驚我俾人拐咗，成日一個人喺屋企對住塊鏡，鏡子入面嘅自己就係最好朋友，成日鍾意朗誦、唱歌、跳舞、一字馬，就係自己對住鏡玩。記得以前攞起故事書，一個人飾演晒咁多角色，越多人睇住越想表演。《29+1》入圍最佳女配角好意外，從來唔覺自己係屬於電影世界嘅人，係音樂世界借咗我去嗰邊，我覺得能夠獲提名，話畀我知好導演同好劇本幾咁重要，多謝彭秀慧導演，希望佢得獎。
被鬧聲中成長
網友：天生靚聲，但唱腔略嫌造作！
欣宜：好多人咁講，尤其話我哭腔重，呢樣嘢我曾經好困擾，點解哭腔咁重，舊年唱《你是什麼時候開始不愛我的？》，我嘗試冇哭腔，大家覺得我唱得難聽。
網友：音色太普通，把聲又冇乜味道，哭腔又重，唱到好似苦情歌咁！
欣宜：你要講埋係乜歌，我先會有進步，其實呢種回應我一啲都唔傷心，我好需要聽到真說話。我由十幾歲已經喺被鬧嘅聲音中成長，初時梗係好唔鍾意，後來覺得你笑我，起碼我娛樂到你。
「我真係冇乜錢」
網友：唔係因為佢身形反感，係佢啲行為好造作、好假，見到欣宜，諗起五個字「好假的肥仔」！
欣宜：哈哈哈！多謝叫我肥仔，真嘅、真嘅、真嘅，雙下巴都係真嘅，我邊忽係假啫，儍豬嚟嘅。
網友：自己咁有錢，何苦入娛圈！
欣宜：其實我真係冇乜錢，有嗰個已故喇！我成日搭的士嘅時候，的士司機都會話：「你都要搭的士，你冇司機咩！」我心諗請一個司機好貴，同埋我冇車，我行街永遠有人認得，但搭地鐵永遠冇人認得，即係話畀我知，冇任何一個人覺得鄭欣宜會搭地鐵囉。
欣宜答完網友問題，不但心情未受影響，還說：「其實大家花呢個時間去留意我，係總好過冇人留意到我！」最後還獻聲唱了兩首歌《Fake a Smile》及《你是什麼時候開始不愛我的？》。踏入歌壇多年的欣宜，將於4月20、21日首次在紅館舉行「鄭欣宜Break A Leg演唱會」，希望大家批評之外，亦可以留意她的演出。
髮型：Milk chan@xenter
化妝：Samuel@江中平化妝室
造型：Constance Lee@ConStyle
場地提供：RedMR紅人派對
|
鍾意就快D Share啦！
|
|
|
