掃呢頁CODE去手機

2018年3月1日 星期四

「我賺夠,想俾其他人賺」的騙局邏輯 [壹週刊 - 1460 - 財經] __,M1,

畢打街閒人「我賺夠,想俾其他人賺」的騙局邏輯鄭中基、李璨琛在電影《龍咁威》中夾計呃阿婆,推銷「瑞士山區肺」的橋段膾炙人口。當中一句「呢排我賺夠,我都想 ...






畢打街閒人

「我賺夠,想俾其他人賺」的騙局邏輯

鄭中基、李璨琛在電影《龍咁威》中夾計呃阿婆,推銷「瑞士山區肺」的橋段膾炙人口。當中一句「呢排我賺夠,我都想俾其他人賺」歷久常新,成為網上騙局行銷,層壓式搵水魚的常見口號。

行為經濟學家、最新出爐的諾貝爾經濟學得主 Richard Thaler曾經利用紐約的士司機的數據,研究過「我賺夠,想俾其他人賺」的行為,用上了 reference point, mental accounting, loss aversion等行為經濟學概念。的士司機接客賺錢係隨機行為,勤力一點兜客自然大機會接到客,但同樣要面對浪費油費、時間食白果的風險。因此,的士司機的行為模式係:每一日大概都會預算自己搵幾多錢,然後搵夠就算,唔會再浪費更多油錢同時間,因為過了每日搵錢預設生意額後,心理上覺得再搏落去係貪心,倒蝕油錢令個心更唔舒服。

預設自己每日搵幾多錢是 reference point,分開每日跑幾多生意去計數是 mental accounting,心理上覺得搏落去兜客蝕油錢係 loss aversion作祟。因此,的士司機的確係會「我賺夠就收工,就算條街有客,都係俾其他的士司機賺就算」。研究結果證實,的士司機往往錯過繁忙高需求賺錢良機,太早收工,然後搵少了錢;反而非繁忙時間明知無生意,都搏命狂兜去追自己每日預設的生意額,結果把力用在不當的需求時間,得不償失。

好似的士司機咁,自己搵自己錢,的確可以「我賺夠,想俾其他人賺」,反正賺蝕、贏輸都係自己。如果有人同你講:「呢期我賺錢,想俾『你』賺。」咁刻意去推銷你,不必勞煩經濟學家,牛頭角順嫂都知呢個係搵笨陷阱。

網上世界藉 Bitcoin虛擬貨幣的大勢,一時間很多智能合約、挖礦機生意推銷中介。好像 Bitcoin為例,貨幣的總發行量將會在二一四○年達到二千一百萬個的極限,現在的耗電式挖礦是透過運算解涵數方式去獲得 Bitcoin,亦是中本聰論文的含意。理論上,早挖早享受,遲挖就愈挖愈難,因為供應有限,涵數運算也愈難,成本便愈高,這是鬥快上音樂椅的遊戲。如果有早上岸者,用錢推銷你挖礦,那你就要小心。

早在今年一月, Facebook已經不勝其擾,所以 Product Management Director Rob Leathern已表示新的廣告政策將禁止所有虛擬貨幣廣告。太好了,少了虛擬貨幣的渾濁雜音,我們可以慢慢細心欣賞利敏貞太監清服,恭迎習帝聖駕,在中梵建交後順利在教宗手上登基,成為再世拿破崙的神聖一刻。





畢打街閒人

渾水。流連中、上環的專業投資者,兼職上市公司執行董事、投初創項目、炒股票、寫吓嘢。

著有《殼股財技》。

撰文:渾水


鍾意就快D Share啦!