恭喜韓國天團BIGBANG成員太陽(29歲)成為人夫，迎娶拍拖四年嘅演員閔孝琳(31歲)！
太陽同孝琳嘅姊弟戀喺2013年已經萌芽，至2015年6月，畀韓媒影到暖男為女神綁鞋帶嘅經典相，戀情自此曝光。當時網民追查返，話未爆相前，孝琳喺ig嘅留言都有玄機，佢將自己比喻為月亮，好似暗示「擁抱太陽的月亮」。
閔孝琳係太陽嘅初戀，太陽曾經講笑話，「我係母胎SOLO！」意思係自世以嚟都無拍過拖。太陽自細做練習生，出道後又忙，根本無時間拍拖，佢同孝琳認識都係基於工作，一齊拍攝《1AM》MV。
團員G-Dragon曾經上節目《RADIO STAR》爆料，話自己先係太陽同孝琳嘅真正媒人，因為係佢推薦孝琳做MV女主角。GD話首歌係悲情歌，但係當時孝琳喺度，太陽邊拍邊甜笑。直到佢哋真係拍拖，GD話一見太陽無晒心機，係咁嘆氣，就知佢同孝琳鬧交，都唔使問！另一位團員勝利都忍唔住加把嘴，話太陽嘅心情簡直畀孝琳控制住，係標準嘅女友傻瓜！
太陽同孝琳所屬唔同公司，太陽屬YG，閔孝琳屬JYP，傳聞話佢哋公開拍拖前，兩邊高層誇到要開會傾，以免出現單方面承認嘅情況。
兩人公開戀情之後，太陽愛得高調，喺鏡頭前唔會避忌講女友，例如大方承認自己首名曲《EYES, NOSE, LIPS》係為孝琳而寫，又公開話孝琳係自己嘅女神。去年8月，太陽又喺節目《哥哥的想法》提起孝琳，話自己鍾意搞爛GAG，但係孝琳好cool，於是太陽就更加努力咁搞爛GAG，希望氹到佢笑為止，可惜尚未成功。
即使係私人時間拍拖，太陽同孝琳都照樣四圍去，唔介意畀韓媒或者網民野生捕獲，好似喺2016年4月，韓媒就喺首爾龍山區捕獲佢哋拍拖散步。
閔孝琳都有喺節目講過佢哋拍拖嘅事，話因為兩個人都鍾意食，所以拍拖成日去搵好嘢食，又因為太陽好多海外行程，所以大家會好珍惜見面機會，好似BIGBANG舉辦世界巡演，孝琳就會做跟得女友，甚至遠赴悉尼都撐。
太陽同孝琳喺教堂舉行婚禮，只係請親戚朋友，之後去仁川搞婚宴，全部唔公開。婚後因為工作，未有度蜜月計劃。韓媒估計，孝琳婚後會搬入丈夫嘅獨立屋，位於漢南洞，價值2700萬港紙。
|
鍾意就快D Share啦！
|
|
|
