掃呢頁CODE去手機

2018年3月15日 星期四

舉家返大馬十二兵團護駕 劉華朱麗倩合體帶女祭祖 [壹週刊 - 1462 - 生活] __,朱麗倩,劉德華,劉華,M1,

趁住農曆年假期,劉華、朱麗倩帶埋囡囡Hanna,舉家返大馬祭祖。娛頭舉家返大馬十二兵團護駕 劉華朱麗倩合體帶女祭祖12年劉華同朱麗倩誕下寶貝女劉向蕙( ...






趁住農曆年假期,劉華、朱麗倩帶埋囡囡 Hanna,舉家返大馬祭祖。

娛頭

舉家返大馬十二兵團護駕 劉華朱麗倩合體帶女祭祖

12年劉華同朱麗倩誕下寶貝女劉向蕙( Hanna),天王女出世後,劉華一直採取嚴管政策,嚴防女兒曝光。以往在公眾場所,劉華同朱麗倩從來唔會合體湊女,避免引起注目。不過隨着 Hanna愈來愈大,劉華開始逐步放寬。

最近終於破例喇!趁住農曆年假,一家三口舉家返大馬祭祖。今次劉華同朱麗倩終於唔使再分開走,落機時一家三口齊齊出閘。天王女出巡,保安功夫做到足。十日旅程,動用十二人團隊式護駕,認真大陣仗!

意外後開竅

去年初劉華在泰國意外墮馬,導致盆骨撕裂,經歷長達八個月復康期。去年九月,劉華拖埋老婆同阿女出席粉絲聚會,其間大會更播放劉華住院時片段,劉華喊住多謝老婆:「佢一路等我企番起身。」場面感人。

「自從嗰次意外之後,華仔睇開咗好多,以前好介意阿女曝光,成日話想佢過正常生活,唔想佢細細個就咁受注目,所以佢從來唔會親自帶個女去啲公眾場所,一去啲多人少少嘅地方,就要同個女分開出入。好多時都淨係叫工人姐姐,同保鑣湊 Hanna出街,連老婆都唔俾跟住,等人冇咁易察覺佢係天王女喎!不過嗰次意外之後,佢心態唔同咗啦,唔想因為咁犧牲同個女相處嘅時間,最多一家人出街咪叫多幾個保鑣跟住囉,唔避得咁多喇!」劉華身邊人透露。





一家三口沿路一直保持距離。





劉華、朱麗倩戴住口罩,全程甚少交流。





朱麗倩 keep住低頭,仲吩咐 Hanna伏在工人姐姐膊頭。

陪返鄕下補數

在大馬出世的朱麗倩,每年定時定候一定返娘家祭祖,去年劉華出事時,朱麗倩原本已帶埋 Hanna出發返娘家。得知老公墮馬,朱麗倩漏夜撲去泰國。

「華仔出事嗰陣,朱麗倩真係日日陪住佢㗎,以前佢一年起碼返大馬三、四次,但華仔休養嗰八個月,佢同個女都冇離開過香港,所以華仔應承過佢,今年幾忙都好,一定陪佢返娘家補數,同埋 Hanna九月升小一,到時大人小朋友都忙,冇咁多機會成家去長旅行。」





劉華一馬當先落機,仲火速瞄到鏡頭。





出閘後, Hanna跟住工人姐姐行先,劉華、朱麗倩殿後,不過 Hanna時不時擰轉面搵 Daddy。





一家三口上車後,三人團隊護送十七件行李上車。





成隊兵護駕到停車場, Hanna仲主動要拖住 Daddy。

團隊式護駕

以往一家三口出埠,避免引起注目,劉華例牌同老婆分開上機。今次劉華豁出去喇!一家三口齊齊出發去吉隆坡,搵咗三個工人姐姐,兩個保鑣,加埋一個女助手貼身跟實,六對三,包冇甩漏!

在大馬逗留足足兩星期,一家三口坐夜機返港。撞啱假期,機場人來人往,劉華早有準備,一早安排兩架七人車,兩個司機加四個保鑣接機,加埋跟身團隊,一共十二人護駕,提高戒備!





以往返大馬祭祖,只有朱麗倩帶住 Hanna出發,劉華未有同行。





一向作風平民的朱麗倩,平日會帶阿女幫襯 food court。

愈大愈似阿媽

航班未着陸,四名保鑣一早已 stand by,在閘口附近巡邏。黑衫黑褲的劉華,戴住 cap帽、口罩包到冚率先落機,尾隨的朱麗倩一樣戴住口罩,兩公婆急步向前行。至於 Hanna就由工人姐姐負責抱住。

眨吓眼五歲半的 Hanna,冇見一排明顯又高咗一截,手長腳長,著住黑白色棒球褸襯黑色 legging,加埋對黑金 adidas波鞋,十分有型! Hanna仲留咗一頭長髮,五官同細個時一樣咁標致,依然係眼大大、鼻高高,仲愈大愈似媽咪。





去年劉華在歌迷聚會中,播放住院時片段,當中有 Hanna替他抹腳,同餵飲水,場面感人。





年初二,劉華同粉絲團拜兼派利是。

主動拖住爸爸

一行人從禁區火速步出閘口,工人姐姐抱住 Hanna一馬當先,朱麗倩尾隨,劉華殿後,三人 keep住相隔幾個身位。 Hanna都好醒目,一直伏在工人姐姐膊頭。行到去扶手電梯,劉華稍為放下戒心, Hanna終於落地自己一個行。難得有爸爸媽咪陪出埠, Hanna心情興奮,沿路一直跳吓跳吓,去到停車場,仲主動要拖住爸爸,安頓好老婆同阿女,劉華接住上車走人。兩星期旅程,一家三口連埋團隊,足足動用四架行李車,載住十七件行李,當中包括十個紙皮箱,收穫豐富。





去年初,劉華在泰國拍廣告時意外墮馬,導致盆骨撕裂。





去年劉華獲頒博士學位, Hanna親手畫畫送俾爸爸。

心儀女拔小學

劉華曾經在粉絲聚會戲言:「我劉德華個女,仲有咩路要鋪?」講就咁講,據知兩公婆對於阿女升學亦相當緊張。劉華一直希望 Hanna可以入讀傳統學校,同老婆想法一致,唔會揀貴價國際學校。今年五月, Hanna足六歲大,夠秤升小一。兩公婆去年尾開始已經四出為女兒報考學校。

「佢哋首選係拔萃女小學,鍾意佢哋校風好,各方面發展都好平均,同埋又近屋企,已經去咗兩輪面試啦,咁當然佢哋唔止報咗一間。唔好以為 Hanna見人會好怕醜,其實唔係㗎,佢一熱咗身就好鬼多嘢講,細細個已經識講流利嘅普通話,佢爸爸啲國語歌佢識跟住唱㗎!」





早前 Hanna被拍得到中環行名店,身邊只有一名親戚同保鑣跟住,劉華同朱麗倩都無同行。





劉華即將在紅館舉行廿場跨年個唱,下半年有排忙。

心儀傳統名校

現今社會大部分父母都傾向國際學校,但傳統名校亦有一班擁躉,校風及師資優良,成為不少星爸星媽熱捧之選。

李嘉欣仔 男拔萃小學

李嘉欣與許晉亨的獨子許建彤( Jayden)一向活潑好動,球類、水上運動瓣瓣掂,去年 9月考入本地名牌傳統小學男拔萃小學,跟爺爺許世勳同一學校,早前許氏一家更去過男拔舉辦的賣物會,為囝囝評估學校。

黃浩然仔 華仁小學

作為絕世好爸的黃浩然,平日都軟硬兼施,陪仔讀書玩遊戲,幼稚園為兒子選擇 Happy School的靈糧堂幼稚園,去年 9月大仔 kayden成功考入傳統名校華仁小學,黃浩然即有意減產,陪兒子適應小學生活,希望親自監督囝囝成長之路。

Eason女 女拔萃書院

自陳奕迅同徐濠縈誕下愛女康堤後,一直緊張愛女教育發展,上 playgroup、學游水、溜冰、鋼琴,樣樣谷盡, 10年終於成功考入心儀女拔萃小學,阿徐更提到學校不硬推國民教育,令徐濠縈非常安心。

森美仔女 聖保羅男女中學附屬小學

森美一對仔女都在聖保羅男女中學附屬小學讀書,為港島區的一條龍名校,年年出狀元,而細女曦童去年更脫穎而出獲選為八位小太空人之一,而 15歲大仔曦樂則跳級一年,於英國入讀中四。

放低防線

12年,自天王女劉向蕙( Hanna)出世後,劉德華嚴守防線,千方百計防女兒真面目曝光,直至 15年劉華終於諗通,逐步放寬,公開小 Hanna真面目。

加多利山起堡壘

09年,劉華不惜豪擲 2億買入加多利山獨立屋,再耗資千萬施工三年,將三千呎地方打造成囡囡的歡樂天地,務求小 Hanna足不出戶亦有充裕空間活動。

搬安全屋

12年,由於加多利山愛巢被揭,劉華一度舉家搬到月租 17萬的尖沙咀服務式住宅聽濤閣暫住,更將保安升級,出入有專人負責鎖,保鑣人數由原本四個增至十個。

「遮陣」護駕

小 Hanna出世兩個月,要到中環診所打預防針,為免愛女樣貌曝光,劉德華安排四名保鑣護駕,更吩咐大廈保安組成「遮陣」,全面阻擋記者鏡頭。

公開見歌迷

劉德華曾在歌迷會承諾待女兒三歲時讓大家見面。事隔一年,劉華兌現承諾,每年都帶女兒跟歌迷見面,視歌迷為家人。

食 food court

每年朱麗倩都會帶埋 Hanna飛返大馬娘家,每次都非常大陣仗,去年湊女現身機場,有保鑣、工人姐姐傍住,湊住阿女現身機場準備出發。入閘後,朱麗倩想食家鄉菜,一行五人竟然唔係去 lounge,反而走去最多人的 food court。

五歲自己 shopping

去年,小 Hanna撇甩媽咪,連同幾個保鑣一名親戚,到中環 IFC名店 shopping, Hanna自己揀衫、試香水,相當可愛。

撰文:娛樂組 攝影:攝影組 


鍾意就快D Share啦!