禤國全表示，現時酒店第二期工程正展開，他更親自測試溫泉水溫。
財經人物
東瀛遊一擲四億大阪起酒店抗互聯網衝擊
受互聯網衝擊，港人出外旅行的習慣在近年起了重大變化，由數年前傳統報團及自由行，變成了「一 app在手」就可以預訂酒店及機票，對旅行社造成重大衝擊。在港經營了二十多年旅行社的東瀛遊（ 6882）執行董事禤國全（ Steve）亦承認，香港的旅行社競爭已進入白熱化的階段。
「互聯網唔只係對旅遊業嘅衝擊，而係對整體零售服務業都係有影響。」 Steve坦承，網絡搶了不少傳統旅行社的生意，如果旅行社只繼續靠旅行團及自由行產品，難以看到曙光。公司於是決定一擲四億港元，於大阪浪速區興建逸の彩酒店，更籌備在沖繩興建第二間酒店。
Steve指出，現時酒店主要以招待香港、台灣、新加坡客人為主，為何不包括內地客？而酒店每日供應的「拉麵啤酒放題」，經傳媒報導後反應不俗，但有網友就質疑「驚唔驚白撞入去食？」待 Steve一一解答！
「係俾網絡搶咗傳統旅行社生意，因為過往一定係喺旅行社買產品，依家好容易喺網上同手機上可以預訂酒店。」禤國全表示，現時自由行往日本的香港旅客愈來愈多，對自由行產品有一定影響，加上發現即使開辦旅行團，在大阪仍難以找到酒店，於是決定在當地興建：「依家香港到日本最受歡迎的地方就係大阪，第二先至係東京，我們自己都睇到，大阪酒店需求量係十分之大，我哋自己（訂房）都有一啲難度，所以我覺得大阪係一個適合開一個新板塊嘅地方。」
Steve表示，今次第一期興建酒店的計劃，連地價及承建費用就用上四億港元，對於酒店興建在近通天閣位置，而非傳統中央區， Steve解釋：「聽到唔少客人講，心齋橋係好方便，不過真係太多人，我哋酒店去大阪心臟難波只係一個站，去日本橋都係一個站，但地方相對上係無咁多人、比較清靜。」
拉麵啤酒放題最受歡迎
早前記者獲東瀛遊邀請到酒店試住，甫進酒店，由於有大量香港旅行團團友入住，加上酒店設日本少有說廣東話的接待員，相當有親切感。而不少設施都有別於一般日本酒店，好像部分設企缸可供客人選擇，而房間都裝上 USB插頭，相當方便。而地上鋪上沖繩榻榻米，比一般地氈整潔。
事實上，不少日本酒店都設有消夜拉麵供應，但甚少可以「任食」，所以吸引不少旅客，他們都對安排讚不絕口，香港遊客胡生表示：「可以食到免費嘅消夜，非常之開心，酒店擁有對客人嘅窩心，去設法想點樣令客人開心，呢樣我係非常鍾意。」對於有網友指「可唔可以直接入去酒店食」， Steve就解釋：「其實見到客人，玩咗成日返嚟。原來一班客人聚會、一齊傾偈、飲啤酒、食拉麵，感覺到佢哋好放鬆之餘，好多時都會影相放上 Facebook，其實幫我哋做推廣。有客人行過，有相熟朋友，帶朋友嚟飲杯啤酒，我哋都唔會抗拒。」
暫不做國內遊客生意
開業初期，酒店主要做旅行團及部分香港、台灣、新加坡客人生意， Steve解釋暫未在國內做推廣：「我哋覺得，市場係好大，相反如果我哋接待能力無咁強，只會有反效果。」而酒店購地時，已洞悉附近設溫泉泉眼，所以亦密鑼緊鼓籌備興建大浴場：「將會有一座五層高嘅建築物。一樓係健身室、二樓就係男性大浴場、三樓就係女性大浴場、四五樓就係比較私人的獨立溫泉。呢個溫泉有非常唔錯嘅水質，好似糖尿病、高血壓、神經痛，或者失眠都係好啱，對皮膚都係非常之好。」
「如果我哋酒店有溫泉，相信我哋酒店價值都會提升。最緊要係，經濟好嘅時候，都能夠帶動到我哋酒店生意。不幸經濟下滑嘅話，我哋作為一間城市酒店，我哋競爭力一定比別人強。」 Steve續指，未來仍會擴展酒店版圖：「喺沖繩國際通嘅街頭，已經買咗一幅地預備興建酒店，希望喺二○一九年年底就可以落成。」
自由行衝擊搞本地遊救亡
近年大阪民宿大行其道，不少都以便宜價錢搶客， Steve認為無有怕：「我覺得係兩類客人，呢方面我哋就不太擔心。」他指網上訂酒店及機票衝擊反而更大：「係俾網絡搶咗傳統旅行社生意，因為過往一定係喺旅行社買產品。依家好容易喺網上同手機上 book酒店，以及最近多咗啲廉航，佢係用 B2C（企業對顧客）。」公司就決定大搞特色遊及本地遊吸客，早前與森美合作的德島遊，甫開售就爆滿：「希望搵啲我哋唔太經常去嘅城市俾大家，可以發掘一啲新嘅旅遊景點，由森美帶隊，我哋當日開一個記招，第二日中午就已經爆滿。」
此外， Steve亦開始推廣日本本地出發的深度遊：「去一啲比較遠嘅地方，可能交通唔係太方便，雖然酒店及機票，客人唔係經我哋買，但都可以參加一啲一天遊，好似之前暑假我們去咗岡山摘桃，如果自己搭車，難度就會高啲，同埋收費可能比客人自己去更加平。」
互聯網衝擊有危有機
Steve坦言，數年前已意識到互聯網對旅遊業有翻天覆地的變化，早已決定轉型：「其實成個互聯網唔只係對旅遊業嘅衝擊，而係對整體零售服務業都有影響，但我覺得有危就有機，只要不斷創新推出產品，相信旅行團數字係可以再上升。」
雖然入行多年，但 Steve不時都會繼續跟團，訪問時更會到酒店主動向團友索取意見，他直言，客人口味一直在變，只留在辦公室根本難以進步：「我哋無可能停喺度，每日要不斷思考，要令客人鍾意你嘅產品。」
撰文:梁延宇
攝影:林志謙
|
鍾意就快D Share啦！
|
|
|
