2018年3月22日 星期四

離世25周年!于仁泰爆李小龍之子死亡經過 __,李小龍,

于仁泰詳談與李國豪合作經過。3月31日是李小龍兒子李國豪(BrandonLee)逝世25周年紀念,而當年國豪就是因為拍攝電影《烏鴉》(TheCrow) ...


于仁泰詳談與李國豪合作經過。


3月31日是李小龍兒子李國豪(Brandon Lee)逝世25周年紀念,而當年國豪就是因為拍攝電影《烏鴉》(The Crow)的槍擊鏡頭而發生罕有的意外身亡,意外的經過至今一直成謎。而曾與國豪在港產片《龍在江湖》合作過的香港著名導演于仁泰就趁住國豪離世25周年的紀念日子接受東網越洋訪問講雙方合作的關係,並大爆當年國豪意外身亡的經過!

買愛路扶連故居 于仁泰質疑風水有問題

1986年,李國豪獲德寶電影公司老闆潘迪生邀請到港拍電影《龍在江湖》,影片拍完後,導演于仁泰與國豪仍有聯絡。于導演說:「當時國豪畀咗《烏鴉》個劇本我睇,我睇完之後同佢講認為套戲會令佢上一線演員位置,臨開工前我都有同佢見過面,估唔到係我哋最後一次見面!國豪當時已好有錢,喺荷里活大道買咗已故影星愛路扶連(Errol Flynn)故居,不過我睇完間屋之後,我就同佢講間屋似乎風水有問題,我仲提議佢搵風水師睇睇,但反而被佢鬧我迷信。」

「出事」原因絕非尋仇

到1993年3月31日,國豪就因為拍攝《烏》的槍擊鏡頭而「出事」!一直盛傳國豪之死與他因為得罪人而被人尋仇有關,于導演就為他平反:「當時聽到消息後非常震驚及傷心,亦覺得整件事好古怪,我問荷里活圈中人士,佢哋後來解釋話因為套戲係獨立製作Budget有限,處理槍械啲軍火佬非工會人士,佢哋同美國八大電影公司嘅處理道具槍嘅手法唔同,佢哋會好緊張處理,用完一支槍之後就要換槍,並將槍枝清洗過,但拍攝《烏》時就冇洗槍,而搞到有含木碎嘅雜質塞喺槍管入面,導致開槍時木碎打入咗國豪嘅肚臍內,所以佢拍完個中槍鏡頭之後好肚痛,當時工作人員以為佢普通肚痛而畀藥佢食,點知最後內出血過多,所以整件事絕對唔係尋仇!」

身為李小龍之子有壓力

在訪問中,于仁泰亦有提到與國豪合作的經過。他說:「作為一個導演,《龍在江湖》係好令人難忘,亦係拍得最困難的一部電影!」于導演表示當時他與高志森及馮世雄簽約德寶,拍完《八喜臨門》之後,潘迪生就叫他們三人組搞一個project。他說:「潘迪生因為當時簽咗國豪,所以叫我哋寫一套為國豪度身訂造嘅戲。」之後于仁泰與高志森飛抵洛杉磯見國豪:「同國豪見面之後心知不妙,佢話明唔准提及李小龍同唔會拍動作片,我好好奇問點解唔想提?同佢傾計之後,佢話要做羅拔迪尼路(Robert DeNiro),佢自己好喜歡做演員,但就唔想做功夫明星!後來我趁機會問國豪點解個性格咁負面,佢話全因遺傳父親,李小龍當年在美國被人白眼而返到嚟又被人睇唔起,所以形成心中嘅憤怒,而身為李小龍個仔更令佢承受好大包袱!所以我才改《龍》嘅英文片名為《Legacy of Rage》(憤怒的遺產),我度劇本時國豪都有參與,不過我認為個故事講好朋友出賣好朋友,個故事太灰,不過佢好鍾意。」

太有性格得罪人多

幾經辛苦,于仁泰終於成功邀得李國豪拍《龍》,怎料,國豪來港出席記者會時卻因為拒絕回答有關父親的事而「玩謝」傳媒,令傳媒對他的印象極差。于導演說:「就算到拍攝時,國豪都唔係好合作唔肯打,我惟有將套戲轉為充滿火爆場面嘅槍戰片,當時身兼演員同武指嘅孟海對佢好反感,連武師亦覺得佢好招積,想郁手打佢,而我每日都擔驚受怕,驚佢畀人打而搞到我拍唔到戲,我當時只想快啲拍完套戲!」

除了得罪一眾武師之外,就連擔任《龍》編劇的高志森都想郁手打國豪!于導演說:「由於當時要趕拍在聖誕檔期上映所以我同高志森都要分組拍攝,高志森負責拍國豪在監獄嘅鏡頭,有日高志森打畀我求救喊打喊殺嬲到話要用支大燈嚟打國豪,最後被我勸阻。而到電影拍完之後,武師話明會喺煞科宴笠麻包袋圍打國豪,我知道之後即叫國豪唔好出席,最終佢亦聽從冇出席。」于仁泰表示拍完《龍》之後反而國豪與他多了話題,而國豪亦放開心扇與他傾密計,就連與女友分手的私事都細訴給他聽:「我覺得國豪長大之後成個人變晒,變得好易相處!」

----------------------------

東網巨星開咗ig喇,大家快啲follow

https://goo.gl/KGuo2N


來源 source: http://hk.on.cc
鍾意就快D Share啦!
Related Posts Plugin for WordPress, Blogger...